ಅರಿವಿನ ಅಲೆಗಳು

ನಿಮ್ಮ ಲೇಖನಗಳನ್ನು [email protected] ಗೆ ಕಳುಹಿಸಿ
Navigation Menu

ಅಲೆ ೧೪ – ನಿಮ್ಮ ಜಾಲತಾಣಕ್ಕೆ ಮುಕ್ತ ಅವಕಾಶಗಳು

ಪ್ರಕಟಿಸಿದ್ದು ದಿನಾಂಕ Aug 14, 2011 ವಿಭಾಗ 2011, ale | 0 ಪ್ರತಿಕ್ರಿಯೆಗಳು

ಅಂತರ್ಜಾಲ ಇಂದು ಸಂವಹನ-ಮಾಹಿತಿ-ಮನರಂಜನೆಗಷ್ಟೇ ಸೀಮಿತವಾಗದೆ ಕಾರ್ಯನಿರ್ವಹಣೆಗೂ ಬಳಕೆಯಾಗುತ್ತಿದೆ. ನೀವು ಬಳಸುವ ತಂತ್ರಾಂಶಗಳನ್ನು ಗಣಕದಲ್ಲಿ ಪ್ರತಿಷ್ಠಾಪಿಸುವ ಬದಲು ಅಂತರ್ಜಾಲದ ಮೂಲಕವೇ ನಿಮ್ಮ ಕೆಲಸಗಳನ್ನು ಮಾಡಿಕೊಡುವ ತಂತ್ರಾಂಶಗಳು ವೆಬ್ ಆಪ್(web app)ಗಳಾಗಿವೆ. ಇವುಗಳು ಸರ್ವರ್ ಗಳಲ್ಲೇ ಪ್ರತಿಷ್ಠಾಪಿಸಲ್ಪಟ್ಟು, ನಾವು ನಮ್ಮ ಬ್ರೌಸರ್‍ ಗಳ ಮೂಲಕ ನೀಡುವ ಸೂಚನೆಯನ್ನು ಆಧರಿಸಿ, ಸರ್ವರ್ ಗಳಲ್ಲೇ ಸಂಸ್ಕರಣೆ ನಡೆಸಿ ಅದರ ಫಲಿತಾಂಶವನ್ನು ನಿಮಗೆ ಮರಳಿಸುವ ಕೆಲಸವನ್ನು ಮಾಡುತ್ತವೆ. ಹೆಚ್ಚುತ್ತಿರುವ ಇಂಟರ್ನೆಟ್ ವೇಗ, ಕಡಿಮೆ ಸಂಸ್ಕರಣಾ ಸಾಮರ್ಥ್ಯವುಳ್ಳ ಮೊಬೈಲ್, ಟ್ಯಾಬ್ಲೆಟ್ ಗಳ ಮೂಲಕ ಅಂತರ್ಜಾಲ ಬಳಕೆ, ಬೆಳೆಯುತ್ತಿರುವ ತಂತ್ರಾಂಶಗಳ ಅಗತ್ಯತೆಗಳು ಇವುಗಳ ಬೇಡಿಕೆ ಹೆಚ್ಚುವಂತೆ ಮಾಡಿವೆ.

ತಂತ್ರಾಂಶಗಳನ್ನು ಗ್ರಾಹಕರು ಖರೀದಿಸಿ ಬಳಸುವ ಬದಲು ಅಂತರ್ಜಾಲದ ಮೂಲಕವೇ ಬಳಸಲು ಸಾಧ್ಯವಾಗುವ ಈ ಮಾದರಿಯನ್ನು ಸೇವಾ ತಂತ್ರಾಶ(Software as service – SaaS) ಎಂದು ಕರೆಯುತ್ತಾರೆ. ಮಾನವ ಸಂಪನ್ಮೂಲ ನಿರ್ವಹಣೆ, ಗ್ರಾಹಕ ಸಂಬಂಧ ನಿರ್ವಹಣೆ, ಶಾಲೆ, ಆಸ್ಪತ್ರೆಗಳ ನಿರ್ವಹಣೆ ಸೇರಿದಂತೆ ಹಲವಾರು ಕಾರ್ಯಗಳಿಗೆ ಸೇವಾ ತಂತ್ರಾಂಶಗಳು ಉಪಯುಕ್ತವಾಗಿವೆ. ನೀವೂ ಇಂತಹ ಯಾವುದೇ ಸೇವೆಯನ್ನು ನಿಮ್ಮ ಗ್ರಾಹಕರಿಗೆ ನೀಡಲು ಬಯಸುವುದಾದರೆ ಅದಕ್ಕೆ ಸಹಕಾರಿಯಾಗುವ ಸಾಕಷ್ಟು ತಂತ್ರಾಂಶಗಳು ಮುಕ್ತವಾಗಿ ಲಭ್ಯವಿವೆ. ಅವುಗಳನ್ನು ನಿಮ್ಮ ಸರ್ವರ್ ನಲ್ಲಿ ಪ್ರತಿಷ್ಠಾಪಿಸಿ ಬಳಸಬಹುದು.

ಇಂತಹ ಸಾಧ್ಯತೆಗಳ ಬಗ್ಗೆ ಆಸಕ್ತಿಯಿದ್ದರೆ ಸ್ವಲ್ಪ ಹುಡುಕಿ, ಬಹಳಷ್ಟು ಅವಕಾಶಗಳು ಕಾಣಸಿಗುತ್ತವೆ.

ನಾನಿಲ್ಲಿ ಹೇಳಹೊರಟಿರುವುದು ನಿಮ್ಮ ಜಾಲತಾಣವನ್ನು ನಿರ್ವಹಿಸಲು ನೆರವಾಗುವ ಮುಕ್ತ ವೆಬ್ ಆಪ್ ಗಳ ಬಗ್ಗೆ. ನಿಮ್ಮ ಖಾಸಗಿ ಜಾಲತಾಣವಾಗಿರಲಿ, ವ್ಯವಹಾರದ್ದಿರಲಿ, ಜಾಲ ಮಳಿಗೆಗಳಿರಲಿ, ಸಮುದಾಯ ತಾಣವಿರಲಿ, ಇವುಗಳನ್ನು ಅಭಿವೃದ್ಧಿ ಪಡಿಸಿ ನಿಮಗೆ ಅಗತ್ಯವಿರುವ ಗುಣ ಲಕ್ಷಣಗಳನ್ನು ವಿನ್ಯಾಸಗೊಳಿಸುವುದು ಬಹು ದೊಡ್ಡ ಕೆಲಸ. ಅದನ್ನು ಸರಳಗೊಳಿಸಲು ನಿಮಗೆ ಸಹಕಾರಿಯಾಗುವಂತಹ ಕೆಲವೊಂದು ಮುಕ್ತ ಮತ್ತು ಉಚಿತ ತಂತ್ರಾಂಶಗಳ ವಿವರ ಇಲ್ಲಿವೆ. ಇವನ್ನು ಬಳಸಿ ನೀವು ಕೆಲವೇ ನಿಮಿಷಗಳಲ್ಲಿ ನಿಮ್ಮ ಜಾಲತಾಣಕ್ಕೆ ಬ್ಲಾಗ್ ಅಳವಡಿಸಬಹುದು, ಕೆಲವೇ ಗಂಟೆಗಳಲ್ಲಿ ಆನ್ ಲೈನ್ ಮಳಿಗೆ ತೆರೆಯಬಹುದು.

ಬ್ಲಾಗಿಂಗ್

ನೀವು ಉಚಿತವಾಗಿ ಬ್ಲಾಗ್ ತೆರೆಯಬಹುದಾದ ತಾಣಗಳಲ್ಲಿ ನಿಮ್ಮ ಬ್ಲಾಗ್ ಮಾಡಿರಬಹುದು. ನಿಮ್ಮ ತಾಣದಲ್ಲೇ ಅಂತಹ ಬ್ಲಾಗ್ ಅಳವಡಿಸಿಕೊಳ್ಳಬೇಕೆಂದು ನಿಮಗನಿಸಿದರೆ wordpress ಬಳಸಬಹುದು. ನಿಮ್ಮ ಬ್ಲಾಗಿಗೆ ಜತೆಯಾಗಬಲ್ಲ ಅನೇಕ ಪೂರಕ ತಂತ್ರಾಂಶಗಳು ಕೂಡ ಲಭ್ಯವಿವೆ. ಅವುಗಳನ್ನು ಅಗತ್ಯಕ್ಕೆ ತಕ್ಕಂತೆ ಬಳಸಬಹುದು.

ಜಾಲ ಮಳಿಗೆ

Online shopಗಳಿಗಾಗಿ ಪ್ರೆಸ್ತಾ ಶಾಪ್ಝೆನ್ ಕಾರ್ಟ್ಓಎಸ್ ಇ-ಕಾಮರ್ಸ್ಗಳನ್ನು ಬಳಸಬಹುದು. ನೀವು ಪುಸ್ತಕ, ಟೀಶರ್ಟ್ ಸೇರಿದಂತೆ ಯಾವುದನ್ನೇ ಮಾರಾಟ ಮಾಡುವುದಾದರೂ ಸರಿ. ಒಮ್ಮೆ ಪ್ರಯತ್ನಿಸಿ ನೋಡಿ.

CMS

ಕಂಟೆಂಟ್ ಮ್ಯಾನೇಜ್ಮೆಂಟ್ ಸಿಸ್ಟಮ್ ಗಳು ನಿಮ್ಮ ಮಾಹಿತಿ ಆಧರಿತ ತಾಣಗಳನ್ನು ನಿರ್ವಹಿಸಲು ಉಪಯುಕ್ತವಾಗಿರುವ ತಂತ್ರಾಂಶಗಳು. drupaljoomlaಬಹಳ ಬಳಕೆಯಲ್ಲಿರುವ ಮುಕ್ತ ಸಿಎಂಎಸ್ ಗಳು. ಇದೇ ರೀತಿಯ ಬಹಳಷ್ಟು ತಂತ್ರಾಂಶಗಳು ಲಭ್ಯವುದ್ದು, ನಿಮ್ಮ ಅಗತ್ಯಕ್ಕೆ ಸರಿಹೊಂದುವುದನ್ನು ಆರಿಸಿಕೊಳ್ಳಲು ಅವಕಾಶವಿದೆ. WordPress ಕೂಡ ಅನೇಕ ತಾಣಗಳಿಗೆ ಸಿಎಂಎಸ್ ಆಗಿ ಬಳಕೆಯಾಗುತ್ತಿದೆ.

ಚಿತ್ರಪುಟ

ನಿಮ್ಮ ಜಾಲತಾಣದಲ್ಲಿ ಚಿತ್ರಪುಟವೊಂದಿದ್ದರೆ ಅಥವಾ ಚಿತ್ರಗಳಿಗಾಗಿಯೇ ತಾಣವೊಂದನ್ನು ನೀವುಮಾಡುವುದಾದರೆ Gallery ಉಪಯುಕ್ತ. ಅನೇಕ ಚಿತ್ರಗಳನ್ನು ಒಂದೇ ಸಾರಿ ಅಪ್ಲೋಡ್ ಮಾಡಿ ಅವುಗಳಿಗೆ ವಿವರ ಸೇರಿಸುವುದು, ವಿಷಯಾನುಸಾರ ವಿಂಗಡಿಸುವುದು, ನೋಡುಗರ ಪ್ರತಿಕ್ರಿಯೆಗೆ ಅವಕಾಶ ನೀಡುವುದು, ಸ್ಲೈಡ್ ಶೋ ಇತ್ಯಾದಿಗಳು ಸಾಧ್ಯವಿದೆ.

ಚರ್ಚಾತಾಣಗಳು – Forums

ಸಾಮಾಜಿಕ ತಾಣಗಳಿಗೂ ಮೊದಲು ಜಾಲಿಗರನ್ನು ಬಹಳಷ್ಟು ಸೆಳೆದುಕೊಂಡಿದ್ದ ತಾಣಗಳು ಫೋರಂಗಳು. ಯಾವುದೇ ವಿಷಯಗಳ ಬಗ್ಗೆ ಫೋರಂಗಳನ್ನು ನೀವೂ ಆರಂಭಿಸಬಹುದು. Phpbb ಬಹಳಷ್ಟು ತಾಣಗಳಲ್ಲಿ ಬಳಕೆಯಾಗುತ್ತಿದೆ. ನೀವು ವರ್ಡ್-ಪ್ರೆಸ್ ಬಳಸುವುದಿದ್ದರೆ ಬಿಬಿಪ್ರೆಸ್ ಎಮ್ಬ ಪೂರಕ ತಂತ್ರಾಂಶ ಲಭ್ಯವಿದೆ. ದ್ರುಪಲ್, ಬಡ್ಡೀಪ್ರೆಸ್ ಗಳಲ್ಲೂ ಇದಕ್ಕೆ ಅವಕಾಶಗಳಿವೆ. ಇಂತಹುದೇ ಇನ್ನೊಂದು: ಮೈ ಬಿಬಿ

ಸಾಮಾಜಿಕ ಜಾಲತಾಣಗಳು

ಆರ್ಕುಟ್, ಫೇಸ್ ಬುಕ್, ಗೂಗಲ್ ಪ್ಲಸ್ ರೀತಿಯಲ್ಲಿ ಸಾಮಾಜಿಕ ಜಾಲತಾಣಗಳನ್ನು(social networking sites) ನಡೆಸುವ ಆಸಕ್ತಿ ನಿಮಗಿದ್ದರೆ Elggಬಳಸಬಹುದು. ನಿಮ್ಮ ಸಂಸ್ಥೆ, ನಿಮ್ಮ ಆಸಕ್ತಿಯ ವಿಚಾರ, ನಿಮ್ಮ ಪ್ರದೇಶಗಳಿಗೆ ಸಂಬಂಧಿಸಿದ ಸಾಮಾಜಿಕ ತಾಣಗಳ ಮೂಲಕ ಪರಸ್ಪರ ಸಂವಹನ, ಸಂದೇಶಗಳ ರವಾನೆ, ಪ್ರೊಫೈಲ್ ರಚನೆ, ಮಹಿತಿ/ಚಿತ್ರಗಳ ವಿನಿಮಯ ಇತ್ಯಾದಿಗಳನ್ನು ನಡೆಸಬಹುದು. ವರ್ಡ್ ಪ್ರೆಸ್ ಗೆ buddypress ಎಂಬ ಪ್ಲಗ್-ಇನ್ ಬಳಸಿ ಸಾಮಾಜಿಕ ಪದರವನ್ನು ಸೇರಿಸಲೂ ಅವಕಾಶವಿದೆ.

Support Ticket

ನಿಮ್ಮ ಉತ್ಪನ್ನ ಅಥವಾ ಸೇವೆಗೆ ಸಂಬಂಧಿಸಿದಂತೆ ಬಳಕೆದಾರರ ದೂರು ಅಥವಾ ಸೇವಾ ವಿನಂತಿಗಳನ್ನು ದಾಖಲಿಸಿ, ಅವುಗಳ ಬಗ್ಗೆ ಗ್ರಾಹಕರೊಂದಿಗೆ ಸಮ್ವಹಿಸಲು ಆನ್ ಲೈನ್ ಟಿಕೆಟಿಂಗ್ ಬಳಸಲಾಗುತ್ತದೆ. ದೂರು ದಾಖಲಿಸಿದವರಿಗೆ ದೂರು ಸಂಖ್ಯೆಯನ್ನು ಈ ಮೂಲಕ ರವಾನಿಸಿ, ದೂರು ಸಂಖ್ಯೆಯ ಆಧಾರದ ಮೇಲೆ ಬೇಕಾದಾಗೆಲ್ಲ ಅವರ ದೂರಿನ ಸ್ಥಿತಿಯನ್ನು ತಿಳಿಸುವುದನ್ನು ಈ ತಂತ್ರಾಂಶ ಮಾಡುತ್ತದೆ. Osticket ಇದಕ್ಕಾಗಿಯೇ ಇರುವ ಮುಕ್ತ ತಂತ್ರಾಂಶ.

ಚಾಟ್

ನಿಮ್ಮ ತಾನಕ್ಕೆ ಭೇಟಿ ನೀಡುವ ಓದುಗರ/ಗ್ರಾಹಕರ ಜೊತೆ ಚಾಟಿಂಗ್ ನಡೆಸಲು ಉಪಯುಕ್ತವಾಗುವ ತಂತ್ರಾಂಶ miweb. ಪದೇ ಪದೇ ಬರುವ ಪ್ರಶ್ನೆಗಳಿಗೆ ಸಿದ್ಧ ಉತ್ತರಗಳನ್ನು ಇಟ್ಟುಕೊಳ್ಳುವುದು, ನೀವಿಲ್ಲದಿರುವಾಗ ನೀಡಬೇಕಾದ ಸಂದೇಶಗಳನ್ನು ನಮೂದಿಸುವುದು, ಒಂದೇ ಸಲಕ್ಕೆ ಹಲವು ಜನ ಚಾಟ್ ಮಾಡ ಬಯಸಿದರೆ ಸಾಲಿನಲ್ಲಿ ಕಾಯಿಸಿ ಒಬ್ಬೊಬ್ಬರನ್ನೇ ಆರಿಸುವುದು, ನಿಮ್ಮ ತಂಡದಲ್ಲಿ ಹಲವು ಜನರಿದ್ದರೆ ವಿಭಾಗಗಳಾಗಿ ವಿಂಗಡಿಸುವುದು ಇತ್ಯಾದಿ ಹಲವು ಅವಕಾಶಗಳು ಇದರಲ್ಲಿವೆ. ಇನ್ನೊಂದು ತಂತ್ರಾಂಶ ajax chat ಕೂಡಾ ಬಳಸಿ ನೋಡಬಹುದು.

ಅಧ್ಯಯನ

ಆನ್-ಲೈನ್ ಕಲಿಕೆಗಾಗಿ ಮೀಸಲಿರುವ ಒಂದು ತಂತ್ರಾಂಶ ಮೂಡಲ್. ಯಾವುದೇ ವಿಷಯಗಳ ಕಲಿಕಾ ಸಾಮಗ್ರಿಗಳನ್ನು ಇಂಟರ್ನೆಟ್ ಮೂಲಕ ನೀಡುವುದಿದ್ದರೆ ಇದನ್ನು ಬಳಸಬಹುದು. ಶಾಲೆ, ಕಾಲೇಜುಗಳಿಗೆ ತುಂಬ ಉಪಯುಕ್ತ.

ಸರ್ವೇ

ನಿಮ್ಮ ತಾಣದಲ್ಲಿ ವೀಕ್ಷಕರ ಅಭಿಪ್ರಾಯವನ್ನು ಕಲೆಹಾಕುವಂತಹ ಅವಕಾಶ ಬೇಕೆ? ಸರ್ವೇ ಹಾಗೂ ವೋಟಿಂಗ್ ನಡೆಸಲು ಲೈಮ್ ಸರ್ವೇ ಯನ್ನು ಬಳಸಬಹುದು. ಸಿಂಪಲ್ ಪೋಲ್ ಇನ್ನೊಂದು ಆಯ್ಕೆ.

***

ಪೂರಕಗಳು: ಇಲ್ಲಿರುವ ಬಹುತೇಕ ಮುಕ್ತ ತಂತ್ರಾಂಶಗಳು ಅವುಗಳ ಉಪಯೋಗದ ಪರಿಧಿಯನ್ನು ನಾವೇ ವಿಸ್ತರಿಸಲು ಅವಕಾಶ ನೀಡುತ್ತವೆ. ಅದಕ್ಕಾಗಿ ಬಳಸುವ ಪೂರಕ ತಂತ್ರಾಂಶಗಳನ್ನು ವಿವಿಧ ತಂತ್ರಾಂಶಗಳು Addons ಅಥವಾ plugins ಅಥವಾ modules ಎಂಬುದಾಗಿ ಕರೆಯುತ್ತಾರೆ. ಮೂಲ ತಂತ್ರಾಂಶವನ್ನು ಸೋರ್ಸ್ ಕೋಡ್ ಮೂಲಕ ಮಾರ್ಪಡಿಸದೇ ಅದರ ಕಾರ್ಯವ್ಯಾಪ್ತಿಯನ್ನು ಬದಲಿಸುವ ಆ ವಿಧಾನ ತಂತ್ರಾಶಗಳ ಹೆಸ ಆವ್ರುತ್ತಿಗೆ ಅಪ್ಗ್ರೇಡ್ ಮಾಡುವ ಕೆಲಸವನ್ನು ಸರಳ ಗೊಳಿಸುತ್ತದೆ. ಇಲ್ಲಿರುವ ಬಹುತೇಕ ತಂತ್ರಾಂಶಗಳಿಗೆ ಈ ರೀತಿಯ ಪೂರಕಗಳು ಅಗಾಧ ಸಂಖ್ಯೆಯಲ್ಲಿ ದೊರೆಯುತ್ತಿದ್ದು, ನೀವೂ ಕೂಡ ನಿಮ್ಮದೇ ಪೂರಕಗಳನ್ನು ಸೇರಿಸಿ ತಂತ್ರಾಂಶದ ಸಮುದಾಯವನ್ನು ಬೆಳೆಸಬುದು.

ವಿನ್ಯಾಸಗಳು: ಈ ತಂತ್ರಾಂಶಗಳು ಮೂಲತಃ ತಮ್ಮದೇ ಆದ ವಿನ್ಯಾಸ ಮತ್ತು ವರ್ಣ ಸಂಯೋಜನೆಗಳನ್ನು ಹೊಂದಿರುತ್ತವೆ. ನಿಮ್ಮ ಸಂಸ್ಥೆಯ ಬ್ರಾಂಡ್, ಮೂಲ ತಾಣದ ವಿನ್ಯಾಸ, ನಿಮ್ಮ ಆಸಕ್ತಿಗನುಗುಣವಾಗಿ ಇದನ್ನು ಬದಲಿಸಲು ಅವಕಾಶಗಳಿರುತ್ತವೆ. ಇದಕ್ಕಾಗಿ ಈ ತಂತ್ರಾಂಶಗಳು ಥೀಮ್/ಟೆಂಪ್ಲೇಟ್/ಸ್ಕಿನ್ ಬದಲಿಸಲು ವ್ಯವಸ್ಥೆ ಕಲ್ಪಿಸಿರುತ್ತವೆ. ಅಂತರ್ಜಾಲದಲ್ಲಿ ಲಭ್ಯವಿರುವ ವಿನ್ಯಾಸಗಳಲ್ಲಿ ನಿಮಗೆ ಸರಿಹೊಂದುವುದನ್ನು ನೀವು ಆರಿಸಿಕೊಳ್ಳಬಹುದು ಅಥವಾ ನಿಮ್ಮದೇ ಆದ ವಿನ್ಯಾಸಗಳನ್ನು ತಯಾರಿಸಬಹುದು.

 

ಹರ್ಷ ಪೆರ್ಲ ಕೇರಳದ ಕಾಸರಗೋಡಿನ ಪೇರಲದವನು. ಎಂ.ಎಸ್.ಸಿ ಎಲೆಕ್ಟ್ರಾನಿಕ್ಸ್ ಬಳಿಕ ಸೆಮಿಕಂಡಕ್ಟರ್ ಕಂಪೆನಿಯಲ್ಲಿ ಉದ್ಯೋಗ. ನಂತರ ಸಾಫ್ಟ್ವೇರ್ ಕಂಪೆನಿಯೊಂದರ ನಿರ್ದೆಶಕನಾಗಿದ್ದೇನೆ. ವರ್ಡ್‌ಪ್ರೆಸ್ ಮತ್ತು ಇತರ ಸಿ.ಎಮ್.ಎಸ್ ಗಳಲ್ಲಿ ಸಾಕಷ್ಟು ಪ್ರಯೋಗಗಳನ್ನು ಮಾಡಿದ್ದೇನೆ. ಇಂಟರ್ನೆಟ್, ಮೀಡಿಯಾ ಆಸಕ್ತಿಯ ವಿಷಯಗಳು.
ಮುಂದೆ ಓದಿ

ಅಲೆ ೧೩ – ಯೋಜನಾ ನಿರ್ವಹಣೆ – ತಲೆ ಬಿಸಿ ಏಕೆ?

ಪ್ರಕಟಿಸಿದ್ದು ದಿನಾಂಕ Aug 13, 2011 ವಿಭಾಗ 2011, ale | 0 ಪ್ರತಿಕ್ರಿಯೆಗಳು

ಹೆಚ್ಚು-ಕಡಿಮೆ ನೀವು ಯಾವುದೇ ಕ್ಷೇತ್ರದ ಉದ್ಯೋಗದಲ್ಲಿದ್ದರೂ ಒಂದು ಪ್ರಾಜೆಕ್ಟ್ (ಯೋಜನೆ) ಸಾಮಾನ್ಯವಾಗಿ ಇದ್ದೇ ಇರುತ್ತದೆ. ಉದ್ಯೋಗವೇ ಏಕೆ, ನಿಮ್ಮದೇ ಆದ ಚೆಂದದ ಮನೆ ಕಟ್ಟ ಬೇಕೆಂದಿದ್ದರೂ ಅದಕ್ಕೊಂದು ಯೋಜನೆ ಹಾಕಲೇ ಬೇಕು. ಈ ಯೋಜನೆಗಾಗಿ ಇಂತಿಷ್ಟು ಜನಗಳು ಇರಬೇಕು, ಇಂತಿಷ್ಟು ಕೆಲಸದ ತುಣುಕುಗಳು, ಇಂತಿಂಥ ದಿನವೇ ಈ ಕಾರ್ಯಗಳು ಮುಗಿಯಬೇಕು, ಎಂಬ ಲೆಕ್ಕವನ್ನು ಪ್ರಾಜೆಕ್ಟ್ ಆರಂಭಿಸುವ ಮುನ್ನವೇ ಸಾಮಾನ್ಯವಾಗಿ ನಿರ್ಧರಿಸಲಾಗುತ್ತದೆ.

ಪ್ರತಿ ಉದ್ಯೋಗಿಯನ್ನು ಯಾವ ರೀತಿಯಲ್ಲಿ ಈ ಪ್ರಾಜೆಕ್ಟ್ ಗೋಸ್ಕರ ಬಳಸಿಕೊಳ್ಳಬಹುದು, ಪ್ರಾಜೆಕ್ಟ್ ಸಮಯಕ್ಕೆ ಸರಿಯಾಗಿ ನಡೆಯುತ್ತಿದೆಯೋ ಇಲ್ಲವೋ ಎಂಬುದು ಪ್ರತಿ ಪ್ರಾಜೆಕ್ಟ್ ಮ್ಯಾನೇಜರ್ ನ /ಯೋಜನೆ ನಿರ್ವಹಿಸುವವನ ತಲೆ ಬಿಸಿ.

ಈ ತಲೆಬಿಸಿಯನ್ನು ಕೊಂಚ ಹೋಗಲಾಡಿಸಿ, ಪ್ರಾಜೆಕ್ಟ್ ಪ್ರಗತಿಯನ್ನು ಸೂಕ್ಷ್ಮವಾಗಿ ಗಮನಿಸಲೆಂದು ಪ್ರಾಜೆಕ್ಟ್ ಮ್ಯಾನೇಂಜ್‍ಮೆಂಟ್ (ಯೋಜನಾ ನಿರ್ವಹಣೆ) ತಂತ್ರಾಂಶಗಳು ಬಹಳಷ್ಟಿವೆ.
ಇವುಗಳಲ್ಲಿ ಓಪನ್‍ಪ್ರಾಜ್ ಮತ್ತು ಗ್ಯಾಂಟ್ ಪ್ರಾಜೆಕ್ಟ್ ಮುಕ್ತ ತಂತ್ರಾಂಶಗಳು ಪ್ರಮುಖವಾದುವು.

ಸಾಮಾನ್ಯವಾಗಿ ಪ್ರಾಜೆಕ್ಟ್ ನಡೆಸುವಾಗ ಎದುರಾಗುವ ಪ್ರಶ್ನೆಗಳನ್ನು/ಸವಾಲುಗಳನ್ನು ಎದುರಿಸಲು ಇಂಥ ತಂತ್ರಾಂಶಗಳು ಸ್ವಲ್ಪ ಮಟ್ಟಿಗೆ ಸಹಾಯವನ್ನು ನೀಡುತ್ತದೆ ಹಾಗೂ ಪ್ರಾಜೆಕ್ಟ್ ನಿರ್ವಹಣೆಯನ್ನು ಸುಗಮಗೊಳಿಸುತ್ತದೆ.

ಉದಾಹರಣೆಗೆ, ಪ್ರತಿ ಪ್ರಾಜೆಕ್ಟ್ ಮ್ಯಾನೇಜರ್ ಗೆ ಕಾಡುವ ಪ್ರಶ್ನೆಗಳಾದ:

೧.ಪ್ರಾಜೆಕ್ಟ್ ಸಂಪೂರ್ಣಗೊಳಿಸಲು ಎಷ್ಟು ದಿನಗಳು ಬೇಕಾಗುತ್ತದೆ?
೨. ಪ್ರಾಜೆಕ್ಟ್ ನಲ್ಲಿ ಪಾಲ್ಗೊಳ್ಳುವ ಯಾವ ಉದ್ಯೋಗಿಯ ತಲೆಯ ಮೇಲೆ ಹೆಚ್ಚು ಜವಾಬ್ದಾರಿಗಳು, ಕೆಲಸಗಳು ಇರುತ್ತವೆ?
೩. ಪ್ರಾಜೆಕ್ಟ್ ನಲ್ಲಿರುವ ಪ್ರತಿ ತುಂಡು-ತುಣುಕುಗಳಲ್ಲಿ, ಯಾವ ಕೆಲಸವಾದ ಮೇಲೆ ಮುಂದಿನ ಕೆಲಸವನ್ನು ನಡೆಸಬಹುದು? ಯಾವ ಯಾವ ಕೆಲಸಗಳನ್ನು ಒಮ್ಮೆಲೇ ನಡೆಸಬಹುದು?
೪. ಈ ಪ್ರಾಜೆಕ್ಟ್ ನಲ್ಲಿ ಯಾವ ಕೆಲಸ ಮತ್ತೊಂದು ಸಂಸ್ಥೆಯ/ಮತ್ತೊಂದು ಗುಂಪಿನ ಮೇಲೆ ಅವಲಂಬಿಸಿದೆ?
೫. ಒಬ್ಬ ಉದ್ಯೋಗಿ ಮಾಡುತ್ತಿರುವ ಕೆಲಸದಲ್ಲಿ ಪ್ರಗತಿ ಸಾಧಿಸದಿದ್ದರೆ, ಈ ಕೆಲಸದ ತುಣುಕುಗಳನ್ನು ಮತ್ತೊಬ್ಬ ಉದ್ಯೋಗಿಗೆ ಹಂಚಲು ಸಾಧ್ಯವೇ?
೬. ಪ್ರಾಜೆಕ್ಟ್ ನಲ್ಲಿ ಇಲ್ಲಿಯವರೆಗೂ ಎಷ್ಟು ಕೆಲಸ ಪೂರ್ಣಗೊಂಡಿದೆ? ಇನ್ನೆಷ್ಟು ಮಿಕ್ಕಿವೆ?
೭. ಸಮಯಕ್ಕೆ ಸರಿಯಾಗಿ ಈ ಪ್ರಾಜೆಕ್ಟ್ ಮುಗಿಸಲು ಸಾಧ್ಯವೆ?
೮. ಪ್ರಾಜೆಕ್ಟ್ ಮುಗಿಸಲು ವೆಚ್ಚವೆಷ್ಟಾಗುತ್ತದೆ? ಯಾವ ಕೆಲಸದ ತುಣುಕಿಗೆ ಎಷ್ಟು ಖರ್ಚು ಆಗಬಹುದು?

ಎಂಬಂಥ ವಿಷಯಗಳನ್ನು ಇಂಥ ತಂತ್ರಾಂಶಗಳು ವಿವರವಾಗಿ ಕಣ್ಮುಂದೆ ಬಿಚ್ಚಿಡುತ್ತವೆ.

ಇಂಥ ತಂತ್ರಾಂಶವನ್ನು ಸರಿಯಾಗಿ ಬಳಸಿಕೊಂಡಲ್ಲಿ, ಪ್ರಾಜೆಕ್ಟ್ ಆರಂಭಿಸುವ ಮುನ್ನವೇ ಹೊಸದಾದ ಪ್ರಾಜೆಕ್ಟ್ ಇಂಥ ದಿನವೇ ಮುಗಿಯುತ್ತದೆ ಎಂದು ವಿಶ್ವಾಸವಾಗಿ ಹೇಳಬಹುದು. ಈಗಾಗಲೇ ನಡೆಯುತ್ತಿರುವ ಪ್ರಾಜೆಕ್ಟ್ ಪ್ರಗತಿಯಲ್ಲಿ ಅಕಸ್ಮಾತ್ ಗೊಂದಲದ ಪರಿಸ್ಥಿತಿ ಬಂದಲ್ಲಿ, ಯಾವ ರೀತಿ ಮತ್ತೊಮ್ಮೆ ಈ ಪ್ರಾಜೆಕ್ಟ್ ಅನ್ನು ಸರಿ ದಾರಿಗೆ ತರಬಹುದು ಎಂಬಲ್ಲಿ ಇಂಥ ತಂತ್ರಾಂಶಗಳು ಬಹು ಉಪಯುಕ್ತವಾಗಿದೆ.

ಉದಾಹರಣೆಗೆ, ಮನೆ ಕಟ್ಟುವಾಗ ಈ ಯೋಜನೆಯ ಪ್ರಗತಿಯನ್ನು/ಸ್ಥಿತಿಯನ್ನು ಗ್ಯಾಂಟ್ ಪ್ರಾಜೆಕ್ಟ್ ನಲ್ಲಿ ಈ ಕೆಳಕಂಡ ರೀತಿಯಲ್ಲಿ ಬಳಸಿಕೊಳ್ಳಬಹುದು:

(ಚಿತ್ರವನ್ನು ದೊಡ್ಡದಾಗಿ ನೋಡಲು ಅದರ ಮೇಲೆ ಕ್ಲಿಕ್ ಮಾಡಿ)

ಈ ಯೋಜನೆಯಲ್ಲಿ ಬೇಕಾಗುವ ಸಿಬ್ಬಂದಿಯ ವಿವರಗಳನ್ನು ಈ ರೀತಿ ನೀಡಬಹುದು:

(ಚಿತ್ರವನ್ನು ದೊಡ್ಡದಾಗಿ ನೋಡಲು ಅದರ ಮೇಲೆ ಕ್ಲಿಕ್ ಮಾಡಿ)

ಖರ್ಚು ವೆಚ್ಚಗಳ ನಿರ್ವಹಣೆ ಗ್ಯಾಂಟ್ ಪ್ರಾಜೆಕ್ಟ್ ನಲ್ಲಿ ಮಾಡಲಾಗದಿದ್ದರೂ ಓಪನ್ ಪ್ರಾಜೆಕ್ಟ್ ನಲ್ಲಿ ಮಾಡಬಹುದು..ಇದರ ಉದಾಹರಣೆ ಇಲ್ಲಿದೆ:

ಈ ರೀತಿ ಯೋಜನೆಯ ನಿರ್ವಹಣೆಯಲ್ಲಿ ಗ್ಯಾಂಟ್ ಪ್ರಾಜೆಕ್ಟ್/ಓಪನ್ ಪ್ರಾಜ್ ಬಹು ಉಪಕಾರಿ.

ಕೊ: ಈ ಉಪಯುಕ್ತ ಮುಕ್ತ ತಂತ್ರಾಂಶವನ್ನು ತಿಳಿದಿರುವ ನೀವು, ಇನ್ನು ಮುಂದೆ ಯಾರಾದರೂ Microsoft Project ಯೋಜನೆಯನ್ನು ನಿಮಗೆ ತೋರಿದಲ್ಲಿ, openproj ಮತ್ತು ganttproject ಬಗ್ಗೆ ಅವರಿಗೆ ತಿಳಿಸಿ ದುಡ್ಡನ್ನು ಉಳಿಸಬಹುದೆಂಬ ಕಿವಿ ಮಾತು ಹೇಳಿ!

ಶ್ರೀನಿವಾಸ್ ಪಿ ಎಸ್ ಹುಟ್ಟಿದ್ದು, ಬೆಳೆದದ್ದು, ಓದಿದ್ದು ಎಲ್ಲವೂ ಬೆಂಗಳೂರಲ್ಲೇ! ಕಂಪ್ಯೂಟರ್ ಪದವೀಧರರಾದ ಇವರು, ಸುಮಾರು ಹನ್ನೊಂದು ವರ್ಷಗಳಿಂದ ಹಲವಾರು ನೆಟ್ ವರ್ಕಿಂಗ್ ಸಂಸ್ಥೆಗಳಲ್ಲಿ ಉದ್ಯೋಗ ಮಾಡಿರುವರು. ಹಲವು ಹವ್ಯಾಸಗಳಲ್ಲಿ ಆಸಕ್ತಿ ಹೊಂದಿರುವ ಇವರಿಗೆ ಪ್ರವಾಸ, ಚಾರಣ, ಛಾಯಾಗ್ರಹಣ, ವ್ಯಂಗ್ಯಚಿತ್ರಕಲೆ, ಹಾಡು-ಕವನ-ಚುಟುಕಗಳನ್ನು ಬರೆಯುವುದು ಅಚ್ಚುಮೆಚ್ಚು.
ಮುಂದೆ ಓದಿ

ಅಲೆ ೧೨ – ವಿ ಎಲ್ ಸಿ ಮೀಡಿಯಾ ಪ್ಲೇಯರ್

ಪ್ರಕಟಿಸಿದ್ದು ದಿನಾಂಕ Aug 12, 2011 ವಿಭಾಗ 2011, ale | 0 ಪ್ರತಿಕ್ರಿಯೆಗಳು

“ಹಾಡು ಕೇಳಕ್ಕೆ ಯಾವ software ಚೆನ್ನಾಗಿದ್ಯೋ?” – “ವಿನ್ಆಂಪ್ (WinAmp) ಅಂತ ಇದೆ.. ಬಹಳ ಜನ ಅದನ್ನೇ ಉಪಯೋಗಿಸ್ತಾರೆ”

“ಈ ವಿನ್ಆಂಪ್ ಅಲ್ಲಿ ವಿಡಿಯೋ ಬರಲ್ವೇನೋ? ಒಂದು ವಿಸಿಡಿ ತಂದಿದೀನಿ.. ಪ್ಲೇ ಆಗ್ತಿಲ್ಲ” – “ಇಲ್ಲ.. ಅದಕ್ಕೆ ವಿಂಡೋಸ್ ಮೀಡಿಯಾ ಪ್ಲೇಯರ್ ಉಪಯೋಗಿಸು”

“ಇವತ್ತು ಒಂದು ಡಿವಿಡಿ ತಂದೆ ಕಣೋ.. ಈ ವಿಂಡೋಸ್ ಮೀಡಿಯಾ ಪ್ಲೇಯರಲ್ಲಿ ಓಪನ್ ಆಗ್ತಿಲ್ಲ. ಏನ್ ಮಾಡ್ಲಿ?” – “ಪವರ್ ಡಿವಿಡಿ ಅಂತ ಇದೆ.. ಅದನ್ನ ಹಾಕ್ಕೋ”

“ಇದ್ಯಾವ್ದೋ ಹೊಸಾದಂತೆ rm ಫೈಲಂತೆ.. ನೀನು ಹಿಂದೆ ಹೇಳಿದ ಯಾವ ಯಾವುದರಲ್ಲೂ ಓಪನ್ ಆಗ್ತಿಲ್ಲ” – “ಅದಕ್ಕೆ ರಿಯಲ್ ಪ್ಲೇಯರ್ ಹಾಕ್ಕೋ”

“ನನ್ನ ಎಂಪಿತ್ರೀ ಪ್ಲೇಯರಿಗೆ ಹಾಡು ಹಾಕ್ಬೇಕು.. ನನ್ನ ಹತ್ರ rm ಫೈಲಿದೆ… ಅದನ್ನ ಎಂಪಿತ್ರೀಗೆ ಬದಲಾಯಿಸೋದು ಹೇಗೆ?” – “ಹಾಗೆ ಮಾಡಕ್ಕೆ ಟೋಟಲ್ ಕನ್ವರ್ಟರ್ ಬೇಕಾಗುತ್ತೆ”

***

ಸುಮಾರು ಎಂಟು-ಹತ್ತು ವರ್ಷಗಳ ಹಿಂದೆ ಮೇಲಿನಂಥ ಸಂಭಾಷಣೆ ಸಾಮಾನ್ಯವಾಗಿತ್ತು. ಪ್ರತಿಯೊಂದು ಹೊಸ ರೀತಿಯ ಫೈಲಿಗೂ ಹೊಸ ಹೊಸ ತಂತ್ರಾಂಶ ಹಾಕಿಕೊಳ್ಳುವುದು ಕಿರಿಕಿರಿಯುಂಟುಮಾಡುತ್ತಿತ್ತು. ಆದರೆ ಅದೇ ಸಮಯದಲ್ಲಿ ಇವೆಲ್ಲ ಜಂಜಾಟಗಳಿಂದ ಮುಕ್ತಿ ನೀಡುವ, ಸಾಮಾನ್ಯವಾಗಿ ಬಳಸಲ್ಪಡುವ ಬಹುತೇಕ ಫಾರ್ಮ್ಯಾಟುಗಳ ಫೈಲುಗಳನ್ನು ಪ್ಲೇ ಮಾಡಬಲ್ಲ ಚಿಕ್ಕ-ಚೊಕ್ಕ ತಂತ್ರಾಂಶವೊಂದು ಹೊರಬಂದಿತ್ತು. ಅದೂ ಮುಕ್ತ ಮತ್ತು ಸ್ವತಂತ್ರವಾಗಿ… ಅದೇ ವಿ ಎಲ್ ಸಿ ಮೀಡಿಯಾ ಪ್ಲೇಯರ್(VLC Media player). ಮೊದಲಿಗೆ ವಿಡಿಯೋಲ್ಯಾನ್ ಸರ್ವರ್ (VideoLan Server – VLS) ಮತ್ತು ವಿಡಿಯೋಲ್ಯಾನ್ ಕ್ಲೈಂಟ್ (VideoLan Client – VLC) ಎಂಬ ಎರಡು ಪ್ರತ್ಯೇಕ ಹೆಸರಿನೊಂದಿಗೆ, ಪ್ರತ್ಯೇಕ ಉದ್ದೇಶದೊಂದಿಗೆ ಪ್ರಾರಂಭವಾದ ಇದು ಮುಂದೆ ಎರಡೂ ವೈಶಿಷ್ಟ್ಯಗಳನ್ನು ಒಗ್ಗೂಡಿಸಿಕೊಂಡು ವಿ ಎಲ್ ಸಿ ಮೀಡಿಯಾ ಪ್ಲೇಯರ್ ಆಯಿತು.

ಬಹುತೇಕ ಫಾರ್ಮ್ಯಾಟುಗಳನ್ನು ತೆರೆಯಲು ffmpeg ಎಂಬ ಇನ್ನೊಂದು ಮುಕ್ತ ತಂತ್ರಾಂಶವನ್ನು ಬಳಸಿಕೊಳ್ಳುವ ವಿ ಎಲ್ ಸಿ, ffmpeg ನಲ್ಲಿ ಇರದ ಇನ್ನೂ ಕೆಲವು ಫಾರ್ಮ್ಯಾಟುಗಳನ್ನು ತಾನೇ ಡೀಕೋಡ್ ಮಾಡುತ್ತದೆ. ಹೀಗಾಗಿ, MPEG-1, MPEG-2, MPEG-4, H.264, Real Video, Windows Media Video, Flash ಹೀಗೆ ಹತ್ತು ಹಲವು ಬಗೆಯ ವಿಡಿಯೋ ಮತ್ತು MP3, AAC, AC3, Windows Media Audio, Real Audio, Vorbis ಮುಂತಾದ ಆಡಿಯೋ ಫಾರ್ಮ್ಯಾಟುಗಳನ್ನು ತೆರೆಯಬಲ್ಲುದು.

ಇದು ಬೇರೆ ಬೇರೆ ಮಾನಿಟರುಗಳ screen aspect ratio ಗೆ ತಕ್ಕಂತೆ ವಿಡಿಯೋ ಅನ್ನು ಬದಲಾಯಿಸುವ ಅಥವಾ ಕತ್ತರಿಸುವ, ಧ್ವನಿ ಮತ್ತು ಚಿತ್ರಗಳ ನಡುವೆ ವ್ಯತ್ಯಾಸವಿದ್ದರೆ (lip-sync) ಅದನ್ನು ಸರಿಪಡಿಸುವ, ಧ್ವನಿಯ ಮಟ್ಟವನ್ನು ಸಾಮಾನ್ಯಕ್ಕಿಂತ ಹೆಚ್ಚು ಮಟ್ಟಕ್ಕೆ ಏರಿಸುವ (ಆದರೆ ಇದರಿಂದ ನಿಮ್ಮ ಗಣಕ/ಲ್ಯಾಪ್ಟಾಪಿನ ಧ್ವನಿವರ್ಧಕ ಹಾಳಾಗಬಹುದು), ಒಂದು ಫ್ಯಾರ್ಮ್ಯಾಟಿನಿಂದ ಇನ್ನೊಂದು ಫಾರ್ಮ್ಯಾಟಿಗೆ ಬದಲಾಯಿಸುವ (transcode) ಸೌಲಭ್ಯ ಕೂಡ ಇದರಲ್ಲಿದೆ.

ಇನ್ನು ಲಿನಕ್ಸಿನಲ್ಲಿ ಕಮಾಂಡ್ ಲೈನಿನಿಂದ ಕೂಡ ವಿ ಎಲ್ ಸಿ ಯನ್ನು ಉಪಯೋಗಿಸಬಹುದು. cvlc filename ಎಂದು ಕಮಾಂಡ್ ಕೊಟ್ಟರೆ GUI ಇಲ್ಲದೆಯೇ ನೀವು ಹಾಡು ಕೇಳುಬಹುದು. ಧ್ವನಿ ಹೆಚ್ಚು/ಕಡಿಮೆ ಮಾಡುವುದು, ನಿಲ್ಲಿಸುವುದು ಇತ್ಯಾದಿಗಳನ್ನು ಕೂಡ ಕೀಲಿಮಣೆ ಉಪಯೋಗಿಸಿಯೇ ಮಾಡಬಹುದು.

ಅದಕ್ಕಿಂತ ಮುಖ್ಯವಾಗಿ ಈ ವಿ ಎಲ್ ಸಿ ಪ್ಲೇಯರ್ ಅನ್ನು ಒಂದು ಸ್ಟ್ರೀಮರ್(streamer) ಆಗಿ ಉಪಯೋಗಿಸಬಹುದು. ಇದನ್ನು ಒಂದು ರೀತಿಯಲ್ಲಿ ಟಿ ವಿ ಚಾನೆಲ್ಲಿಗೆ ಹೋಲಿಸಬಹುದು. ಅಂದರೆ ನಿಮಗೆ ಇಷ್ಟವಾದ ಹಾಡು ಅಥವಾ ವಿಡಿಯೋಗಳನ್ನು ನಿಮ್ಮ ಮನೆಯ ಸ್ಥಳೀಯ ಜಾಲದ ಮೂಲಕ (LAN) ಅಥವಾ ಅಂತರಜಾಲದ ಮೂಲಕ ಬಿತ್ತರಿಸಬಹುದು. ನಿಮ್ಮ ಐ.ಪಿ ವಿಳಾಸ ಮತ್ತು ಪೋರ್ಟ್ ಸಂಖ್ಯೆ ಗೊತ್ತಿರುವವರು ಅದನ್ನು ನೇರವಾಗಿ ಅವರ ಗಣಕಗಳ ಮೂಲಕವೇ ಕೇಳಬಹುದು ಅಥವಾ ವೀಕ್ಷಿಸಬಹುದು. ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯ(VTU) ಪ್ರಸ್ತುತ ಉಪಗ್ರಹಗಳ ಮೂಲಕ ಎಜ್ಯುಸಾಟ್(Edusat) ಕಾರ್ಯಕ್ರಮವನ್ನು ನಡೆಸುತ್ತಿದೆ. ಅದರ ಬದಲು ಈ ರೀತಿಯ ಸ್ಟ್ರೀಮರ್ ಉಪಯೋಗಿಸಿದರೆ ವಿದ್ಯಾರ್ಥಿಗಳು ಮನೆಯಲ್ಲಿ ಕುಳಿತೇ ಪಾಠಗಳನ್ನು ಕೇಳಬಹುದು.

ಇಷ್ಟೆಲ್ಲ ಸಾಧ್ಯತೆಗಳನ್ನು ಹೊಂದಿರುವ ವಿ ಎಲ್ ಸಿ ಬೆಳೆದಿದ್ದಾದರೂ ಹೇಗೆ? ವಿಶ್ವಾದ್ಯಂತ ಇರುವ ಸ್ವತಂತ್ರ ಮತ್ತು ಮುಕ್ತ ತಂತ್ರಾಂಶಾಸಕ್ತರಿಂದ, ಅವರ ಸ್ವಾರ್ಥರಹಿತ ಕೊಡುಗೆಯಿಂದ. ತಾವು ಯಾವುದೋ ಕಾರಣಕ್ಕೆ ಬೇಕೆಂದು ಅಭಿವೃದ್ಧಿಪಡಿಸಿದ ಒಂದು ತಂತ್ರಾಂಶ ಬೇರೆಯವರಿಗೂ ಉಪಯೋಗವಾಗಲಿ, ಹಾಗೆ ಉಪಯೋಗಿಸುವವರ ಅಗತ್ಯ ಸ್ವಲ್ಪ ಬೇರೆಯಾಗಿದ್ದರೆ ಅವರೂ ಕೂಡ ತಮ್ಮ ಆಗತ್ಯತೆಗಳಿಗೆ ತಕ್ಕಂತೆ ಅದನ್ನು ಮಾರ್ಪಡಿಸಿ ಅಭಿವೃದ್ಧಿಪಡಿಸುವಂತಾಗಲಿ ಎಂಬ ಸದಾಶಯದಿಂದ. ಅಲ್ಲದೇ ಈ ತಂತ್ರಾಂಶಾಸಕ್ತರೆಲ್ಲರೂ ಕೇವಲ ತಂತ್ರಜ್ಞರೇ ಆಗಿರಬೇಕೆಂದೇನೂ ಇಲ್ಲ. ಮೆನು, ಸಹಾಯ ಪುಟ ಇತ್ಯಾದಿಗಳನ್ನು ತಮ್ಮ ತಮ್ಮ ಭಾಷೆಗಳಿಗೆ ಅನುವಾದ ಮಾಡಬಹುದು, ಡಾಕ್ಯುಮೆಂಟೇಷನ್ ಮಾಡಬಹುದು, ಹೀಗೆ.. ಪ್ರತಿಯೊಬ್ಬರೂ ಇದರಲ್ಲಿ ತೊಡಗಿಸಿಕೊಳ್ಳಬಹುದು. ಕೇವಲ ವಿ ಎಲ್ ಸಿ ಮಾತ್ರವಲ್ಲ. ಬಹುತೇಕ ಸ್ವತಂತ್ರ ಮತ್ತು ಮುಕ್ತ ತಂತ್ರಾಂಶಗಳು ಹೀಗೇ ಬೆಳವಣಿಗೆ ಹೊಂದುತ್ತವೆ. ಲಿನಕ್ಸಿನ ಉದಾಹರಣೆಯನ್ನೇ ತೆಗೆದುಕೊಳ್ಳುವುದಾದರೆ – ಅದನ್ನು ಮೊದಲಿನಿಂದ ಅಭಿವೃದ್ಧಿಪಡಿಸುವುದಾದರೆ ಅದಕ್ಕೆ ತಗುಲುವ ವೆಚ್ಚ ಸುಮಾರು ೭.೬ ಬಿಲಿಯನ್ ಅಮೆರಿಕನ್ ಡಾಲರ್! ಸುಮ್ಮನೆ ತುಲನೆ ಮಾಡಿ ಹೇಳುವುದಾದರೆ ಇದು ಇಡೀ ಇನ್ಫೋಸಿಸ್ ಕಂಪೆನಿಯ ಸ್ವತ್ತುಗಳ ಮೌಲ್ಯಕ್ಕಿಂತ ಹೆಚ್ಚು!!

ಇನ್ನೇಕೆ ತಡ? ನಾವೂ ಕೂಡ ಮುಕ್ತ ತಂತ್ರಾಂಶಗಳನ್ನು ಬೆಂಬಲಿಸೋಣವೇ?

ಹರೀಶ್, ಊರು ಸಾಗರದ ಹತ್ತಿರ ಮಂಚಾಲೆ. ದಾವಣಗೆರೆಯ ಬಿ.ಐ.ಇ.ಟಿ ಯಲ್ಲಿ ಇಲೆಕ್ಟ್ರಾನಿಕ್ಸ್ ಅಂಡ್ ಕಮ್ಯುನಿಕೇಷನ್ ಇಂಜಿನಿಯರಿಂಗ್ ಮುಗಿಸಿ ಈಗ ಟಾಟಾ ಎಲೆಕ್ಸಿಯಲ್ಲಿ ಇಂಜಿನಿಯರ್ ಆಗಿ ಕೆಲಸ ಮಾಡುತ್ತಿದ್ದೇನೆ. ಕನ್ನಡ ಭಾಷೆಯ ಬಳಕೆ, ತಂತ್ರಜ್ಞಾನದ ವಿಷಯಗಳಲ್ಲಿ ಆಸಕ್ತಿಯಿದೆ.

ಮುಂದೆ ಓದಿ

ಅಲೆ ೧೧ – ಮುಕ್ತ ತಂತ್ರಾಂಶಕ್ಕೆ ಆಗಸವೇ ಎಲ್ಲೆ!

ಪ್ರಕಟಿಸಿದ್ದು ದಿನಾಂಕ Aug 11, 2011 ವಿಭಾಗ 2011, ale | ೧ ಪ್ರತಿಕ್ರಿಯೆ

ಮೊನ್ನೆ ನನ್ನ ಇಮೆಯ್ಲ್ ನಲ್ಲಿ ಮಿತ್ರರೊಬ್ಬರು ನನಗೆ ಹೀಗೆ ಬರೆದಿದ್ದರು: “ನೀವು ಬರೆದಿದ್ದ ಅರುಂಧತೀ ದರ್ಶನ ಬರಹ ಚೆನ್ನಾಗಿತ್ತು. ನೀವು ಬೆಂಗಳೂರಿನಲ್ಲಿ ಈ ನಕ್ಷತ್ರವನ್ನು ನೋಡಲು ಅನುಕೂಲವಾಗುವ ಹಾಗೆ ಸೂಚನೆಗಳನ್ನು ಕೊಟ್ಟಿದ್ದಿರಿ. ಈ ನಕ್ಷತ್ರ ನಾವಿರುವ ಕ್ಯಾಲಿಫೋರ್ನಿಯಾದ ಸನಿವೇಲ್ ನಲ್ಲೂ ಕಾಣುತ್ತದೆಯೇ ಇಲ್ಲವೇ? ಕಾಣುವುದಿದ್ದರೆ ಹೇಗೆ ತಿಳಿಸುತ್ತೀರಾ?”. ಈ ಪ್ರಶ್ನೆ ನನಗೆ ಈಚಿನ ದಶಕದಲ್ಲಿ, ಸಾಮಾನ್ಯ ನೋಡುಗನಿಗಾಗಿ ಸಿಕ್ಕಿರುವ ಆಕಾಶ ವೀಕ್ಷಣೆಯ ಹೊಸ ದಾರಿಯನ್ನ ಮನಸ್ಸಿಗೆ ನೆನಪಿಸಿತು. ನಾನು ನಿಜವಾಗಿ ತಂತ್ರಾಂಶ ತಂತ್ರಜ್ಞನೇನಲ್ಲ, ಆದರೂ ಈ ಅರಿವಿನ ಅಲೆಗಳು ಸರಣಿಯಲ್ಲಿ ಒಂದು ಮುಕ್ತ ತಂತ್ರಾಂಶದ ಬಗ್ಗೆ ಒಬ್ಬ ಬಳಕೆದಾರನ ನೋಟದಿಂದ ಬರೆಯಲು ಈ ಪ್ರಶ್ನೆ ಕಾರಣವಾಗಿ, ನಾನು ಬಳಸಿರುವ ಒಂದು ಮುಕ್ತ ತಂತ್ರಾಂಶದ ಬಗ್ಗೆ ಬರೆಯೋಣವೆಂದು ಹೊರಟಿದ್ದೇನೆ.

ನಾನು ಐದನೇಯದೋ ಆರನೆಯದೋ ತರಗತಿಗೆ ಹೋಗುತ್ತಿದ್ದ ಕಾಲದ ಮಾತು. ಅದು ಹೇಗೋ ನನಗೆ ಈ ಆಕಾಶವೀಕ್ಷಣೆಯ ಹುಚ್ಚು ಹಿಡಿಯಿತು. ನನ್ನ ಗೆಳೆಯರಲ್ಲಿ ಆಗಲಿ, ಮನೆಯಲ್ಲಿ ಆಗಲೀ, ಅಥವಾ ಪರಿಚಿತರಲ್ಲಿ ಆಗಲೀ ಯಾರಿಗೂ ಈ ವಿಷಯದಲ್ಲಿ ಹೆಚ್ಚಿನ ಮಾಹಿತಿ ಇರಲಿಲ್ಲ. ನಮ್ಮೂರ ಗ್ರಂಥಾಲಯದಲ್ಲಿ ಸಿಕ್ಕ ಕೆಲವು ಪುಸ್ತಕಗಳನ್ನು ಓದಿ, ಹೇಗೋ ಕೆಲವು ನಕ್ಷತ್ರಗಳನ್ನು, ರಾಶಿಗಳನ್ನು ಗುರುತಿಸುವುದನ್ನು ಕಲಿತಿದ್ದಾಯಿತು. ಅಪರೂಪಕ್ಕೊಮ್ಮೆ ಸೈಯನ್ಸ್ ಟುಡೇ ಪತ್ರಿಕೆಯಲ್ಲೋ, ಮತ್ತೆಲ್ಲಾದರೂ ತಿಂಗಳ ಆಕಾಶದ ನಕ್ಷೆ ಸಿಕ್ಕಿಬಿಟ್ಟರೆ ಹಿಗ್ಗು ಹೇಳತೀರದಾಗಿರುತ್ತಿತ್ತು. ಒಂದು ನಕ್ಷತ್ರವನ್ನೋ, ನೆಬ್ಯುಲಾವನ್ನೋ ನೋಡಿ ಗುರುತಿಸಿದರೆ ಅದೇ ಹೆಚ್ಚು ಹೆಚ್ಚು. ನಂತರ ೮೫ ನೇ ಇಸವಿಯ ಸಮಯದಲ್ಲಿ ಹ್ಯಾಲಿ ಧೂಮಕೇತು ಬಂದ ಸಮಯದಲ್ಲಿ ಕೈಗೊಂದು ದೂರದರ್ಶಕವೂ ಸಿಕ್ಕಾಗ, ಆಕಾಶದಲ್ಲಿ ಆ ಧೂಮಕೇತುವಿನ ಉಂಡೆಯನ್ನು ಗುರ್ತಿಸುವುದು ಹುಲ್ಲು ಬಣವೆಯಲ್ಲಿ ಸೂಜಿ ಹುಡುಕಿದಷ್ಟೇ ಕಷ್ಟವಾಗಿತ್ತೇನೋ ಎಂದು ನೆನಪು.

ಆದರೆ ಇವತ್ತಿನ ವಿಷಯ ಹಾಗಿಲ್ಲ. ಒಂದು ವೇಳೆ ಆಕಾಶವೀಕ್ಷಣೆಯಲ್ಲಿ ನಿಮಗೆ ಆಸಕ್ತಿ ಇದ್ದರೆ ನಿಮಗೆ ದಾರಿ ತೋರುವ ತಂತ್ರಾಂಶಗಳು ಈಗ ನಿಮ್ಮ ಕೈಯಳತೆಯಲ್ಲೇ ಇವೆ. ಚಿಕ್ಕವರು ದೊಡ್ಡವರು ಎನ್ನದೆ ಎಲ್ಲರಿಗೂ ಆಕಾಶದ ಅದ್ಭುತಗಳನ್ನು ಕಂಪ್ಯೂಟರ್ ತೆರೆಯ ಮೇಲೇ ಮೂಡಿಸುತ್ತವೆ. ಹಾಗಂತ ಆಕಾಶ ನೋಡೋದು ಯಾಕೆ ಅಂತ ಕಂಪ್ಯೂಟರ್ ಮುಂದೇ ಕುಳಿತುಬಿಡಬೇಡಿ ಮತ್ತೆ! ಆಕಾಶದಲ್ಲಿ ನೋಡಿ ಹುಡುಕುವ ಮೊದಲು ಕಂಪ್ಯೂಟರಿನಲ್ಲಿ ನೀವು ನೋಡಬೇಕಾದ ನಕ್ಷತ್ರ ಪುಂಜವನ್ನೋ, ಗ್ರಹವನ್ನೋ ಅದರ ಸುತ್ತ ಮುತ್ತನ ಪ್ರದೇಶಗಳನ್ನೂ ಹೇಗಿದೆಯೆಂದು ನೋಡಿ ಸ್ವಲ್ಪ ಮನದಟ್ಟು ಮಾಡಿಕೊಂಡರೆ, ಮತ್ತೆ ರಾತ್ರಿಯ ಕತ್ತಲಲ್ಲಿ ನೋಡಹೊರಟಾಗ ನೀವು ಆ ತಾರೆಗಳ ನಡುವೆ ಕಳೆದು ಹೋಗುವ ಸಂದರ್ಭ ಇರೋದಿಲ್ಲ. ನೋಡೋದು ಸುಲಭ ಆಗತ್ತೆ.

ಇವುಗಳಿಗೆ ಪ್ಲಾನೆಟೇರಿಯಮ್ ತಂತ್ರಾಂಶ ಎಂದು ಒಟ್ಟಿಗೆ ಸಾರಾಸಗಟಾಗಿ ಹೆಸರಿಸಿ ಹೇಳುವುದು ರೂಢಿ. ಪ್ಲಾನೆಟೇರಿಯಂ ನಲ್ಲಿ ಹೇಗೆ ಒಂದು ಗೋಲಾಕಾರದ ತೆರೆಯ ಮೇಲೆ ಆಕಾಶದ ಗೋಲದಲ್ಲಿ ಕಾಣುವ ನಕ್ಷತ್ರಗಳನ್ನು ತೋರಿಸಲಾಗುವುದೋ ಅಂತಹದ್ದೇ ತಂತ್ರಾಂಶದಿಂದ ನಮ್ಮ ಕಂಪ್ಯೂಟರ್ ಮೇಲೂ ಆಕಾಶದ ದೃಶ್ಯಗಳನ್ನ ಮೂಡಿಸಬಹುದು. ಹಲವಾರು ಈ ರೀತಿಯ ಮುಕ್ತ ಪ್ಲಾನೆಟೇರಿಯಂ ತಂತ್ರಾಂಶಗಳಿವೆ, ಅವುಗಳಲ್ಲಿ ಸ್ಟೆಲೇರಿಯಂ ಕೂಡಾ ಒಂದು. ಸ್ಟೆಲೇರಿಯಂ ಎನ್ನುವುದು ನಿಮಗೆ ವಿಂಡೋಸ್ ಆಪರೇಟಿಂಗ್ ಸಿಸ್ಟಂಗೆ ಆಗಲಿ, ಇಲ್ಲವೇ ಲಿನಕ್ಸ್ ಆಪರೇಟಿಂಗ್ ಸಿಸ್ಟಂಗೆ ಆಗಲಿ ಎಲ್ಲದರಲ್ಲೂ ಮುಕ್ತವಾಗಿ ಹಾಗೂ ಉಚಿತವಾಗಿ ದೊರೆಯುವ ಪ್ಲಾನೆಟೇರಿಯಂ ತಂತ್ರಾಂಶ. ಆಕಾಶದ ಮೊದಮೊದಲ ಪರಿಚಯ ಮಾಡಿಕೊಳ್ಳುತ್ತಿರುವವರಿಗೆ ಸ್ಟೆಲೇರಿಯಂ ಸ್ವಲ್ಪ ಹೆಚ್ಚು ಸುಲಭ ಎನ್ನಬಹುದು.

ನಿಮಗೆ ಗ್ರಹಗಳನ್ನ ನೋಡುವ ಉದ್ದೇಶವಿದ್ದಾಗ, ಅದರಲ್ಲೂ ಪ್ರಕಾಶ ಕಡಿಮೆ ಇರುವ ಶನಿ, ಬುಧ, ಅಥವಾ ಬರಿಗಣ್ಣಿಗೆ ಬಹಳ ಕಷ್ಟಪಟ್ಟು ಕಾಣಬಲ್ಲ ಯುರೇನಸ್ ಆಗಲೀ, ಅಥವಾ ಆಗಾಗ್ಗೆ ಒಳಸೌರವ್ಯೂಹಕ್ಕೆ ಭೇಟಿ ಕೊಡುವಂತಹ ಧೂಮಕೇತು ಇಂತಹವುಗಳನ್ನು ಗುರುತಿಸಬೇಕಾದರೂ, ಅವು ಆಕಾಶದಲ್ಲಿರುವ ಸ್ಥಾನಗಳು(ಬೇರೆ ತಾರೆಗಳಿಗೆ ಸಾಪೇಕ್ಷವಾಗಿ ಎಲ್ಲಿವೆ ಎನ್ನುವುದನ್ನು) ತಿಳಿದಿದ್ದರೆ ಅವುಗಳನ್ನ ಬರಿಗಣ್ಣಿನಲ್ಲಾಗಲಿ, ಬೈನಾಕ್ಯುಲರ್ ನಲ್ಲಿ ಆಗಲಿ ಅಥವಾ ದೂರದರ್ಶಕದಲ್ಲಿ ಆಗಲಿ ಹುಡುಕಿ ನೋಡುವುದು ಚಿಟಿಕೆ ಹೊಡೆಯುವಷ್ಟೇ ಸುಲಭ ನಿಮಗೆ. ದಿವಸ, ಸಮಯ, ಮತ್ತೆ ನೀವು ಆಕಾಶವನ್ನು ನೋಡುತ್ತಿರುವ ಸ್ಥಳ ಇವುಗಳನ್ನು ಸ್ಟೆಲೇರಿಯಂನಲ್ಲಿ ಸೇರಿಸಿದರೆ, ನಿಮ್ಮ ಆಕಾಶದ ದೃಶ್ಯ ತಯಾರ್!

ಇಂತಹ ತಂತ್ರಾಂಶ ಸಿಗುವ ಮೊದಲು ಆಕಾಶ ವೀಕ್ಷಕರು ಬೇರೆ ಬೇರೆ ತಿಂಗಳಿಗೆ ಆಕಾಶವನ್ನು ನೋಡಲು ಬೇರೆ ಬೇರೆ ನಕ್ಷೆಗಳನ್ನಿಟ್ಟುಕೊಂಡು ಒದ್ದಾಡಬೇಕಾಗುತ್ತಿತ್ತು. ಸ್ಟೆಲೇರಿಯಂ ಬಳಕೆಯಿಂದ ಇದರ ಅಗತ್ಯವೇ ಇಲ್ಲ ಈಗ. ಅಂದ ಹಾಗೆ, ಮೊದಲು ನನ್ನ ಗೆಳೆಯರು ಕೇಳಿದ ಪ್ರಶ್ನೆಗೂ ಉತ್ತರ ಕೊಡೋದು ಕೂಡ ಸುಲಭ. ಬೆಂಗಳೂರಿನ ಅಕ್ಷಾಂಶ ರೇಖಾಂಶಗಳ ಬದಲು ಸನಿವೇಲ್ ನ ಅಕ್ಷಾಂಶ ರೇಖಾಂಶ ಗಳನ್ನು ಸ್ಟೆಲೇರಿಯಮ್ ಗೆ ಹಾಕಿದರೆ ಆಯಿತು. ಬೇರೆ ಬೇರೆ ಸ್ಥಳಗಳಿಂದ ನಮ್ಮ ಕಣ್ಣಿಗೆ ಕಾಣುವ ಆಕಾಶದ ನೋಟ ಬೇರೆ ಬೇರೆ ಅನ್ನೋದನ್ನ ಮನನ ಮಾಡಿಕೊಳ್ಳಬಹುದು. ಈ ತಂತ್ರಾಂಶಗಳಿಂದ ನಾವು ‘ಉತ್ತರ ಧ್ರುವದಿಂ ದಕ್ಷಿಣ ಧ್ರುವಕೂ’ ಪ್ರಪಂಚದ ಯಾವುದೇ ಮೂಲೆಯಲ್ಲಿದ್ದರೂ ನಾವಿರುವಲ್ಲಿಂದ ಆಕಾಶ ಹೇಗೆ ಕಾಣುತ್ತೆ ಅನ್ನುವುದನ್ನು ಸಲೀಸಾಗಿ ನೋಡಿಬಿಡಬಹುದು!

 

ಹಂಸಾನಂದಿ, ಹಾಸನದಲ್ಲಿ ಹುಟ್ಟಿ ಬೆಳೆದು ಎಲೆಕ್ಟ್ರಾನಿಕ್ಸ್ ಎಂಜಿನಿಯರಿಂಗ್ ವಿದ್ಯಾಭ್ಯಾಸ ಮಾಡಿದ ’ಹಂಸಾನಂದಿ’( ರಾಮಪ್ರಸಾದ್.ಕೆ.ವಿ), ಚೆನ್ನೈನಲ್ಲಿ ಮಾಸ್ಟರ್ಸ್ ಪದವಿ ಪಡೆದು, ಪುಣೆ, ಬೆಂಗಳೂರು ಮೊದಲಾದ ಕಡೆ ಕೆಲಸ ಮಾಡಿ ಹಲವು ವರ್ಷಗಳಿಂದ ಕ್ಯಾಲಿಫೋರ್ನಿಯಾದ ಸಿಲಿಕನ್ ವ್ಯಾಲಿಯಲ್ಲಿ ಇಂಟಿಗ್ರೇಟೆಡ್ ಚಿಪ್ ವಿನ್ಯಾಸಕರಾಗಿ ಕೆಲಸ ಮಾಡಿದ್ದು, ಈಗ ಪೋಗ್ರಾಮಬಲ್ ಲಾಜಿಕ್ ಕಂಪೆನಿಯೊಂದರಲ್ಲಿ ಉದ್ಯೋಗಿ. ಕನ್ನಡ, ಇಂಗ್ಲಿಷ್, ಹಿಂದಿ,ಮರಾಠಿ, ತಮಿಳು, ವಿಎಚ್‍ಡಿಎಲ್,ವೆರಿಲಾಗ್, ಸಿಸ್ಟಮ್ ವೆರಿಲಾಗ್, ಸಿಸ್ಟಮ್ ಸಿ ಹೀಗೆ ಹಲವು ಭಾಷೆಗಳಲ್ಲಿ ಮಾತಾಡಬಲ್ಲರು. ಉತ್ತರ ಕ್ಯಾಲಿಫೋರ್ನಿಯಾ ಕನ್ನಡಕೂಟದ ವಾರ್ಷಿಕ ಪತ್ರಿಕೆ ’ಸ್ವರ್ಣಸೇತು’ವಿನ ಸಂಪಾದಕ ಮಂಡಳಿಯಲ್ಲಿ ಕೆಲಸ ಮಾಡಿದ ಅನುಭವ. ಆಕಾಶದಲ್ಲಿ ನಡೆಯುವ ಆಸಕ್ತಿ ಮೂಡಿಸುವ ವಿದ್ಯಮಾನಗಳ ಬಗ್ಗೆ ಸರಳವಾದ ಕನ್ನಡದಲ್ಲಿ ಬರೆಯುವುದು ಮತ್ತು ತಮ್ಮ ಬ್ಲಾಗ್ ಗಳ ಓದುಗರಲ್ಲಿ ಆಕಾಶ ವೀಕ್ಷಣೆಯಲ್ಲಿ ಆಸಕ್ತಿ ಮೂಡಿಸುವುದು ಇವರಿಗೆ ಬಹಳ ಸಂತಸ ಕೊಡುವ ಸಂಗತಿಗಳು. ಸಂಸ್ಕೃತ ಸುಭಾಷಿತಗಳನ್ನು ಕನ್ನಡಿಸಿರುವ ಇವರ ಸಂಗ್ರಹ ’ಹಂಸನಾದ’ ೨೦೧೧ ರಲ್ಲಿ ಪ್ರಕಟವಾಗಿದೆ.

ಮುಂದೆ ಓದಿ

ಅಲೆ ೧೦ – ಗಿಂಪ್ – ಮುಕ್ತ ಚಿತ್ರ ಸಂಸ್ಕರಣಾ ತಂತ್ರಾಂಶ

ಪ್ರಕಟಿಸಿದ್ದು ದಿನಾಂಕ Aug 10, 2011 ವಿಭಾಗ 2011, ale | 0 ಪ್ರತಿಕ್ರಿಯೆಗಳು

ಉಚಿತ ಹಾಗು ಮುಕ್ತ ಆಕರ ತಂತ್ರಾಂಶವು ವ್ಯಾವಹಾರಿಕ(ಕಮರ್ಶಿಯಲ್) ತಂತ್ರಾಂಶದಷ್ಟು ಸಶಕ್ತವೆ? ಆಶ್ಚರ್ಯವೆನಿಸಿದರೂ ಇದು ಸತ್ಯ! Bind, Sendmail, ಅಥವ Perl ಇಲ್ಲದೆ ಇಂದಿನ ಅಂತರಜಾಲ(ಇಂಟರ್ನೆಟ್) ಕಾರ್ಯನಿರ್ವಹಿಸಲು ಸಾಧ್ಯವೆ ಇಲ್ಲ. ಲಿನಕ್ಸ್ ಈಗಾಗಲೆ ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರ ಹಾಗು ವ್ಯವಹಾರಗಳಲ್ಲಿ ಮಹತ್ತರ ಕೊಡುಗೆ ನೀಡಿದೆ. ಮೋಝಿಲ್ಲಾದ ಫೈರ್ಫಾಕ್ಸಿನಲ್ಲಿರುವ ಸೌಲಭ್ಯಗಳು ಹಾಗು ಅದರ ದೃಢತೆಯಿಂದಾಗಿ ದಿನದಿಂದ ದಿನಕ್ಕೆ ಪ್ರಖ್ಯಾತಗೊಳ್ಳುತ್ತಾ ಹೋಗುತ್ತಿದೆ. ಇಂತಹ ಉಪಯುಕ್ತವಾದ ಮುಕ್ತ ಹಾಗು ಉಚಿತವಾಗಿ ಜಾಗತಿಕವಾಗಿ ಎಲ್ಲೆಡೆಯಲ್ಲಿಯೂ ಸಹ ಲಭ್ಯವಿರುವ ತಂತ್ರಾಂಶ ಉಪಕರಣಗಳಲ್ಲಿ ಗಿಂಪ್ ಸಹ ಒಂದು.

ಗಿಂಪ್(GIMP ಅಥವ GNU Image Manipulation Program) ಚಿತ್ರಗಳನ್ನು ಸಂಸ್ಕರಿಸುವ, ಕುಶಲತೆಯಿಂದ ನಿರ್ವಹಿಸುವ, ಗಾತ್ರ ಹಾಗು ಆಕಾರವನ್ನು ಬದಲಾಯಿಸುವ ಒಂದು ತಂತ್ರಾಶವಾಗಿದೆ. ಸಂಪೂರ್ಣ ಉಚಿತ ತಂತ್ರಾಂಶವಾದ ಇದು ಬಹು ಪದರ, ಚಿತ್ರಗಳನ್ನು ಕತ್ತರಿಸುವ, ಅನೇಕ ಚಿತ್ರಗಳನ್ನು ಜೋಡಿಸುವ ಹಾಗು ವಿವಿಧ ಚಿತ್ರ ವಿನ್ಯಾಸಗಳ ನಡುವೆ ಪರಸ್ಪರ ರೂಪಾಂತರಿಸುವಂತಹ ಹತ್ತು ಹಲವು ಸೌಲಭ್ಯಗಳನ್ನು ಹೊಂದಿದೆ. ಅಂತರಜಾಲದಲ್ಲಿ ಬಳಸಲು ಬೇಕಾದ ಚಿತ್ರಗಳನ್ನು ಸಂಸ್ಕರಿಸಲು ಇದು ಯೋಗ್ಯವಾದ ತಂತ್ರಾಂಶವಾಗಿದೆ. ಗಿಂಪ್‌ ಅನ್ನು ದುಬಾರಿಯಾದಂತಹ ಆಡೋಬ್‌ನ ಫೋಟೋಶಾಪ್‌ನ ಒಂದು ಪ್ರತಿರೂಪವೆಂದು ಪರಿಗಣಿಸಲಾಗುತ್ತದೆ. ಫೋಟೊಶಾಪ್‌ಗೆ ಹೋಲಿಸಿದಲ್ಲಿ ಬೆರಳೆಣಿಕೆಯಷ್ಟು ನ್ಯೂನತೆಗಳನ್ನು ಗಿಂಪ್ ಹೊಂದಿದ್ದರೂ ಅದರಷ್ಟೆ ಸಶಕ್ತವಾದ ಯಾವುದೆ ಕಾರ್ಯವ್ಯವಸ್ಥೆಯಲ್ಲಿ ಬಳಸಬಹುದಾದಂತಹ ತಂತ್ರಾಂಶವಾಗಿದೆ.

ಇತಿಹಾಸ

೧೯೯೬ ರಲ್ಲಿ ಬರ್ಕಲಿಯ ಕ್ಯಾಲಿಫೋರ್ನಿಯ ವಿಶ್ವವಿದ್ಯಾನಿಲಯದ ವಿದ್ಯಾರ್ಥಿಗಳಾದ ಸ್ಪೆನ್ಸರ್ ಕಿಂಬಾಲ್ ಹಾಗು ಪೀಟರ್ ಮ್ಯಾಟಿಸ್ ಎಂಬವರಿಂದ ಜನರಲ್ ಇಮೇಜ್ ಮ್ಯಾನಿಪುಲೇಶನ್ ಪ್ರೊಗ್ರಾಮ್ ಎಂಬ ಹೆಸರಿನೊಂದಿಗೆ ಅಭಿವೃದ್ಧಿಯಾಯಿತು. ೧೯೯೭ರಲ್ಲಿ ಇದು GNU ಪರಿಯೋಜನೆಯ ಒಂದು ಭಾಗವಾಗಿ ಸೇರಿಸುವುದರ ಜೊತೆಗೆ ಅದರ ಹೆಸರನ್ನು GNU ಇಮೇಜ್ ಮ್ಯಾನಿಪುಲೇಶನ್ ಪ್ರೊಗ್ರಾಮ್ ಎಂದಾಗಿ ಬದಲಾಯಿಸಲಾಯಿತು. ಈಗ ಹೆಸರಾಂತ ಮುಕ್ತ ತಂತ್ರಾಂಶ(ಓಪನ್‌ಸೋರ್ಸ್) ಪರಿಯೋಜನೆಯಾದಂತಹ GNOMEನ ಒಂದು ಭಾಗವಾಗಿ ಸೇರ್ಪಡಿಸಿಕೊಂಡು ಅವಿರತವಾಗಿ ಪೋಷಿಸುತ್ತಾ ಹಾಗು ಅಭಿವೃದ್ಧಿಪಡಿಸುತ್ತಾ ಬರಲಾಗುತ್ತಿದೆ. ಇಂದಿನವರೆಗೆ ಸಾವಿರಾರು ಮಂದಿ ಇದನ್ನು ಉತ್ತಮಗೊಳಿಸುವಲ್ಲಿ ನೆರವಾಗಿದ್ದಾರೆ. ಗಿಂಪ್ ಅನ್ನು ಮೊಟ್ಟ ಮೊದಲು ಯುನಿಕ್ಸ್ ಹಾಗು ಗ್ನು/ಲಿನಕ್ಸ್ ಕಾರ್ಯವ್ಯವಸ್ಥೆಗಾಗಿ ತಯಾರಿಸಲಾಗಿದ್ದರೂ ಸಹ ೧೯೯೭ರ ಈಚೆಗೆ ಮೈಕ್ರೊಸಾಫ್ಟ್ ವಿಂಡೋಸ್ ಹಾಗು ಆಪಲ್‌ನ ಮ್ಯಾಕ್‌ ವ್ಯವಸ್ಥೆಗಳಿಗೂ ಸಹ ಹೊಂದಿಕೊಳ್ಳುವ ಆವೃತ್ತಿಯೂ ಸಹ ಹೊರ ಬಂದಿದೆ.

ನಿಮ್ಮ ಗಣಕಯಂತ್ರದಲ್ಲಿ ಗಿಂಪ್

ಗಿಂಪ್‌ ಅನ್ನು ಮೂಲತಃ ಯೂನಿಕ್ಸ್ ಹಾಗು ಲಿನಕ್ಸ್ ವ್ಯವಸ್ಥೆಗಾಗಿಯೆ ಸಿದ್ಧಪಡಿಸಲಾಗಿದ್ದರಿಂದ ಹೆಚ್ಚಿನ ಲಿನಕ್ಸ್ ಕಾರ್ಯವ್ಯವಸ್ಥೆಗಳಲ್ಲಿ ಗಿಂಪ್ ಅನ್ನು ಮೊದಲೆ ಅಡಕಗೊಳಿಸಲಾಗಿರುತ್ತದೆ. ಇಲ್ಲದೆ ಹೋದಲ್ಲಿ ಗಿಂಪ್‌ನ ಜಾಲತಾಣ ದಿಂದ(www.gimp.org) ನಕಲಿಳಿಸಿಕೊಳ್ಳಬಹುದಾಗಿದೆ. ವಿಂಡೋಸ್ ಅಥವ ಮ್ಯಾಕ್ ಗಣಕಗಳಿಗೆ ಹೊಂದಿಕೊಳ್ಳುವ ಆವೃತ್ತಿಗಳೂ ಈ ತಾಣದಲ್ಲಿ ಲಭ್ಯವಿದೆ. ಗಿಂಪ್‌ ಅನ್ನು ಜನರಲ್ ಪಬ್ಲಿಕ್ ಲೈಸೆನ್ಸಿನ(ಜಿಪಿಎಲ್) ಅಡಿಯಲ್ಲಿ ಉಚಿತವಾಗಿ ವಿತರಿಸಲಾಗುತ್ತಿದೆ.

ನೀವು ಯಾವುದೇ ಕಾರ್ಯವ್ಯವಸ್ಥೆಯನ್ನು ಬಳಸುತ್ತಿದ್ದರೂ ಸಹ ಮೊದಲ ಬಾರಿಗೆ ಗಿಂಪ್ ಅನ್ನು ಬಳಸುವಾಗ ನಿಮ್ಮ ಅಗತ್ಯಕ್ಕೆ ತಕ್ಕಂತೆ ಅದನ್ನು ಹೊಂದಿಸಿಕೊಳ್ಳಲು ತಾನಾಗಿಯೆ ಮಾರ್ಗದರ್ಶನವನ್ನು ನೀಡುತ್ತದೆ. ಅಂದರೆ ನಿಮ್ಮ ಚಿತ್ರಗಳನ್ನು ಹಾಗು ಉಪಕರಣಗಳನ್ನು ಉಳಿಸಲು ಕಡತಕೋಶಗಳನ್ನು(ಫೋಲ್ಡರ್) ನಿಯೋಜಿಸಲು, ಮೆಮೊರಿ ನಿರ್ವಹಣೆಯನ್ನು ಸರಿಹೊಂದಿಸಲು, ಅಗತ್ಯಬಿದ್ದರೆ ತೆರೆಯ ರೆಸಲ್ಯೂಶನ್ ಅನ್ನು ಬದಲಾಯಿಸಲು ಸೂಕ್ತವಾದ ಸಲಹೆಗಳನ್ನು ನೀಡುತ್ತದೆ. ನಿಮ್ಮ ಗಣಕದ ಸಿದ್ಧತೆಯ ಮೇಲೆ ಆಧರಿತವಾಗಿ ಪೂರ್ವನಿಯೋಜಿತ ಸಿದ್ಧತೆಗಳನ್ನೆ ಇರಿಸಿಕೊಳ್ಳುವಂತೆ ಗಿಂಪ್ ಸೂಚಿಸುತ್ತದೆ. ಕೇವಲ ವಿಶೇಷ ಸಂದರ್ಭದಲ್ಲಿ ಮಾತ್ರ ಇವುಗಳನ್ನು ಬದಲಾಯಿಸುವ ಅಗತ್ಯಬೀಳಬಹುದು.

ಬಳಸುವಿಕೆ

ಮುಖ್ಯ ಉಪಕರಣಪೆಟ್ಟಿಗೆ(ಟೂಲ್‌ಬಾಕ್ಸ್): (ಚಿತ್ರ.೧) ಮುಖ್ಯ ಉಪಕರಣಪೆಟ್ಟಿಗೆಯು ಗಿಂಪ್‌ನ ಹೃದಯಭಾಗವಾಗಿರುತ್ತದೆ. ಇದು ಉಪಕರಣಗಳನ್ನು ಆಯ್ಕೆ ಮಾಡಲು ಸೂಕ್ತವಾದಂತಹ ಚಿಹ್ನೆಗಳನ್ನು ಹೊಂದಿರುತ್ತದೆ. ಈ ಚಿಹ್ನೆಗಳು ಆಯಾಯ ಉಪಕರಣಗಳನ್ನು ಶಕ್ತಗೊಳಿಸುವ ಒತ್ತುಗುಂಡಿಗಳಾಗಿರುತ್ತವೆ. ಚಿತ್ರಗಳನ್ನು ಕುಶಲತೆಯಿಂದ ಸಂಸ್ಕರಿಸಲು ಈ ಉಪಕರಣಗಳು ಅತ್ಯಗತ್ಯ. ಉದಾಹರಣೆಗೆ, ಚಿತ್ರಗಳ ನಿರ್ದಿಷ್ಟ ಭಾಗಗಳನ್ನು ಆಯ್ಕೆ ಮಾಡಲು, ಬಣ್ಣಹಚ್ಚಲು, ಚಿತ್ರವನ್ನು ರೂಪಾಂತರಿಸಲು ಮುಂತಾದ ಕಾರ್ಯಗಳಿಗಾಗಿನ ಉಪಕರಣಗಳನ್ನು ಸೂಚಿಸುತ್ತವೆ. ಇವುಗಳ ಜೊತೆಗೆ ಇದರಲ್ಲಿ ಮುನ್ನಲೆ ಹಾಗು ಹಿನ್ನಲೆ ಬಣ್ಣಗಳು; ಕುಂಚಗಳು, ವಿನ್ಯಾಸ, ಗ್ರೇಡಿಯಂಟ್, ಹಾಗು ಸಕ್ರಿಯ ಚಿತ್ರದ ಒಂದು ಚಿಹ್ನೆಯು ಇರುತ್ತದೆ. ಇಷ್ಟೆ ಅಲ್ಲದೆ ಅಗತ್ಯ ಬಿದ್ದಲ್ಲಿ ಇನ್ನೂ ಹೆಚ್ಚಿನ ಅಂಶಗಳನ್ನೂ ಸಹ ಹಾಳೆಯ ರೂಪದಲ್ಲಿ ಸೇರಿಸಬಹುದಾಗಿದೆ ಅಥವ ಬೇಡವಾದಲ್ಲಿ ತೆಗೆದು ಹಾಕಬಹುದಾಗಿದೆ. ಈ ಉಪಕರಣಪೆಟ್ಟಿಗೆಯನ್ನು ಮುಚ್ಚಿದಲ್ಲಿ, ನೀವು ಸಂಪೂರ್ಣ ಗಿಂಪ್‌ನಿಂದ ಹೊರನಡೆದಂತಾಗುತ್ತದೆ.

ಉಪಕರಣ ಆಯ್ಕೆಗಳು: (ಚಿತ್ರ.೨) ಉಪಕರಣಪೆಟ್ಟಿಗೆಯ ಕೆಳಗೆ ಅಂಟಿಸಲಾಗಿರುವ ಉಪಕರಣ ಆಯ್ಕೆಯ ಸ್ಥಳವು ಪ್ರಸಕ್ತ ಆಯ್ಕೆ ಮಾಡಲಾದ ಉಪಕರಣದಲ್ಲಿ ಏನೆಲ್ಲಾ ಆಯ್ಕೆಗಳಿವೆ ಎಂದು ತೋರಿಸುತ್ತದೆ.

ಚಿತ್ರದ ವಿಂಡೊ: (ಚಿತ್ರ.೩) ಗಿಂಪ್‌ನಲ್ಲಿ ತೆರೆಯಲಾದ ಎಲ್ಲಾ ಚಿತ್ರಗಳು ಒಂದು ಪ್ರತ್ಯೇಕ ವಿಂಡೊದಲ್ಲಿ ತೆರೆಯಲ್ಪಡುತ್ತದೆ. ಒಂದೆ ಬಾರಿಗೆ ಹಲವು ಚಿತ್ರಗಳನ್ನು ತೆರೆಯಬಹುದು. ಈ ಚಿತ್ರ ವಿಂಡೊದಲ್ಲಿ ಗಿಂಪ್‌ ಮುಖ್ಯ ಆದೇಶಗಳು ಪ್ರಮುಖ ಮೆನುಗಳು (File, Edit, Select…) ಇರುತ್ತವೆ.

ಪದರಗಳು, ಚಾನಲ್‌ಗಳು, ಮಾರ್ಗಗಳು: (ಚಿತ್ರ.೪) ಇವುಗಳು ಪ್ರತ್ಯೇಕ ಹಾಳೆಯಂತಿರುತ್ತವೆ(ಟ್ಯಾಬ್) ಎನ್ನುವುದನ್ನು ಗಮನಿಸಿ. ಬಲ ಮೂಲೆಯಲ್ಲಿ ಸಣ್ಣ ತ್ರಿಕೋನದಂತಿರುವ ಚಿಹ್ನೆಯ ಮೇಲೆ ಕ್ಲಿಕ್‌ ಮಾಡಿ ಈ ಸ್ಥಳಕ್ಕೆ ನಿಮಗೆ ಬೇಕಾದ ಸವಲತ್ತನ್ನು ಸೇರಿಸಿಕೊಳ್ಳಬಹುದಾಗಿದೆ. ಇಲ್ಲಿ ತೋರಿಸಲಾದ ಚಿತ್ರದಲ್ಲಿ ಪದರದ ಹಾಳೆಯನ್ನು ತೋರಿಸಲಾಗಿದೆ. ಇದು ಪ್ರಸಕ್ತ ಸಂಸ್ಕರಿಸಲಾಗುತ್ತಿರುವ ಚಿತ್ರದಲ್ಲಿನ ಪದರಗಳನ್ನು ತೋರಿಸುತ್ತದೆ ಹಾಗು ಈ ಪದರಗಳನ್ನು ಪ್ರತ್ಯೇಕವಾಗಿ ಸಂಸ್ಕರಿಸಲು ಅನುವು ಮಾಡಿಕೊಡುತ್ತದೆ. ಪದರಗಳನ್ನು ಬಳಸಿಕೊಳ್ಳದೆ ಇದ್ದಲ್ಲಿ ಕೇವಲ ಮೂಲಭೂತ ಸಂಸ್ಕರಣೆಯಷ್ಟೆ ಸಾಧ್ಯ. ಕೊಂಚ ಪರಿಣಿತಿಹೊಂದಿದ ಗಿಂಪ್‌ ಬಳಕೆದಾರರಿಗೂ ಸಹ ಪದರಗಳ ಬಳಕೆ ಅನಿವಾರ್ಯವಾಗಿರುತ್ತದೆ.

ಕುಂಚಗಳು/ವಿನ್ಯಾಸಗಳು/ಗ್ರೇಡಿಯಂಟ್‌ಗಳು: (ಚಿತ್ರ.೫) ಪದರದ ಸಂವಾದಚೌಕದ (ಡೈಲಾಗ್‌) ಕೆಳಗೆ ಇರಿಸಲಾದ ಇದು ಕುಂಚಗಳನ್ನು. ವಿನ್ಯಾಸಗಳನ್ನು ಹಾಗು ಗ್ರೇಡಿಯಂಟ್‌ಗಳನ್ನು ನಿರ್ವಹಿಸಲು ಬಳಸಬಹುದಾಗಿದೆ.

ಕನ್ನಡದಲ್ಲಿ ಗಿಂಪ್!

ಗಿಂಪ್ ಅನ್ನು ಇತ್ತೀಚಿಗೆ ಕನ್ನಡಕ್ಕೆ ತರುವ ಕಾರ್ಯವೂ ನಡೆಯುತ್ತಿದೆ. ಇನ್ನೂ ಸಹ ಸಂಪೂರ್ಣವಾಗಿ ಕನ್ನಡದ ಅವತರಣಿಕೆಯು ಲಭ್ಯವಿರದೆ ಇದ್ದರೂ ಸಹ ಸದ್ಯದಲ್ಲೆ ಅದು ಸಹ ಹೊರಬರುವ ನಿರೀಕ್ಷೆಯಿದೆ. ಇದರ ಒಂದು ತೆರೆಚಿತ್ರವನ್ನು ಇಲ್ಲಿ ಕಾಣಬಹುದು.

ಇದು ಗಿಂಪ್‌ನ ಒಂದು ಕಿರು ಪರಿಚಯವಷ್ಟೆ. ಪ್ರಾಯೋಗಿಕವಾಗಿ ಗಿಂಪ್‌ ಅನ್ನು ಕೈಯಾರೆ ಬಳಸುವುದರಿಂದ ಇದರಲ್ಲಿ ಲಭ್ಯವಿರುವ ಹಲವಾರು ಸೌಕರ್ಯಗಳನ್ನು ತಿಳಿದುಕೊಳ್ಳಬಹುದು. ಅಷ್ಟೆ ಅಲ್ಲದೆ ಹೆಚ್ಚಿನ ನೆರವಿಗಾಗಿ ಗಿಂಪ್‌ನ ಜಾಲತಾಣದಲ್ಲಿ ಲಭ್ಯವಿರುವ (http://gimp.org) ಚಿತ್ರಸಹಿತವಾದ ಕೈಪಿಡಿಯನ್ನೂ ಸಹ ನೋಡಬಹುದು. ಮಾರುಕಟ್ಟೆಯಲ್ಲಿ ಲಭ್ಯವಿರುವ ಹಣತೆತ್ತು ಪಡೆಯಬಹುದಾದಂತಹ ಯಾವುದೆ ಪ್ರೊಪ್ರೈಟರಿ ಚಿತ್ರ ಸಂಸ್ಕರಣಾ ತಂತ್ರಾಂಶಕ್ಕಿಂತ ಗಿಂಪ್‌ ಉತ್ತಮವಾಗಿದೆ ಅಥವ ಅವುಗಳು ನಿರ್ವಹಿಸುವ ಎಲ್ಲಾ ಕೆಲಸಗಳನ್ನು ಗಿಂಪ್ ಮಾಡುತ್ತದೆ ಎಂದೇನಲ್ಲ. ಇದೂ ಸಹ ಕೆಲವು ಋಣಾತ್ಮಕ ಅಂಶಗಳನ್ನು ಹೊಂದಿದೆ, ಆದರೆ ಅವುಗಳಿಂದ ಸಾಧ್ಯವಿರುವ ಬಹುಮಟ್ಟಿನ ಕಾರ್ಯಗಳನ್ನು ಅವುಗಳಷ್ಟೆ ಯಶಸ್ವಿಯಾಗಿ ಉಚಿತವಾಗಿ ದೊರೆಯುವ ಗಿಂಪ್ ಮಾಡಬಲ್ಲದು ಎಂದಷ್ಟೆ ಹೇಳಬಹುದು. ಇದರ ಪ್ರಖ್ಯಾತಿಯನ್ನು ನೋಡುತ್ತಿದ್ದಲ್ಲಿ ಭವಿಷ್ಯದಲ್ಲಿ ಇದು ಇನ್ನಷ್ಟು ಉತ್ತಮಗೊಳ್ಳುವುದರಲ್ಲಿ ಸಂದೇಹವೆ ಇಲ್ಲ.

ಹೆಚ್ಚಿನ ಮಾಹಿತಿಗಾಗಿ:

http://docs.gimp.org/2.6/en/index.html
http://en.wikipedia.org/wiki/The_GIMP
Grokking the GIMP by Carey Bunks

 

ಶಂಕರ್ ಪ್ರಸಾದ್. ಎಮ್ ವಿ ಹುಟ್ಟು ಮತ್ತು ಬಾಲ್ಯ ಶೃಂಗೇರಿ ಸಮೀಪದ ತುಂಗೆಯ ತಟದಲ್ಲಿರುವ ಪುಟ್ಟ ಹಳ್ಳಿಯಲ್ಲಿ. ಓದಿದ್ದು ವಸ್ತುವಿಜ್ಞಾನದಲ್ಲಿ ಎಂಎಸ್ಸಿ. ಬೆಂಗಳೂರಿನ ಎನ್‌ಎಎಲ್‌ನ ವಸ್ತುವಿಜ್ಞಾನ ವಿಭಾಗದಲ್ಲಿ ಒಂದಿಷ್ಟು ವರ್ಷ ವಾಸ ಸಹಾಯಕ ಸಂಶೋಧಕನಾಗಿ ಕೆಲಸ ಮಾಡಿದೆ. ಜೊತೆಗೆ ಕನ್ನಡದ ವಾರ್ಷಿಕ ವಿಜ್ಞಾನ ಪತ್ರಿಕೆಯಾದ ಕಣಾದ ಪತ್ರಿಕೆಯ ಸಂಪಾದಕ ಮಂಡಳಿಯಲ್ಲಿ ಕೆಲಸ ಮಾಡಿದ ಅನುಭವ. ನಂತರ ಮುಕ್ತ ತಂತ್ರಾಂಶಗಳೆಡೆಗೆ ಒಲವು. ಪ್ರಸಕ್ತ ಮುಕ್ತ ತಂತ್ರಾಂಶವನ್ನು ಒದಗಿಸುವ ಸಂಸ್ಥೆಯಲ್ಲಿ ಅನುವಾದಕನಾಗಿ ಪುಣೆಯಲ್ಲಿ ಕೆಲಸ ಮಾಡುತ್ತಿದ್ದೇನೆ. ಫೈರ್ಫಾಕ್ಸ್, ಗ್ನೋಮ್, ಕೆಡಿಇ, ಫೆಡೋರ, ಓಪನ್ಆಫೀಸ್ ಮುಂತಾದ ಹೆಚ್ಚಿನ ಎಲ್ಲಾ ಮುಕ್ತತಂತ್ರಾಂಶಗಳ ಕನ್ನಡ ಅನುವಾದದಲ್ಲಿ ಕೈಜೋಡಿಸಿದ್ದೇನೆ. ಈ ಅನುವಾದಗಳಲ್ಲಿ ಶಿಷ್ಟತೆಯನ್ನು ತರುವುದು ಮುಂದಿನ ಗುರಿ. ವಿಜ್ಞಾನ ಹಾಗು ತಂತ್ರಜ್ಞಾನಕ್ಕೆ ಸಂಬಂಧಿಸಿದ ಲೇಖನಗಳನ್ನೂ ಸಹ ಬರೆದಿದ್ದೇನೆ. ಸಾಹಿತ್ಯ ಹಾಗು ಕ್ರಿಕೆಟ್‌ನೆಡೆಗೆ ಅಪರಿಮಿತ ಆಸಕ್ತಿ, ಒಂದಿಷ್ಟು ಸಣ್ಣ ಪುಟ್ಟ ಕವನಗಳನ್ನೂ ಸಹ ಗೀಚಿದ್ದೇನೆ.

ಮುಂದೆ ಓದಿ

ಅಲೆ ೯ – ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶ ಮತ್ತು ನಾವು

ಪ್ರಕಟಿಸಿದ್ದು ದಿನಾಂಕ Aug 9, 2011 ವಿಭಾಗ 2011, ale | 0 ಪ್ರತಿಕ್ರಿಯೆಗಳು

ಕ್ಲಿಕ್ ಕ್ಲಿಕ್ – ಮೌಸ್ ಜೊತೆಗೆ ಆಟ ಆಡುತ್ತಾ ಕಂಪ್ಯೂಟರಿನ ಪರದೆಯ ಮೇಲೆ ಚಿತ್ರವಿಚಿತ್ರಗಳನ್ನು ಸೃಷ್ಟಿಸುವುದು ಇತ್ಯಾದಿ ಸಾಮಾನ್ಯನಿಗೂ ಅತಿಸಾಮಾನ್ಯ ಅನಿಸತೊಡಗಿದೆ. ಎಲ್ಲರಿಗೂ ತಾವು ಕೈನಲ್ಲಿಡಿದಿರುವ ಒಂದು ಸಣ್ಣ ಫೋನ್ ಕೂಡ ಕಂಪ್ಯೂಟರ್ ಎಂಬುದರ ಅರಿವು ಇಲ್ಲದಿಲ್ಲ. ಕಂಪ್ಯೂಟರ್ ಎಂಬ ಈ ಯಂತ್ರ ಹುಟ್ಟಿದ್ದು, ಬೆಳೆದು ಬಂದ ದಾರಿ, ಅದು ಕೆಲಸ ಮಾಡುವ ಧಾಟಿ, ಬೆಳೆದು ಬಂದ ಹಾದಿ ಹೇಗೆ? ಯಾರು? ಮುಂದೆ? ಹೀಗೆ ಹತ್ತು ಹಲವಾರು ಪ್ರಶ್ನೆಗಳನ್ನು ನಮಗೆ ನಾವು ಕೇಳುತ್ತಾ ಹೋದರೆ ರೋಚಕ ಅನ್ವೇಷಣೆಗಳ/ಆವಿಷ್ಕಾರಗಳ ಕಥಾಬಂಡಾರ ನಮ್ಮ ಮುಂದೆ ಸರಿಯುತ್ತಾ ಹೋಗುತ್ತದೆ.

ಮುಕ್ತ ಮತ್ತು ಸ್ವತಂತ್ರ ತಂತ್ರಾಂಶ ಹುಟ್ಟಿ ಬಂದ ಹಾದಿ ಕೂಡ ಅಷ್ಟೇ ರೋಚಕ. ರಿಚರ್ಡ್ ಸಾಲ್‌ಮನ್ ಎಂಬಾಂತ ತನ್ನ ಕಂಪ್ಯೂಟರ್‌ಗೆ ಎಂದು ಬರೆದುಕೊಂಡ ತಂತ್ರಾಂಶವನ್ನು ತನ್ನ ಗೆಳೆಯರೊಂದಿಗೆ ಮುಕ್ತವಾಗಿ ಹಂಚಿಕೊಂಡ. ತನ್ನ ಬಿಡುವಿನ ವೇಳೆಯಲ್ಲಿ ಮನೆಯ ಕಂಪ್ಯೂಟರ್‌ನಲ್ಲಿ ಬರೆದ ತನ್ನ ತಂತ್ರಾಂಶ ಇತರ ಗೆಳೆಯರಿಗೆ ಬೇಕಾದೀತು, ಅವರು ಅದನ್ನು ಉಪಯೋಗಿಸಿ ಆತನಿಗೆ ತಮ್ಮ ಅನುಭವವನ್ನು ಹಂಚಿಕೊಂಡಾರು ಎಂಬುದು ಆತನ ಆಶಯ. ಇದನ್ನು ಕಂಡ ಆತನ ಕಂಪೆನಿ ಬೆಲ್ ಲ್ಯಾಬ್ಸ್ ಆತನನ್ನು ಕರೆದು, ನೀನು ಈ ಕಂಪೆನಿಯ ಕೆಲಸಗಾರನಾಗಿದ್ದೀಯೆ, ನೀನು ಬರೆದ ಎಲ್ಲ ತಂತ್ರಾಂಶಗಳು ಕಂಪೆನಿಗೆ ಸೇರಿದವಾಗಿದ್ದು, ಅದನ್ನು ನೀನು ಮನ:ಬಂದಂತೆ ಬೇರೆಯವರೊಡನೆ ಹಂಚಿಕೊಳ್ಳುವ ಹಾಗಿಲ್ಲ ಎಂದಾಗ ಅವನಿಗೆ ಆಶ್ಚರ್ಯ. ತಾನು ಕಂಪೆನಿಯಲ್ಲಿರುವುದರಿಂದ ತನ್ನ ಬಿಡುವಿನ ವೇಳೆಯಲ್ಲಿ ತಾನು ಬರೆದ ತಂತ್ರಾಂಶ ಹೇಗೆ ಕಂಪೆನಿಯದ್ದಾಗುತ್ತದೆ? ತನಗೆ ನಾನು ಬರೆದ ತಂತ್ರಾಂಶದ ಮೇಲೆ ಯಾವುದೇ ಹಕ್ಕು, ಸ್ವಾತಂತ್ರ್ಯ ಇಲ್ಲವೇ? ಏಕಿರಬಾರದು ಎಂದು ಯೋಚಿಸಿ ಕಂಪೆನಿಯಿಂದ ಹೊರನೆಡೆದು ೧೯೮೩ ರಲ್ಲಿ ಮುಕ್ತ ತಂತ್ರಾಂಶದ ಆಂದೋಲನವನ್ನೇ ಪ್ರಾರಂಭಿಸಿದ.

ಕಂಪ್ಯೂಟರ್ ಇತ್ಯಾದಿಗಳನ್ನು ಖರೀದಿಸಿದ ಜನರು, ಅದನ್ನು ನೆಡೆಸಲು ಬೇಕಿರುವ ತಂತ್ರಾಂಶಗಳನ್ನು ತಾವಾಗಿಯೇ ಅಭಿವೃದ್ದಿಪಡಿಸಿ, ಅದನ್ನು ಬೇರೆಯವರೊಡನೆ ಹಂಚಿಕೊಂಡು, ಇತರರೂ ಅಷ್ಟೇ ಸ್ವತಂತ್ರವಾಗಿ ತಮಗೆ ದೊರೆತ ಹಾಗೂ ತಾವೇ ಅಭಿವೃದ್ದಿ ಪಡಿಸಿದ ತಂತ್ರಾಂಶವನ್ನು ಮತ್ತೆ ಇನ್ನಿತರರಿಗೂ ಹಂಚಿಕೊಳ್ಳುವ, ಒಂದು ಡಿಸ್ಕ್‌ ನಿಂದ ಇನ್ನೊಂದಕ್ಕೆ ಅದನ್ನು ಕಾಪಿ ಮಾಡುವ ಇತ್ಯಾದಿ ಸ್ವಾತಂತ್ರ್ಯಗಳನ್ನು ‘ಜನರಲ್ ಪಬ್ಲಿಕ್ ಲೈಸೆನ್ಸ್ GPL’ ಎಂಬ ಪರವಾನಗಿಯೊಂದಿಗೆ ಒದಗಿಸುವುದೇ ‘ಮುಕ್ತ ತಂತ್ರಾಂಶ ಆಂದೋಲನದ’ ಮುಖ್ಯ ಉದ್ದೇಶವಾಗಿತ್ತು. ಇದರ ಒಂದು ಭಾಗವಾಗಿ ಪ್ರಾರಂಭಗೊಂದ ಗ್ನು ಯೋಜನೆ ಕಂಪ್ಯೂಟರ್ ತಂತ್ರಾಂಶಗಳ ಅಭಿವೃದ್ದಿಗೆ ಬೇಕಾದ ಮೂಲ ತಂತ್ರಾಂಶಗಳನ್ನು ಸಮಾನ ಮನಸ್ಕ ಜನರ ಸಹಾಯದಿಂದ ಅಭಿವೃದ್ದಿ ಪಡಿಸುವಲ್ಲಿ ಹೆಜ್ಜೆ ಇಟ್ಟಿತು. ಇದೇ ಜನರ ಗುಂಪು ಮುಂದೆ ದೊಡ್ಡ ಸಮುದಾಯವಾಗಿ ಬೆಳಯತೊಡಗಿತು. ಮುಂದೆ ಲಿನಸ್ ಟೋರ್ವಾಲ್ಡ್ ಇದೇ ತಂತ್ರಾಂಶಗಳನ್ನು ಬಳಸಿ ಬರೆದ ಲಿನಕ್ಸ್ ಕರ್ನೆಲ್ ಮುಕ್ತ ಆಪರೇಟಿಂಗ್ ಸಿಸ್ಟಂ ಒಂದು ಜನ್ಮತಾಳುವಂತೆ ಮಾಡಿತು. ಲಿನಕ್ಸ್ ಟೋರ್ವಾಲ್ಡ್ ಲಿನಕ್ಸ್ ಕರ್ನೆಲ್ ಬರೆದದ್ದೂ ಕೂಡ ಅವನ ಕಾಲೇಜಿನಲ್ಲಿದ್ದ ಕಂಪ್ಯೂಟರ್‌ಗಳನ್ನು ಸುಲಭವಾಗಿ ಒಂದು ಕಡೆ ಕುಳಿತು ನೆಟವರ್ಕ್ ಮೂಲಕ ಸಂಭಾಳಿಸುವುದಕ್ಕೊಸ್ಕರ. ಅಂದರೆ ಒಂದು ಹವ್ಯಾಸವಾಗಿ ರೋಡಿಸಿಕೊಂಡು ಬಂದ ತಂತ್ರಾಂಶ ಅಭಿವೃದ್ದಿ ಕಾರ್ಯ ಹೀಗೆ ಹತ್ತು ಹಲವು ತಂತ್ರಾಂಶಗಳ ಆವಿಷ್ಕಾರಕ್ಕೆ ನಾಂದಿ ಹಾಡಿತು… ಇತಿಹಾಸ ರಚನೆಗೆ ಮೂಲ ಕಾರಣವಾಯಿತು.

ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶಗಳು ನಾವು ಖರೀದಿಸಿದ ಕಂಪ್ಯೂಟರ್ ಇತ್ಯಾದಿ ಹಾರ್ಡ್ವೇರ್‌ಗಳನ್ನು ನೆಡೆಸಲು ಬಳಸುವ ತಂತ್ರಾಂಶಗಳನ್ನು ಮುಕ್ತವಾಗಿ ಹಂಚಿಕೊಳ್ಳುವುದರ ಜೊತೆಗೆ, ಬಳಕೆದಾರನಿಗೆ ಆಯ್ಕೆ, ಅಭಿವೃದ್ದಿ, ಹಂಚಿಕೆ ಹೀಗೆ ಅನೇಕ ಸ್ವಾತಂತ್ರ್ಯಗಳನ್ನು ಅವನಿಗೆ ನೀಡುತ್ತವೆ. ಖಾಸಗಿ ಕಂಪೆನಿಯೊಂದರ ತಂತ್ರಾಂಶದ ಜೊತೆ ತನ್ನಂತಾನೇ ಬಂದಿತನಾವುದುದನ್ನು ತಪ್ಪಿಸುತ್ತದೆ. ಇದು ಖಾಸಗಿ ಕಂಪೆನಿ ಮುಚ್ಚುವುದರಿಂದ, ಅಥವಾ ತಂತ್ರಾಂಶ ಅಭಿವೃದ್ದಿಹೊಂದಿದಂತೆಲ್ಲಾ, ಮತ್ತೆ ಹೊಸ ತಂತ್ರಾಂಶ ಕೊಳ್ಳುವ ನಷ್ಟದಿಂದ ಬಳಕೆದಾರರನ್ನು ಸಂರಕ್ಷಿಸುತ್ತದೆ. ಇತ್ತೀಚಿನ ಗ್ನು/ಲಿನಕ್ಸ್ ತಂತ್ರಾಂಶ ಕೂಡ ಹಳೆಯ ಡಾಟ್ ಮ್ಯಾಟ್ರಿಕ್ಸ್ ಪ್ರಿಂಟರ್ ಅನ್ನು ಸುಲಭವಾಗಿ ಕಾರ್ಯಾಚರಣೆಗೆ ಒಳಪಡಿಸಬಲ್ಲದು. ಅಭಿವೃದ್ದಿ ಹೊಂದುತ್ತಿರುವ ರಾಷ್ಟ್ರವಾದ ಭಾರತಕ್ಕೆ ತನ್ನ ಸರ್ಕಾರೀ ಸೇವೆಗೆ ಬಳಸಿಕೊಳ್ಳುತ್ತಿರುವ ಕಂಪ್ಯೂಟರುಗಳ ನಿರ್ವಹಣೆಯನು ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶಗಳಲ್ಲಿ ಮಾಡಿದ್ದೇ ಆದಲ್ಲಿ, ಕೋಟಿಗಟ್ಟಲೆ ಹಣ ಹೊರ ದೇಶಗಳ ಖಾಸಗಿ ಕಂಪೆನಿಗಳ ಕಿಸೆ ತುಂಬುವುದು ತಪ್ಪುತ್ತದೆ. ನಮ್ಮ ಟ್ಯಾಕ್ಸ್ ಹಣ ದೇಶದ ಅಭಿವೃದ್ದಿಗೆ ಲಭ್ಯವಿರುತ್ತದೆ. ಈ ನಿಟ್ಟಿನಲ್ಲಿ ರಷ್ಯಾ, ಚೀನಾ ಇತರೆ ದೇಶಗಳು ತಮ್ಮದೇ ಗ್ನು/ಲಿನಕ್ಸ್ ಆಪರೇಟಿಂಗ್ ಸಿಸ್ಟಂಗಳನ್ನು ದೇಶದ ಕಂಪ್ಯೂಟರೀಕರಣದಲ್ಲಿ ಬಳಸಿಕೊಂಡು ಮೊದಲ ಹೆಜ್ಜೆ ಇಟ್ಟಿವೆ. ನಮ್ಮಲ್ಲಿನ್ನೂ ಆ ಕಾರ್ಯ ಕುಂಠಿತವೇಗದಲ್ಲಿ ನೆಡೆದಿದೆ.

ಯಾವುದೇ ಒಂದು ತಂತ್ರಾಂಶಕ್ಕೆ ಒಗ್ಗಿಕೊಳ್ಳುವುದು ನಾವದನ್ನು ಉಪಯೋಗಿಸುವುದರ ಮೇಲೆ ಅವಲಂಬಿತವಾಗಿದೆ. ನಮ್ಮ ಪಕ್ಕದಲ್ಲಿ ಅದನ್ನು ಅರಿತವರು ದೊರೆತರೆ ಯಾವುದನ್ನೂ ಕಲಿಯುವುದು ನಮಗೆ ಸುಲಭಸಾಧ್ಯ. ಜೊತೆಗೆ ಶಾಲಾಕಾಲೇಜುಗಳಲ್ಲಿ ಭೋದನೆಗೆ ಅಳವಡಿಸಿಕೊಂಡಲ್ಲಿ, ಮುಂದೆ ಯಾವುದೇ ಕೆಲಸಕ್ಕೆ ಬೇಕಾದ ನುರಿತ ಕೆಲಸಗಾರರು ಲಭ್ಯರಿರುತ್ತಾರೆ.

ಶಾಲಾಕಾಲೇಜುಗಳ ಹೊರನಿಂತು ನೋಡಿದರೂ ಇಂದಿನ ಯುವ ಪೀಳಿಗೆಗೆ ಪ್ರಾಯೋಗಿಕವಾಗಿ ಹೊಸತನ್ನು ಕಲಿಯುವ, ಹೊಸತನ್ನು ಅಭಿವೃದ್ದಿ ಪಡಿಸುವ ವಿಪುಲ ಅವಕಾಶಗಳಿವೆ. ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶಗಳ ಬೆಳವಣಿಗೆಗಳನ್ನು ಗಮನಿಸಿದಾಗ ನಮ್ಮ ಸಮಾಜಕ್ಕೆ ಬೇಕಾದ ತಂತ್ರಾಂಶ ಇತ್ಯಾದಿಗಳನ್ನು ಅಭಿವೃದ್ದಿಪಡಿಸಲು ನಮ್ಮ ಯುವಕ ಯುವತಿಯರು ಮುಂದಾಗಿ, ಈಗಾಗಲೇ ಲಭ್ಯವಿರುವ ಮಾಹಿತಿಗಳನ್ನು ಇಂಟರ್ನೆಟ್ ಮೂಲಕ ಪಡೆದು, ಮುಕ್ತ ತಂತ್ರಾಂಶ ಸಮುದಾಯಗಳತ್ತ ಮುಖಮಾಡಿ ಸಮಾನಮನಸ್ಕರ ಜೊತೆಗೂಡಿ ಕೆಲಸ ಮಾಡಬಹುದಾಗಿದೆ. ಇದರಿಂದ ಸ್ವಾವಲಂಬನೆ ದೊರೆಯುವುದಲ್ಲದೇ, ನಮ್ಮದೇ ತಂತ್ರಾಂಶಗಳನ್ನು ಅಭಿವೃದ್ದಿಪಡಿಸಿಕೊಂಡು ಸಮಾಜವನ್ನೂ ಬಲಪಡಿಸಿದ ಹೆಮ್ಮೆ ನಮ್ಮದಾಗುತ್ತದೆ. ಗೂಗಲ್ ಕಂಪೆನಿ ಪ್ರತಿವರ್ಷ ‘ಗೂಗಲ್ ಸಮ್ಮರ್ ಆಫ್ ಕೋಡ್’ ಎಂಬ ಯೋಜನೆಯ ಮೂಲಕ ತಾಂತ್ರಿಕ ಪರಿಣಿತಿ ಹೊಂದಿದ, ಹೊಂದಿಲಿಚ್ಚಿಸುವ ಅನೇಕರಿಗೆ ಮುಕ್ತ ಮತ್ತು ಸ್ವತಂತ್ರ ತಂತ್ರಾಂಶಗಳ ಮೇಲೆ ಕೆಲಸಮಾಡಲು ಅವಕಾಶ ಮಾಡಿಕೊಡುತ್ತದೆ. ಮುಖ್ಯವಾಗಿ ವಿಧ್ಯಾರ್ಥಿಗಳನ್ನು ಉದ್ದೇಶವಾಗಿಟ್ಟಿಕೊಂಡಿರುವ ಇಂತಹ ಯೋಜನಯ ಬಗ್ಗೆ ಕಾಲೇಜು ವಿಧ್ಯಾರ್ಥಿಗಳು ತಿಳಿಯುವುದು ಒಳಿತು.

ಮುಕ್ತ ತಂತ್ರಾಂಶಗಳು ಕೆಲವೊಮ್ಮೆ ಹವ್ಯಾಸಕ್ಕೆಂದು ಬರೆದರೂ, ನಂತರ ಮಿಲಿಯನ್‌ಗಟ್ಟಲೆ ಹಣವನ್ನು ದುಡಿಯುವ ಸಂಸ್ಥೆಗಳನ್ನು ಹುಟ್ಟುಹಾಕುವಲ್ಲಿ ನೆರವಾದವು. ಅನೇಕರಿಗೆ ಉದ್ಯೋಗಾವಕಾಶಗಳನ್ನೂ ಕಲ್ಪಿಸಿಕೊಟ್ಟವು.

ಜೊತೆಗೆ ‘Free Culture’ ಅಥವಾ ‘ಮುಕ್ತ ಪರಂಪರೆ’ಯನ್ನು ಪಸರಿಸಿದ ಈ ಆಂದೋಲನ ಇಂದು ಮತ್ತು ನಾಳೆಗೆ ಬೇಕಿರುವ ಜ್ಞಾನ ಬಂಡಾರವನ್ನು ನಮ್ಮ ಮುಂದೆ ಇಟ್ಟಿದೆ. Free Culture ಬಗ್ಗೆ ಹೆಚ್ಚು ತಿಳಿಯಲು ಲಾರೆನ್ಸ್ ಲೆಸ್ಸಿಗ್ ಬರೆದ ಈ ಪುಸ್ತಕ ಓದಿ. ಇದು ಮುಕ್ತವಾಗಿ ನಿಮಗೆ ಲಭ್ಯವಿದೆ.

ಸರ್ಕಾರಿ ಕಾರ್ಯತಂತ್ರವನ್ನು ನೆಡೆಸಲು, ಸಾಮಾಜಿಕ ಚಟುವಟಿಕೆಗಳನ್ನು ನೆಡೆಸುವ ಸಂಘ ಸಂಸ್ಥೆಗಳು, ಶಿಕ್ಷಣ ಸಂಸ್ಥೆಗಳು, ಪತ್ರಿಕೋದ್ಯಮ, ಖಾಸಗಿ ಹಾಗೂ ಸರ್ಕಾರೀ ಸಂಘಸಂಸ್ಥೆಗಳು, ಸಾರ್ವಜನಿಕರು ಇಂದು ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶಗಳ ಮೊರೆ ಹೋಗಿ ದೈನಂದಿನ ಕೆಲಸ ಕಾರ್ಯಗಳಿಗೆ ಬೇಕಿರುವ ತಂತ್ರಾಂಶಗಳನ್ನು ಪಡೆಯಬಹುದು. ಲಭ್ಯವಿಲ್ಲದಲ್ಲಿ ಸಮುದಾಯವನ್ನು ಸಂಪರ್ಕಿಸಲು ಪ್ರಯತ್ನಿಸಿದಲ್ಲಿ ಉತ್ತರ ಸಿಗುವುದು ಖಾತ್ರಿ. ಇದಕ್ಕೆ ಉದಾಹರಣೆಗಳನೇಕ ನಮ್ಮ ಮುಂದಿವೆ.
ಕರ್ನಾಟಕದಲ್ಲಿ ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶದ ಅರಿವನ್ನು ಹೆಚ್ಚಿಸುವ, ಬಳಕೆ, ಅನುಸ್ಥಾಪನೆ, ಇತ್ಯಾದಿಗಳ ಬಗ್ಗೆ ಅರಿವನ್ನು ಹಂಚಿಕೊಳ್ಳುವ ಕೆಲಸ ಹೆಚ್ಚಬೇಕಿದೆ. ಸರಕಾರದ ಮಟ್ಟದಲ್ಲಿ ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶದ ಅವಲಂಬನೆಯ ಬಗ್ಗೆ ಕಾರ್ಯೋನ್ಮುಕವಾಗಬೇಕಿದೆ. ಕನ್ನಡ ಟೈಪಿಸುವುದು, ಓದುವುದು ಮಾತ್ರವಲ್ಲದೇ ಇತರೆ ತಂತ್ರಾಂಶಗಳನ್ನು ತನ್ನ ಸರ್ಕಾರೀ ಕೆಲಸಗಳಿಗೆ ತಾನೇ ಅಭಿವೃದ್ದಿ ಪಡಿಸಿಕೊಳ್ಳುತ್ತಾ, ಉದ್ಯೋಗಾವಕಾಶಗಳನ್ನು ಹೆಚ್ಚಿಸುವುದು, ಸರ್ಕಾರೀ ಶಾಲೆ ಇತ್ಯಾದಿಗಳಲ್ಲಿ ಮುಕ್ತ ತಂತ್ರಾಂಶವನ್ನು ವಿತರಿಸುವುದಲ್ಲದೇ, ಅದನ್ನು ಬಳಸಲು ಬೇಕಿರುವ ಕುಶಲತೆ, ಮಾತೃಭಾಷೆಯಲ್ಲಿ ಅದಕ್ಕೆ ಬೇಕಿರುವ ಆಕರ ಪಠ್ಯ, ಇತ್ಯಾದಿಗಳನ್ನು ಮೊದಲು ಶಿಕ್ಷಕರಿಗೆ ಕರಗತ ಗೊಳಿಸಿ, ಅವರನ್ನು ಸಭಲರನ್ನಾಗಿಸಿ ನಂತರ ಮಕ್ಕಳಿಗೂ ಅದರ ಅರಿವು ಮೂಡುವಂತೆ ಮಾಡಬೇಕಿದೆ. ಕಾಲೇಜು ಪಠ್ಯದಲ್ಲಿ ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶಗಳ ಭೋದನೆಯ ಜೊತೆ ಅದನ್ನು ಪ್ರಾಯೋಗಿಕ ಕಲಿಕೆಯಲ್ಲಿ ಬಳಸಿಕೊಳ್ಳುತ್ತಾ ವಿಧ್ಯಾರ್ಥಿಗಳು ಸಮಾಜಕ್ಕೆ ಕೊಡುಗೆಗಳನ್ನು ತಮ್ಮ ವಿಧ್ಯಾರ್ಥಿ ಜೀವನದಲ್ಲಿಯೇ ಹೇಗೆ ಪ್ರಾರಂಭಿಸಬಹುದು ಎಂಬುದನ್ನು ಒತ್ತಿ ಹೇಳಬೇಕಿದೆ. ಇದು ಅತ್ಯಂತ ಕಠಿಣ ಕೆಲಸವಾಗಿದ್ದು, ಯುವ ಜನಾಂಗ ಇದರಲ್ಲಿ ತಮ್ಮ ಕೊಡುಗೆಯನ್ನು ನೀಡಬಹುದು.

ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶದ ಅಭಿವೃದ್ದಿ ಕಾರ್ಯದಲ್ಲಿ ತೊಡಗಿಸಿಕೊಳ್ಳುವುದು ಎಂದರೆ ಕನ್ನಡದಲ್ಲಿ ಎಲ್ಲ ತಂತ್ರಾಂಶಗಳು ಇರಬೇಕು ಎಂಬುದು ಮಾತ್ರವಲ್ಲ. ಕನ್ನಡಿಗರಿಗೆ ಬೇಕಿರುವ ಎಲ್ಲ ತರಹದ ತಂತ್ರಾಂಶಗಳು, ಅಂದರೆ ದೈನಂದಿನ ಚಟುವಟಿಕೆ, ಕಲಿಕೆ, ಅಭಿವೃದ್ದಿ, ಅನ್ವೇಷಣೆ, ಆವಿಷ್ಕಾರ ಇತ್ಯಾದಿಗಳಿಗೆ ಬೇಕಾದ ಸವಲತ್ತುಗಳನ್ನು ಕನ್ನಡಿಗರು ಸುಲಭದಲ್ಲಿ ಗ್ರಹಿಸಿ, ತಾವಾಗೇ ತಂತ್ರಾಂಶಗಳನ್ನು ಅಭಿವೃದ್ದಿ ಪಡಿಸಿ ಸ್ವಾವಲಂಭಿಗಳಾಗುವತ್ತ ಮುನ್ನೆಡೆಯುವುದು. ಕಂಪ್ಯೂಟರ್, ಮೊಬೈಲ್ ಇಷ್ಟೇ ಅಲ್ಲದೆ ಶಾಲೆ, ಕಾಲೇಜು, ಅಂಗಡಿ, ಆಸ್ವತ್ರೆ, ಬ್ಯಾಂಕ್ ಹೀಗೆ ಹತ್ತು ಹಲವಾರು ಸ್ಥಳಗಳಲ್ಲಿ ದುಡಿಯುವ, ಕಲಿಯುವ ಕನ್ನಡಿಗನಿಗೆ ಕನ್ನಡ ತಂತ್ರಾಂಶಗಳ ಕೊರತೆ ಇರಬಾರದು, ಇದ್ದರೂ ಅದು ಹೊರೆಯಾಗದಂತೆ ಮುಕ್ತವಾಗಿ, ಸ್ವತಂತ್ರವಾಗಿ ದೊರೆಯುವಂತಾಗಬೇಕು.

ನಮಗೆ ತಿಳಿದ ಹಾಗು ತಿಳಿಯದ ವಿಷಯಗಳ ಬಗ್ಗೆ ವಿಚಾರವಿನಿಮಯ ಮಾಡುವ – ಹರಟೆ ಕಟ್ಟೆಯನ್ನು ಕಲಿಕೆಯ ಕಟ್ಟೆಯನ್ನಾಗಿಸುವ ಸಂಸ್ಕೃತಿ (ನಮ್ಮ ಹಿರಿಯ ಸಾಹಿತಿಗಳು ಕನ್ನಡ ಸಾಹಿತ್ಯವನ್ನು ಕಟ್ಟಲು ಈ ಕೆಲಸ ಮಾಡುತ್ತಿದ್ದುದನ್ನು ಕೇಳಿದ್ದೇನೆ)ಯನ್ನು ನಾವು ಬೆಳೆಸಬೇಕಿದೆ. ಇದರ ಮುಖೇನ ಹೊಸ ಜನಾಂಗಕ್ಕೆ ವೈಜ್ಞಾನಿಕ, ತಾಂತ್ರಿಕ ಕುಶಲತೆಯನ್ನು ಕೊಂಡೊಯ್ಯಲು ಸಾಧ್ಯ. ಮುಕ್ತ ತಂತ್ರಾಂಶದ ಸಮುದಾಯದ ಬೆಳವಣಿಗೆಗೆ ಇಂತಹ ವೇದಿಕೆಗಳು ಮುಖ್ಯ, ಕೊನೆಗೆ ಇದರ ಫಲವನ್ನು ಅನುಭವಿಸುವವರೂ ನಾವೇ ಅಲ್ಲವೇ?

ಓಂಶಿವಪ್ರಕಾಶ್ ಎಚ್.ಎಲ್ ಹವ್ಯಾಸ, ಕೆಲಸ ಎರಡೂ ನನ್ನ ನೆಚ್ಚಿನ ತಂತ್ರಜ್ಞಾನವೇ. ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶದ ಬಳಕೆ, ಭೋದನೆ, ಅಳವಡಿಕೆ, ಅಭಿವೃದ್ದಿ ಖುಷಿ ಕೊಡುವ ಕೆಲಸಗಳು. ಮೂಲತ: ಬೆಂಗಳೂರಿನವನೇ ಆದ ನಾನು ಕಂಪೆನಿಯೊಂದರಲ್ಲಿ ಕೆಲಸದಲ್ಲಿದ್ದು, ನನ್ನ ಅರಿವಿನ ಒಂದಷ್ಟು ಭಾಗವನ್ನು ಕನ್ನಡಿಗರೊಂದಿಗೆ ಲಿನಕ್ಸಾಯಣದ ಮೂಲಕ ಹಂಚಿಕೊಳ್ಳುತ್ತೇನೆ. ಕನ್ನಡದಲ್ಲಿ ತಂತ್ರಜ್ಞಾನದ ಬೆಳವಣಿಗೆ, ಅಭಿವೃದ್ದಿಗೆ ಮತ್ತು ಅವುಗಳ ಬಗೆಗಿನ ಬರಹದೆಡೆಗೆ ವಿಷೇಶ ಆಸಕ್ತಿ. ವಿರಾಮದ ವೇಳೆ ಕ್ಯಾಮೆರಾ, ಸೈಕಲ್, ಪ್ರವಾಸ, ಜೊತೆಗೆ ಒಂದಿಷ್ಟು ಸಾಲುಗಳನ್ನು ಹೆಣೆಯುವುದು ಇತ್ಯಾದಿ.. ಎಲ್ಲರಿಗೂ ಎಲ್ಲವನ್ನೂ ಕಲಿಸುತ್ತೇನೆಂಬ ನಂಬಿಕೆಯಿಲ್ಲ, ಆದರೂ ಒಂದಿಷ್ಟು ಮಂದಿಗಾದರೂ ಒಳ್ಳೆಯ ಮಾಹಿತಿ ಒದಗಿಸಬಲ್ಲೆ ಎಂಬ ನಂಬಿಕೆಯಿದೆ.
ಮುಂದೆ ಓದಿ

ಅಲೆ ೮ – ಅನಂತ ಸಾಧ್ಯತೆಗಳ ಹೆಬ್ಬಾಗಿಲು: ಮುಕ್ತ ತಂತ್ರಾಂಶಗಳು

ಪ್ರಕಟಿಸಿದ್ದು ದಿನಾಂಕ Aug 8, 2011 ವಿಭಾಗ 2011, ale | 0 ಪ್ರತಿಕ್ರಿಯೆಗಳು

ಕಂಪ್ಯೂಟರ್ ಇರುವುದು ಕೇವಲ ಗೇಮ್ಸ್ ಆಡುವುದಕ್ಕೆ ಎಂದು ತಿಳಿದಿದ್ದ ನನಗೆ ಅದರ ಅಗಾಧ ಸಾಧ್ಯತೆಗಳ ಹೆಬ್ಬಾಗಿನ್ನು ತೆರೆದಿಟ್ಟಿದ್ದೇ ಮುಕ್ತ ತಂತ್ರಾಂಶಗಳು. ಮುಕ್ತ ತಂತ್ರಾಂಶಗಳಿಲ್ಲದಿದ್ದರೆ ಇಂದು ತಂತ್ರಜ್ಞಾನವು ಖಂಡಿತಾ ಇಷ್ಟೊಂದು ಮುಂದುವರೆಯುತ್ತಿರಲಿಲ್ಲ. ಮುಕ್ತ ತಂತ್ರಾಂಶದ ಆಕರಗಳು(source code) ಎಲ್ಲರಿಗೂ ಮುಕ್ತವಾಗಿರುವುದರಿಂದ ಪ್ರತಿಯೊಬ್ಬರಿಗೂ ತಂತ್ರಾಂಶದ ಅಭಿವೃದ್ಧಿ ಕಾರ್ಯಗಳಲ್ಲಿ ಭಾಗವಹಿಸಬಹುದು. ಮುಕ್ತ ತಂತ್ರಾಂಶಗಳು ಅತ್ಯಂತ ವೇಗವಾಗಿ ಹಾಗೂ ಹೆಚ್ಚು ಸಮರ್ಥವಾಗಿ ಬೆಳೆಯುವುದಕ್ಕೆ ಇದೇ ಕಾರಣ. ಇಂತಹ ಉದಾತ್ತ ಕಲ್ಪನೆಯನ್ನು ಮುಕ್ತ ತಂತ್ರಾಂಶಗಳ ಹೊರತಾಗಿ ಬೇರಡೆ ಕಾಣಲು ಸಾಧ್ಯವಿಲ್ಲ.

ಎಲ್ಲರಂತೆ ನಾನೂ ಮೊದಲು ಮೈಕ್ರೋಸಾಫ್ಟ್ ಕಂಪೆನಿಯ ವಿಂಡೋಸ್ ಕಾರ್ಯಚರಣ ವ್ಯವಸ್ಥೆಯನ್ನು(operating system) ಬಳಸುತ್ತಿದ್ದೆ. ಆದರೆ ಅದರಲ್ಲಿನ ನ್ಯೂನತೆಗಳು ಮತ್ತು ತೊಂದರೆಗಳು ನನ್ನನ್ನು ಮುಕ್ತ ತಂತ್ರಾಂಶಗಳ ಕಡೆ ಆಕರ್ಷಿಸಿತು. ಮುಕ್ತ ತಂತ್ರಾಂಶಗಳ ಬಳಕೆ ಎಂದರೆ ತಂತ್ರಾಂಶಗಳು ಮಾತ್ರ ಮುಕ್ತವಾಗಿದ್ದರೆ ಸಾಲದು, ನಾವು ಬಳಸುವ ಕಾರ್ಯಚರಣ ವ್ಯವಸ್ಥೆಯೂ ಮುಕ್ತವಾಗಿರಬೇಕು. ಆಗಲೇ ಮುಕ್ತ ತಂತ್ರಾಂಶದ ನಿಜವಾದ ಸಾಮರ್ಥ್ಯವನ್ನು ಅರಿಯಲು ಸಾಧ್ಯ. ಮುಕ್ತ ಕಾರ್ಯಚರಣ ವ್ಯವಸ್ಥೆಯಾದ ಗ್ನು/ಲಿನಕ್ಸ್ ಅನ್ನು ನನ್ನ 14ನೆಯ ವಯಸ್ಸಿನಿಂದಲೂ ಬಳಸಿಕೊಂಡು ಬಂದಿದ್ದೇನೆ. ಅದರ ಹಲವಾರು ರೂಪಾಂತರಗಳು ಲಭ್ಯವಿದ್ದರೂ, ಉಬುಂಟು ಆವೃತ್ತಿ ನನಗೆ ಮೊದಲಿನಿಂದಲೂ ಹೆಚ್ಚು ಆಪ್ತ. ಇದು ನನ್ನ ಎಲ್ಲಾ ದೈನಂದಿನ ತಂತ್ರಾಂಶದ ಅವಶ್ಯಕತೆಗಳನ್ನು ಪೂರೈಸುತ್ತದೆ. ಗ್ನು/ಲಿನಕ್ಸ್ ನನಗೇಕೆ ಇಷ್ಟ ಎನ್ನುವುದಕ್ಕೆ ಸಾಕಷ್ಟು ಕಾರಣಗಳನ್ನು ನೀಡಬಹುದು.

ಮುಕ್ತ ಮತ್ತು ಉಚಿತ:

ಕೆಲವೊಮ್ಮೆ ತಂತ್ರಾಂಶಗಳಿಗೆ ಖರ್ಚು ಮಾಡುವ ಹಣ, ಕಂಪ್ಯೂಟರಿನ ಹಾರ್ಡ್ವೇರಿಗೆ ಹಾಕುವ ದುಡ್ಡಿಗಿಂತಲೂ ಹೆಚ್ಚಾಗಿರುತ್ತದೆ. ಅದು ಕೆಲವೊಮ್ಮೆ ಹೊರೆಯಾಗಲೂಬಹುದು. ಹಾಗೆಂದು ನಕಲಿ ಅಥವಾ ಕದ್ದ ತಂತ್ರಾಂಶಗಳನ್ನು ಬಳಸುವುದಕ್ಕೂ ಇಷ್ಟವಿರುವುದಿಲ್ಲ. ಅಂತಹ ಸಂದರ್ಭದಲ್ಲಿ ನನಗೆ ಹೊಸ ಭರವಸೆಯನ್ನು ಮೂಡಿಸಿದ್ದೇ ಗ್ನು /ಲಿನಕ್ಸ್. ಇದು ಉಚಿತವಾಗಿ ಸಿಗುವುದರ ಜೊತೆಗೆ ನಿಬಂಧನೆಗಳ ಹೊರತಾಗಿದೆ. ಇದರಿಂದ ನಾನು ಇದನ್ನು ಉಚಿತವಾಗಿ ಉಪಯೋಗಿಸುವುದರ ಜೊತೆಗೆ ಅದನ್ನು ನನ್ನ ಅಗತ್ಯಕ್ಕೆ ತಕ್ಕಂತೆ ಬದಲಾಯಿಸಿಕೊಳ್ಳಬಹುದು, ಬೇರೆಯವರೊಂದಿಗೆ ಹಂಚಿಕೊಳ್ಳಬಹುದು. ಇಂತಹ ಸ್ವಾತಂತ್ರ್ಯ ದುಡ್ಡು ಕೊಟ್ಟು ಕೊಳ್ಳುವ ತಂತ್ರಾಂಶಗಳಲ್ಲಿಯೂ ದೊರೆಯುವುದಿಲ್ಲ.

ವೈರಸ್ ರಹಿತ:

ನನ್ನ ವಿಂಡೋಸ್ ಕಾರ್ಯಚರಣ ವ್ಯವಸ್ಥೆ ಪದೇ ಪದೇ ವೈರಸ್ ಧಾಳಿಗೆ ತುತ್ತಾಗುತ್ತಿತ್ತು.. ಅದರಿಂದ ಸಾಕಷ್ಟು ಹಾನಿಯಾಗುವುದರ ಜೊತೆಗೆ ವೈರಸ್ ಪ್ರತಿರೋಧಕಗಳಿಗೂ ಸಾಕಷ್ಟು ಹಣ ಸುರಿಯಬೇಕಾಗಿತ್ತು. ಆದರೆ ಗ್ನು /ಲಿನಕ್ಸ್ ಸಂಪೂರ್ಣವಾಗಿ ವೈರಸ್ ಮುಕ್ತವಾಗಿರುವುದರಿಂದ ನನ್ನ ಕಂಪ್ಯೂಟರ್ ಧಾಳಿಕೋರರಿಗೆ ಗುರಿಯಾಗುವ ಭಯವಿರುವುದಿಲ್ಲ, ಹಾಗೂ ವೈರಸ್ ಪ್ರತಿರೋಧಕಗಳಿಗೆ ದುಡ್ಡು ಸುರಿಯಬೇಕಾಗಿಲ್ಲ.

ಡ್ರೈವರ್‌ಗಳಿಂದ ಅನುಷ್ಟಾಪಿಸುವುದರಿಂದ ಮುಕ್ತಿ:

ವಿಂಡೋಸ್‌ನಲ್ಲಿ ಪ್ರತಿಯೊಂದು ಸಾಧನವನ್ನು(hardware) ಬಳಸುವುದಕ್ಕೆ ಡ್ರೈವರ್‌ಗಳ ಅಗತ್ಯವಿರುತ್ತಕದೆ. ಪ್ರಿಂಟರಿನಿಂದ ಹಿಡಿದು ಮೌಸಿಗೂ ಡ್ರೈವರ್ ಅಳವಡಿಸಿದ್ದು ನನಗೆ ನೆನಪಿದೆ. ಕೆಲವೊಮ್ಮೆ ಸರಿಯಾದ ಡ್ರೈವರ್‌ಗಳು ಸಿಗದಿದ್ದರೆ ಹಾರ್ಡ್ವೇರುಗಳು ನಿಷ್ಪ್ರಯೋಜಕವಾಗುತ್ತದೆ. ಆದರೆ ಗ್ನು /ಲಿನಕ್ಸಿನಲ್ಲಿ ಇಂತಹ ಡ್ರೈವರ್ ತೊಂದರೆಗಳು ಇರುವುದಿಲ್ಲ. ಬಹುತೇಕ ಎಲ್ಲಾ ಸಾಧನಗಳಿಗೆ ಬೇಕಾದ ಡ್ರೈವರ್‌ಗಳು ಮೊದಲೇ ಇರುತ್ತೆ. ನಾನು ಮೊದಲ ಬಾರಿಗೆ ಪ್ರಿಂಟರ್‌ನ್ನು ಗ್ನು /ಲಿನಕ್ಸಿಗೆ ಕನೆಕ್ಟ್ ಮಾಡಿದ ಕೂಡಲೇ “ಪ್ರಿಂಟ್ ಮಾಡುವುದಕ್ಕೆ ರೆಡಿಯಾಗಿದ್ದೇನೆ” ಎಂಬ ಸಂದೇಶ ನೋಡಿ ಆಶ್ಚರ್ಯಪಟ್ಟಿದ್ದೆ!

ತಂತ್ರಾಂಶಗಳ ಲಭ್ಯತೆ:

ನನಗೆ ಬೇಕಾದ ತಂತ್ರಾಂಶಗಳನ್ನು ಪಡೆಯಲು ಎಲ್ಲೆಲ್ಲೋ ಅಲೆಯಬೇಕಾಗಿಲ್ಲ. ಗ್ನು /ಲಿನಕ್ಸಿನಲ್ಲಿರುವ “ಸಿನಾಪ್ಟಿಕ್ ಪ್ಯಾಕೇಜ್ ಮ್ಯಾನೇಜರ್”ನ ಮುಖಾಂತರ ನನಗೆ ಬೇಕಾದ ಎಲ್ಲಾ ತಂತ್ರಾಂಶಗಳನ್ನು ಒಂದೆಡೆ ಪಡೆದುಕೊಳ್ಳಬಹುದು. ಉಬುಂಟುವಿನಲ್ಲಿ ಇರುವ “ಉಬುಂಟು ಸಾಫ್ಟ್ವೇರ್ ಸೆಂಟರ್” ಮುಖಾಂತರವಂತೂ ಒಂದೇ ಮೌಸ್ ಕ್ಲಿಕ್ಕಿನ ಮೂಲಕ ಬೇಕಾದ ತಂತ್ರಾಂಶವನ್ನು ತಕ್ಷಣ ಸ್ಥಾಪಿಸಿಕೊಳ್ಳಬಹುದು. ಜೊತೆಗೆ ಇವು ಪರೀಕ್ಷೆಗೆ ಒಳಪಟ್ಟಿರುವುದರಿಂದ ಯಾವುದೇ ಭಯವಿಲ್ಲದೆ ಬಳಸಬಹುದು. ಆದರೆ ಇಂಟರ್‌ನೆಟ್ ಮುಖಾಂತರ ಇಳಿಸಿಕೊಂಡು ವಿಂಡೋಸ್‌ನಲ್ಲಿ ಸ್ಥಾಪಿಸಿಕೊಂಡ ತಂತ್ರಾಂಶಗಳು ಯಾವಾಗಲೂ ಅಪಾಯಮುಕ್ತ ಎನ್ನಲು ಸಾಧ್ಯವಿಲ್ಲ.

ಸಮುದಾಯದಿಂದ ಸಹಾಯ:

ಗ್ನು /ಲಿನಕ್ಸಿನಲ್ಲಿ ಏನಾದರೂ ತೊಂದರೆಗಳು ಕಂಡುಬಂದರೆ ಸಹಾಯ ಮಾಡಲು ಗ್ನು /ಲಿನಕ್ಸ್ ಸಮುದಾಯ ಸದಾ ಸಿದ್ಧವಾಗಿರುತ್ತದೆ. ಇದರಿಂದ ತಂತ್ರಾಂಶದಲ್ಲಿನ ಯಾವುದೇ ತೊಂದರೆಯ ಪರಿಹಾರಕ್ಕಾಗಿ ದಿನಗಟ್ಟಲೇ ಕಾಯಬೇಕಾಗಿಲ್ಲ. ಸಮಸ್ಯೆಯನ್ನು ಸಮುದಾಯದಲ್ಲಿ ಹಂಚಿಕೊಂಡರೆ ಆದಷ್ಟು ಶೀಘ್ರವಾಗಿ ಪರಿಹಾರ ನಿಮ್ಮ ಮುಂದಿರುತ್ತದೆ! ಅಲ್ಲದೇ ನೀವು ಸಮುದಾಯದಲ್ಲಿ ಭಾಗವಹಿಸುವುದರಿಂದ ಬೇರೆಯವರ ತೊಂದರೆಗಳನ್ನೂ ಬಿಡಿಸಿದ ತೃಪ್ತಿ ಸಿಗುತ್ತದೆ.

ಇವು ಕೇವಲ ಪಟ್ಟಿ ಮಾಡಬಹುದಾದ ಕೆಲವು ಕಾರಣಗಳಷ್ಟೆ. ಇನ್ನೂ ಹಲವಾರು ಕಾರಣಗಳಿಂದ ಗ್ನು /ಲಿನಕ್ಸ್ ನನ್ನ ಅಚ್ಚುಮೆಚ್ಚಿನ ಕಾರ್ಯಚರಣ ವ್ಯವಸ್ಥೆಯಾಗಿದೆ. ಉದಾಹರಣೆಗೆ,

ಗ್ನು /ಲಿನಕ್ಸ್ ನನ್ನ ಶೈಕ್ಷಣಿಕ ಚಟುವಟಿಕೆಗಳಿಗೂ ಸಹಾಯ ಮಾಡುತ್ತದೆ. ಆ ಉದ್ದೇಶಗಳಿಗೆಂದೇ ಇರುವ “ಎಡುಬುಂಟು” ವಿದ್ಯಾರ್ಥಿಗಳಿಗೆ ಉಪಯೋಗಕರ. ಉದಾಹರಣೆಗೆ ರಸಾಯನಶಾಸ್ತ್ರದಲ್ಲಿ ಬಳಸುವ “ಆವರ್ತ ಕೋಷ್ಟಕ”ವು (periodic table) ಗ್ನು /ಲಿನಕ್ಸಿನಲ್ಲಿ GPeriodic ಎಂಬ ತಂತ್ರಾಂಶದ ಮೂಲಕ ಲಭ್ಯವಿದೆ. ಇದರಲ್ಲಿ ಪ್ರತಿಯೊಂದು ಮೂಲ ಧಾತುವಿನ ಬಗ್ಗೆ ವಿವರವಾದ ಮಾಹಿತಿಯಿದೆ. ಈ ಮೊದಲು ಇಂತಹ ಶೈಕ್ಷಣಿಕ ತಂತ್ರಾಂಶಗಳನ್ನು ದುಡ್ಡು ಕೊಟ್ಟು ಕೊಂಡುಕೊಳ್ಳುತ್ತಿದ್ದೆ. ಆದರೆ ಅವು ಪರಿಪೂರ್ಣವಾಗಿರುತ್ತಿರಲಿಲ್ಲ. ಈಗ ಗ್ನು/ಲಿನಕ್ಸಿನಲ್ಲಿ ನನಗೆ ಬೇಕಾದ ಎಲ್ಲಾ ಶೈಕ್ಷಣಿಕ ತಂತ್ರಾಂಶಗಳನ್ನು ಉಚಿತವಾಗಿಯೇ ಪಡೆಯುತ್ತೇನೆ.

ತುಂಬಾ ತಂತ್ರಾಂಶಗಳನ್ನು ಒಟ್ಟಿಗೆ ಉಪಯೋಗಿಸುವಾಗ ಕೆಲವೊಮ್ಮೆ ಎಲ್ಲಾ ಕಲಸುಮೆಲೋಗರವಾಗಿ ತೊಂದರೆಯುಂಟಾಗುತ್ತದೆ. ಆದರೆ ಗ್ನು /ಲಿನಕ್ಸಿನಲ್ಲಿರುವ “ವರ್ಕ್ ಸ್ಪೇಸ್ ಸ್ವಿಚರ್” ಅನೇಕ ತಂತ್ರಾಂಶಗಳನ್ನು ಒಟ್ಟಿಗೆ ಬಳಸುವಾಗ ಸಹಾಯಕಾರಿ. ಬೇರೆ ಬೇರೆ ತಂತ್ರಾಂಶಗಳನ್ನು ಬೇರೆ ಬೇರೆ ವರ್ಕ್ ಸ್ಪೇಸ್‌ಗಳಲ್ಲಿ ತೆರೆಯುವುದರಿಂದ ಅನಗತ್ಯ ಗೊಂದಲಗಳು ಉಂಟಾಗುವುದಿಲ್ಲ.

ಇನ್ನು ಗ್ನು /ಲಿನಕ್ಸ್ ನನ್ನ ಹವ್ಯಾಸಗಳಿಗೂ ರೆಕ್ಕೆ ಹಚ್ಚಿದೆ. ನನಗೆ ಮೊದಲಿನಿಂದಲೂ ಆಕಾಶ ವೀಕ್ಷಣೆಯೆಂದರೆ ಕುತೂಹಲ. ಗ್ನು /ಲಿನಕ್ಸಿನಲ್ಲಿ ಸ್ಟೆಲ್ಲೇರಿಯಮ್ ಎಂಬ ತಂತ್ರಾಂಶ ಲಭ್ಯವಿದೆ. ಇದರಲ್ಲಿ ಆಕಾಶವು ಬರಿಗಣ್ಣಿಗೆ ಅಥವಾ ಟೆಲಿಸ್ಕೋಪ್ ಮೂಲಕ ಹೇಗೆ ಕಾಣುತ್ತದೆಯೋ ಹಾಗೆಯೇ ಕಂಪ್ಯೂಟರ್ ಸ್ಕ್ರೀನ್ ಮೇಲೆ ತೋರಿಸುತ್ತದೆ. ಇದರಿಂದ ನಾನು ಖಗೋಳಶಾಸ್ತ್ರದ ಬಗ್ಗೆ ಸಾಕಷ್ಟು ವಿಷಯಗಳನ್ನು ತಿಳಿದುಕೊಳ್ಳಲು ಸಾಧ್ಯವಾಗಿದೆ.

ಗ್ನು /ಲಿನಕ್ಸಿನಲ್ಲಿ ನನಗೆ ಇನ್ನೊಂದು ಇಷ್ಟವಾದ ವಿಷಯವೆಂದರೆ ಕೆಲವು ಅತ್ಯವಶ್ಯವಾದ ತಂತ್ರಾಂಶಗಳನ್ನು ಹೊಸದಾಗಿ ಸ್ಥಾಪಿಸಿಕೊಳ್ಳಬೇಕಾಗಿಲ್ಲ. ಉದಾಹರಣೆಗೆ Office suite, PDF reader, ವೆಬ್ ಬ್ರೌಸರ್, ಇಮೇಜ್ ಎಡಿಟರ್‌ ಇತ್ಯಾದಿ ತಂತ್ರಾಂಶಗಳು ಗ್ನು /ಲಿನಕ್ಸ್ ಜೊತೆಗೇ ಇನ್ಸ್ಟಾಲ್ ಆಗುವುದರಿಂದ ಸರಿಯಾದ ತಂತ್ರಾಂಶಗಳನ್ನು ಹುಡುಕಲು ಸಮಯ ವ್ಯರ್ಥ ಮಾಡಬೇಕಾಗಿಲ್ಲ.

ಗ್ನು /ಲಿನಕ್ಸ್ ತುಂಬಾ ಸಧೃಢ ಆಪರೇಟಿಂಗ್ ಸಿಸ್ಟಮ್. ಒಮ್ಮೆ ಸ್ಥಾಪಿಸಿಕೊಂಡುಬಿಟ್ಟರೆ ಸಾಕು, ಯಾವುದೇ ತೊಂದರೆ ಕೊಡದಂತೆ ಕಾರ್ಯ ನಿರ್ವಹಿಸಿಕೊಂಡು ಹೋಗುತ್ತದೆ. ಆಪರೇಟಿಂಗ್ ಸಿಸ್ಟಮ್‌ಗಳು ಪದೇ ಪದೇ ಹಾಳಾಗುವ ವಿಷಯವನ್ನೇ ನೀವು ಮರೆತುಬಿಡುತ್ತೀರ! ಕೆಲಸ ಮಾಡುವಾಗ ಹ್ಯಾಂಗ್ ಆಗುವುದಿಲ್ಲ. ಅಂದರೆ ನಿಮ್ಮ ಕಂಪ್ಯೂಟರಿಗೆ ರೀಸ್ಟಾರ್ಟ್ ಬಟನ್‌ನ ಅಗತ್ಯವೇ ಇರುವುದಿಲ್ಲ!

ಇನ್ನೇಕೆ ತಡ? ನೀವಿನ್ನೂ ಮುಕ್ತ ತಂತ್ರಾಂಶದ ಸ್ವಾತಂತ್ರ್ಯವನ್ನು ಅನುಭವಿಸಿರದಿದ್ದರೆ ಇಂದೇ ಮುಕ್ತ ತಂತ್ರಾಂಶಗಳನ್ನು ಅಳವಡಿಸಿಕೊಳ್ಳಿ . ತೊಂದರೆಗಳು ಕಂಡುಬಂದರೆ ಗ್ನು /ಲಿನಕ್ಸ್ ಸಮುದಾಯ ನಿಮ್ಮ ಸಹಾಯಕ್ಕೆ ಸದಾ ಸಿದ್ಧವಿರುತ್ತದೆ. ಭಯ ಬಿಟ್ಟು ಸ್ವಾತಂತ್ರ್ಯದ ಜಗತ್ತಿಗೆ ಮುಕ್ತ ತಂತ್ರಾಂಶವೆಂಬ ಹೆಬ್ಬಾಗಿಲ ಮೂಲಕ ಪ್ರವೇಶಿಸಿ!

ಪ್ರಸನ್ನ ಎಸ್ ಪಿ ಹುಟ್ಟಿದ್ದು ಬೆಳೆದಿದ್ದೆಲ್ಲಾ ಕರ್ನಾಟಕದ ಮಲೆನಾಡಿನಲ್ಲಿ. ನನ್ನ ಸ್ವಂತ ಊರು ಕೊಪ್ಪ ತಾಲ್ಲೂಕಿನ ಶಂಕರಪುರ. ವಿಜ್ಞಾನ, ತಂತ್ರಜ್ಞಾನ ಹಾಗೂ ಕಂಪ್ಯೂಟರ್‍ ನನ್ನ ಆಸಕ್ತಿಯ ವಿಷಯಗಳು. ಬೇರೆಯವರಿಗೆ ಕಂಪ್ಯೂಟರ್‌ನ ಬಗ್ಗೆ ಹೇಳಿಕೊಡುವುದು ನನಗೆ ಖುಷಿ ನೀಡುವ ಸಂಗತಿ. ಅಂತರ್ಜಾಲದಲ್ಲಿ ಕನ್ನಡ ಭಾಷೆಯಲ್ಲಿ ಕಂಪ್ಯೂಟರ್‌ ಹಾಗೂ ತಂತ್ರಜ್ಞಾನದ ಬಗ್ಗೆ ಲೇಖನ ಬರೆಯುವುದು ನನ್ನ ಹವ್ಯಾಸ. ಹುಣ್ಣಿಮೆಗೋ, ಅಮವಾಸ್ಯೆಗೋ ಒಮ್ಮೆ ಬ್ಲಾಗ್ ಬರೆಯುತ್ತೇನೆ. ಲಿನಕ್ಸ್ ಹಾಗೂ ಮುಕ್ತ ತಂತ್ರಾಶವನ್ನು ಬೆಂಬಲಿಸುತ್ತೇನೆ.
ಮುಂದೆ ಓದಿ

ಅಲೆ ೭ – ಕನ್ನಡಕ್ಕೆ OCR! ಇದು ಸಾಧ್ಯವೇ?

ಪ್ರಕಟಿಸಿದ್ದು ದಿನಾಂಕ Aug 7, 2011 ವಿಭಾಗ 2011, ale | 0 ಪ್ರತಿಕ್ರಿಯೆಗಳು

Optical Character Recognision ಅಂದರೆ ಏನು? ಚಿತ್ರದಲ್ಲಿ ಇರುವ ಅಕ್ಷರಗಳನ್ನು ಗುರುತಿಸಿ, ಅವುಗಳನ್ನು ನಿಜವಾದ ಅಕ್ಷರಗಳಂತೆ ಬದಲಾಯಿಸುವುದು. ನಿಜವಾದ ಅಕ್ಷರಗಳಿದ್ದರೆ, ಅವುಗಳಿಂದ ಬೇಕಾದ ಪದಗಳನ್ನಷ್ಟೇ ಕತ್ತರಿಸಬಹುದು, ಬಣ್ಣ ಬದಲಾಯಿಸಬಹುದು ಹಾಗೂ ಕೆಲವು ಪದ/ವಾಕ್ಯಗಳನ್ನಷ್ಟೇ ಬದಲಾಯಿಸಬಹುದು. ಅದೇ ಚಿತ್ರದ ರೂಪದಲ್ಲಿದ್ದರೆ ಇದು ಸಾಧ್ಯವಿಲ್ಲ, ಎಲ್ಲವನ್ನೂ ಪುನಃ ಬರೆಯಬೇಕಾಗುತ್ತದೆ.

OCR ಈಗಾಗಲೇ ಇಂಗ್ಲಿಷ್ ಭಾಷೆಗೆ ಇದ್ದರೆ, ಕನ್ನಡಕ್ಕೆ ಏಕಿಲ್ಲ, ಅದನ್ನು ಮಾಡಬಹುದೇ? ಈ ಲೇಖನದ ಮೂಲಕ OCR ಕೆಲಸ ಮಾಡುವ ಬಗೆ ಮತ್ತು ಈಗಿರುವ ತೊಂದರೆಗಳ ಬಗ್ಗೆ ತಿಳಿದುಕೊಳ್ಳೋಣ.

ಈ ತಂತ್ರಾಂಶವು ಮೊದಲಿಗೆ ಚಿತ್ರದಲ್ಲಿ ಇರುವ ಕಪ್ಪು ಬಿಳುಪಿನ ಬಣ್ಣಗಳ ಬದಲಾವಣೆಗಳ ಮೂಲಕ ಆ ಚಿತ್ರವನ್ನು ಸಣ್ಣ ಸಣ್ಣ ಭಾಗಗಳನ್ನಾಗಿ ವಿಂಗಡಿಸುತ್ತದೆ. ಮೊದಲಿಗೆ ಉದ್ದನೆಯ ಬಿಳಿಯ ಅಥವಾ ಖಾಲಿ ಜಾಗವನ್ನು ಗುರುತಿಸಿ ಒಂದೊಂದು ಸಾಲುಗಳು ಎಂದು ಭಾಗ ಮಾಡುತ್ತೆ, ನಂತರ ಪ್ರತೀ ಸಾಲಿನಲ್ಲೂ ಮದ್ಯದ ಖಾಲಿ ಜಾಗವನ್ನು ಗುರುತಿಸಿ ಒಂದೊಂದು ಅಕ್ಷರಗಳೆಂದು ವಿಭಾಗಿಸುತ್ತೆ. ಆ ನಂತರ ತನ್ನಲ್ಲಿ ಇರುವ ಮಾಹಿತಿಯ ಪ್ರಕಾರ ಭಾಗ ಮಾಡಿದ ಪ್ರತಿಯೊಂದು ಸಣ್ಣ ಭಾಗವನ್ನೂ ಇಂತದ್ದೇ ಅಕ್ಷರವೆಂದು ಗುರುತಿಸುತ್ತದೆ.

ಚಿತ್ರದಲ್ಲಿರುವ ಗೆರೆಗಳು ತಂತ್ರಾಂಶವು ಚಿತ್ರವನ್ನು ಹೇಗೆ ವಿಭಾಗಿಸುತ್ತದೆ ಎಂಬುದನ್ನ ತೋರಿಸುತ್ತದೆ.

ಅಕ್ಷರಗಳನ್ನು ಗುರುತಿಸಲು ತನ್ನಲ್ಲಿರೋ ಮಾಹಿತಿ ಉಪಯೋಗಿಸುತ್ತೆ ಎಂದು ತಿಳೀತು, ಆದರೆ ಈ ಮಾಹಿತಿ ಅದಕ್ಕೆ ಎಲ್ಲಿಂದಾ ಸಿಗುತ್ತೆ? ಅದಕ್ಕೋಸ್ಕರವೇ ಮೊದಲಿಗೆ OCR ತಂತ್ರಾಂಶಕ್ಕೆ ತರಬೇತಿ ಕೊಡಬೇಕಾಗುತ್ತೆ. ತರಬೇತಿ ಅಂದರೆ ವರ್ಣಮಾಲೆಯಲ್ಲಿರುವ ಪ್ರತೀ ಅಕ್ಷರಗಳನ್ನು ಯಾವ ಯಾವ ರೀತಿ ಬರೆಯಬಹುದು ಎಂದು ತಿಳಿಸಿಕೊಡೋದು. ಈ ತರಬೇತಿ ಹೆಚ್ಚು ಫಾಂಟ್ ಗಳಿಗೆ ಮಾಡಿದಷ್ಟೂ OCR ಚೆನ್ನಾಗಿ ಕೆಲಸ ಮಾಡುತ್ತದೆ.

ಒಂದೊಂದೇ ಅಕ್ಷರಗಳನ್ನು ಯಾಕೆ ಗುರುತಿಸಬೇಕು? ಒಟ್ಟಿಗೇ ಒಂದಷ್ಟು ಪದಗಳನ್ನು ಗುರುತಿಸಬಹುದಲ್ವಾ ಎಂಬ ಪ್ರಶ್ನೆ ನಿಮಗೀಗ ಬಂದಿರಬಹುದು. ಪದಗಳನ್ನು ಒಟ್ಟಿಗೇ ಮಾಡುವುದಾದರೆ combination ಬಹಳ ಆಗಿ ತಂತ್ರಾಂಶ ಕೆಲಸ ಮಾಡುವುದೇ ಕಷ್ಟ ಆಗುತ್ತದೆ. ಉದಾಹರಣೆ ಇಂಗ್ಲಿಷ್ ನಲ್ಲಿ a b c d ಎಂಬ ನಾಲ್ಕು ಅಕ್ಷರಗಳನ್ನೇ ಬಹಳಷ್ಟು ತರಹದಲ್ಲಿ ಬರೆಯಬಹುದು. ಉದಾಹರಣೆಗೆ abcd, abdc, adbc, dabc, acbd… ಹಾಗಾಗಿ ಅಕ್ಷರಗಳ ಬದಲಿಗೆ ಪದಗಳನ್ನು ಕೊಟ್ಟರೆ OCR ಗೆ ತರಬೇತಿ ಕೊಡುವುದು ಕಬ್ಬಿಣದ ಕಡಲೆ ಆಗುತ್ತದೆ.

ಕನ್ನಡಕ್ಕೆ OCR ಮಾಡಲು ಈಗಿರುವ ತೊಂದರೆಗಳು

ಮೊದಲೇ ಹೇಳಿದಂತೆ, ಈ ತಂತ್ರಾಂಶವು ತನಗೆ ಕೊಟ್ಟ ಚಿತ್ರವನ್ನು ಮೇಲಿನಿಂದ ಕೆಳಗೆ ನೋಡಿ ಅದರಿಂದ ಸಾಲುಗಳಂತೆ ವಿಂಗಡಿಸಿ ನಂತರ ಎಡದಿಂದ ಬಲಕ್ಕೆ ನೋಡಲು ಪ್ರಾರಂಭಿಸುತ್ತೆ. ಚಿತ್ರದಲ್ಲಿನ ಕಪ್ಪು ಬಿಳುಪಿನ ಆಧಾರದ ಮೇಲೆ ಒಂದು ಸಾಲಿನಲ್ಲಿ ಸಣ್ಣ ಸಣ್ಣ ಭಾಗಗಳನ್ನು ಗುರುತಿಸುತ್ತದೆ. ಈ ಸಂದರ್ಭದಲ್ಲಿ ಕನ್ನಡದ ಒಂದೇ ಅಕ್ಷರವನ್ನು ಎರಡು ಭಾಗ ಮಾಡುವ ಸಾಧ್ಯತೆ ಇದೆ. ಇದಕ್ಕೆ ಮುಖ್ಯ ಕಾರಣ ಆ ಅಕ್ಷರದ ಎರಡು ಭಾಗಗಳು ಕೂಡದೇ ಇರುವುದು. ಕೆಳಗಿನ ಉದಾಹರಣೆಯಲ್ಲಿ ತೋರಿಸಿದಂತೆ “ಕೀ” ಅಕ್ಷರವನ್ನು ಎರಡು ಭಾಗ ಮಾಡುತ್ತದೆ, ತರಬೇತಿ ಮಾಡುವಾಗ ಕೊಟ್ಟ ಮಾಹಿತಿಯಲ್ಲಿ “ಕಿ” ಗುರುತಿಸುವ ಬಗ್ಗೆ ಇದೆ ಆದರೆ ಬರೀ ಧೀರ್ಘ ಬಂದಾಗ ಏನು ಮಾಡುವುದು ಎಂದು ಆ ತಂತ್ರಾಂಶಕ್ಕೆ ಹೇಳುವುದು ಕಷ್ಟ. ಇಂಗ್ಲಿಷ್ ನಲ್ಲಾದರೆ ಒಂದೊಂದು ಅಕ್ಷರವೂ ಸ್ವತಂತ್ರ. ಎರಡು ಅಕ್ಷರಗಳು ಸೇರಿಸಿದಾಗ ಇನ್ನೇನೋ ಅಕ್ಷರ ಆಗುವ ಸಂಭವ ಇಲ್ಲ. ಇದ್ದರೂ ಬಹಳ ಕಡಿಮೆ. ಮುಂಚೆ ಹೇಳಿದ “ಕೀ” ತೊಂದರೆಗೆ “ಕಿ” ಮತ್ತು ಧೀರ್ಘಕ್ಕೆ ಬೇರೆ ಬೇರೆ ಮಾಹಿತಿ ಕೊಟ್ಟರೂ ಕೊನೆಯಲ್ಲಿ ಜೋಡಿಸುವಾಗ ಯುನಿಕೋಡ್ ನ ಪ್ರಕಾರ ಅವೆರಡು ಜೋಡುವುದಿಲ್ಲ.

ಮೇಲಿನ ತೊಂದರೆಗೆ ಒಂದು ತಾತ್ಕಾಲಿಕ ಪರಿಹಾರ ಹುಡುಕಿಕೊಂಡಿದ್ದೇವೆ, ಆದರೆ ಬಹುಮುಖ್ಯ ಸಮಸ್ಯೆ ಒತ್ತಕ್ಷರಗಳದ್ದು. ಒತ್ತಕ್ಷರಗಳನ್ನು ಮುಖ್ಯ ಅಕ್ಷರಗಳಿಂದ ಬೇರೆಯಾಗಿ ಗುರುತಿಸೋದು ಕಷ್ಟ. ಒಂದೊಂದು ಫಾಂಟ್ ನಲ್ಲಿ ಒಂದೊಂದು ತರಹವಿರುತ್ತದೆ, ಕೆಳಗಿನ ಉದಾಹರಣೆಗಳನ್ನು ನೋಡಿ, ಎರಡನೆಯ ಚಿತ್ರದಲ್ಲಿ ಒತ್ತಕ್ಷರ ಹಾಗೂ ಮುಖ್ಯ ಅಕ್ಷರವನ್ನು ಒಂದು ಗೆರೆ ಹಾಕಿ ಬೇರೆ ಬೇರೆಯಾಗಿ ಗುರುತಿಸಬಹುದು. ಆದರೆ ಕೆಲವು ಫಾಂಟ್ ಗಳಲ್ಲಿ ಬರೆದಿದ್ದನ್ನು ಬೇರೆ ಬೇರೆಯಾಗಿ ಗುರುತಿಸಲು ಆಗುವುದಿಲ್ಲ(ಮೊದಲನೇ ಚಿತ್ರ ನೋಡಿ), ಅವೆರಡನ್ನೂ ಒಂದೇ ಅಕ್ಷರವಾಗಿ ಗುರುತಿಸಿದರೆ ಮೇಲೆ ವಿವರಿಸಿದಂತೆ ಬಹಳಷ್ಟು combination ಗಳು ಆಗುತ್ತದೆ, ಉದಾ: ಕ್ಗ, ಕ್ಗಿ, ಕ್ಗು, ಕ್ಗೂ… ಒತ್ತಕ್ಷರಗಳ combination ಗಳ ಸಂಖ್ಯೆ ಊಹಿಸಲೂ ಕಷ್ಟವಾಗುವಷ್ಟಾಗುತ್ತದೆ, ಇನ್ನು ಒಂದಕ್ಕಿಂತಾ ಜಾಸ್ತಿ ಒತ್ತು ಬರುವ ಪದಗಳನ್ನು ಊಹಿಸಿಕೊಳ್ಳಿ.

ಇದುವರೆಗೆ ಬರೆದ ವಿಚಾರಗಳು Tesseract OCR ಎಂಬ ತಂತ್ರಾಂಶವನ್ನು ಗೆಳೆಯರ ಜೊತೆ ಸೇರಿ ಕನ್ನಡಕ್ಕೆ ಅಳವಡಿಸಲು ಪ್ರಯತ್ನ ಮಾಡಿದಾಗಿನ ಅನುಭವ. ಇನ್ನೂ ಬಹಳಷ್ಟು ತೊಂದರೆಗಳಿಗೆ ಪರಿಹಾರ ಸಿಕ್ಕಿಲ್ಲ. ಎಲ್ಲಾ ತೊಂದರೆಗಳು ಒಂದೊಂದಾಗಿ ಸರಿಯಾಗಿ ಕಡೆಗೊಂದಿನ ಕನ್ನಡಕ್ಕೂ ಒಂದು OCR ಬರಲಿ ಎಂದು ಆಶಿಸುತ್ತೇನೆ.

ಹಳ್ಳಿಮನೆ ಅರವಿಂದ ಊರು ಉತ್ತಮೇಶ್ವರ,ಕೊಪ್ಪ ತಾಲ್ಲೂಕು, ಚಿಕ್ಕಮಗಳೂರು ಜಿಲ್ಲೆ. ನಮ್ಮ ಮನೆಯ ಹೆಸರು ಹಳ್ಳಿಮನೆ, ಹಾಗಾಗಿ ಗೆಳೆಯರು ಹಳ್ಳಿಮನೆ ಅರವಿಂದ ಅಂತಲೂ ಕರೆಯುವುದು ಉಂಟು. ಬೆಂಗಳೂರಿನಲ್ಲೊಂದು ಕಂಪನಿಯಲ್ಲಿ ತಂತ್ರಾಂಶ ತಂತ್ರಜ್ಞ. ಚಾರಣಗಳು, ಛಾಯಾಗ್ರಹಣ ಮತ್ತು ಮುಕ್ತ ತಂತ್ರಾಂಶಗಳಲ್ಲಿ ಒಲವು. ತಂತ್ರಜ್ಞಾನದ ಬಗ್ಗೆ ಹೊಸತಾಗಿ ತಿಳಿಯುವುದೆಂದರೆ ಎಲ್ಲಿಲ್ಲದ ಉತ್ಸಾಹ. ಜೀವನದಲ್ಲಿ ಏನಾದರೂ ಸಾಧನೆ ಮಾಡಬೇಕೆಂಬ ಇನ್ನೂ ತೀರದ ಆಸೆ :)
ಮುಂದೆ ಓದಿ

ಅಲೆ ೬ – ತಂತ್ರಾಂಶ ಅಭಿವೃದ್ಧಿಯ ಮಜಲುಗಳು- ಸಾಫ್ಟ್ ವೇರ್ ಬೆಳವಣಿಗೆಯ ಹಾದಿ

ಪ್ರಕಟಿಸಿದ್ದು ದಿನಾಂಕ Aug 6, 2011 ವಿಭಾಗ 2011, ale | 0 ಪ್ರತಿಕ್ರಿಯೆಗಳು

ಬರವಣಿಗೆಯ ಉದ್ದೇಶ :

ಆಧುನಿಕ ಜೀವನ ಶೈಲಿಯಲ್ಲಿ ನಾವೆಲ್ಲರೂ ಒಂದಲ್ಲಾ ಒಂದು ರೀತಿ ತಂತ್ರಾಂಶದ ಮೇಲೆ ಅವಲಂಭಿಸಿರುತ್ತೇವೆ. ನಮಗೆ ಅರಿವೇ ಇಲ್ಲದೆ ನಮ್ಮ ದಿನ ನಿತ್ಯದ ಕೆಲಸ ಕಾರ್ಯಗಳಲ್ಲಿ ಸಾಫ್ಟ್ ವೇರ್ ನ ಬಳಕೆಯಾಗುತ್ತಿದೆ. ಇದು ಕೇವಲ ಐ.ಟಿ ಉದ್ಯೋಗಸ್ತರು ಮಾತ್ರವಲ್ಲದೆ ಜನಸಾಮಾನ್ಯರು ಸಹ ಬಳಸುತ್ತಿದ್ದಾರೆ. ಹೇಗಂತೀರಾ ??? ಒಮ್ಮೆ ನಮ್ಮ ಸುತ್ತ ಮುತ್ತ ಕಣ್ಣು ಹಾಯಿಸೋಣ! ಶಾಪಿಂಗ್ ಮಾಲ್, ರೆಸ್ಟೋರೆಂಟ್, ಕಚೇರಿ, ಬಸ್-ಟ್ರೈನ್ ಕಾಯ್ದಿರಿಸುವ ಕೌಂಟರ್, ಹೀಗಿಯೇ ಪಟ್ಟಿ ಬೆಳೆಯುತ್ತಾ ಹೋಗುತ್ತದೆ. ಸಾಫ್ಟ್ ವೇರ್ ನ ಬಳಕೆಗೆ ದೇವಸ್ಥಾನಗಳೂ ಹೊರತಲ್ಲ.

ಇಷ್ಟೆಲ್ಲಾ ಪ್ರಚಲಿತವಾಗಿರುವ ಸಾಫ್ಟ್ ವೇರ್ ಹೇಗೆ ತಯಾರಾಗುತ್ತದೆ, ಇದರ ಪ್ರಕ್ರಿಯೆ ಏನು? ಕಂಪನಿಗಳು ಸಾಫ್ಟ್ ವೇರ್ ಗಳನ್ನು ಹೇಗೆ ಅಭಿವೃದ್ಧಿ ಪಡಿಸುತ್ತಾರೆ? ಇವೆಲ್ಲಾ ವಿಷಯಗಳನ್ನು ನಿಮ್ಮೊಂದಿಗೆ ಹಂಚಿಕೊಳ್ಳುವ ಸಲುವಾಗಿ, ಜನ ಸಾಮಾನ್ಯರಿಗೆ ಇದರ ಬಗ್ಗೆ ಕಿರು ಪರಿಚಯ ಹಾಗು ಸ್ನೇಹಿತರೊಂದಿಗೆ ನಮ್ಮ ಆಡುಭಾಷೆಯಲ್ಲಿ ತಂತ್ರಾಂಶ ಬೆಳವಣಿಗೆಯ ಜೀವನ ಚಕ್ರವನ್ನು ಮುಟ್ಟಿಸುವ ಹಂಬಲದಿಂದ ಈ ಲೇಖನವನ್ನು ಬರೆದಿದ್ದೇನೆ .

ಪೀಠಿಕೆ :

“ಸಾಫ್ಟ್ ವೇರ್ ಬೆಳವಣಿಗೆಯ ಪ್ರಕ್ರಿಯೆ” ಸಾಫ್ಟ್ ವೇರ್ ನ ತಯಾರಿಕೆಯಲ್ಲಿ ಬಳಸುವ ವಿಧಿ-ವಿಧಾನಗಳ ಒಂದು ಆಯಕಟ್ಟು. ಸಾಫ್ಟ್ ವೇರ್ ರಚನೆಯಲ್ಲಿ ವಿವಿಧ ಹಂತಗಳಿದ್ದೂ, ಇವೆಲ್ಲವನ್ನು ಉಲ್ಲೇಖಿಸುವ ಕಾರ್ಯವಿಧಾನವೆ ಸಾಫ್ಟ್ ವೇರ್ ಡೆವಲಪ್ಮೆಂಟ್ ಲೈಫ್ ಸೈಕಲ್ (SDLC). SDLC ಯಲ್ಲಿ ಹಲವಾರು ಮಾದರಿ(ಮಾಡಲ್)ಗಳಿದ್ದು, ಅವು ತಮ್ಮದೇ ರೀತಿಯಲ್ಲಿ ಸಾಫ್ಟ್ ವೇರ್ ನ ಉತ್ಪನ್ನ ಪದ್ದತಿಯನ್ನು ಅನುಸರಿಸುತ್ತದೆ. ಹಾಗೆಯೇ ಸಾಫ್ಟ್ ವೇರ್ ಕಂಪನಿಗಳು ಸಹ ಹೇರಳವಾಗಿರುವುದರಿಂದ, ಯಾವ ಕಂಪನಿ ಯಾವ ಪ್ರಕ್ರಿಯೆಯನ್ನು ಆಯ್ಕೆ ಮಾಡಬೇಕೆಂಬ ಸಂಧಿಗ್ಧ ಪರಿಸ್ಥಿತಿ ಉಂಟಾಗುತ್ತದೆ. ಆದ್ದರಿಂದ ಅಂತರಾಷ್ಟ್ರೀಯ ಮಟ್ಟದಲ್ಲಿ ಎಂತಹ ಕಂಪನಿಗಳು ಯಾವ SDLC ಮಾಡೆಲ್ ಆಯ್ಕೆ ಮಾಡಬೇಕು, ಅದನ್ನು ಕಾರ್ಯರೂಪಕ್ಕೆ ತರುವ ವಿಧಾನ ಹಾಗು ಅದರ ಸಂರಕ್ಷಣೆಗಾಗಿ ಐ.ಎಸ್.ಓ ೧೨೨೦೭ ಎಂಬ ಆಯೋಗವನ್ನು ರಚಿಸಿದೆ.

ಸಾಫ್ಟ್ ವೇರ್ ಅಭಿವೃದ್ಧಿಯಲ್ಲಿ ವಿವಿಧ ಹಂತಗಳಿರುತ್ತದೆ. ಪ್ರತಿಯೊಂದು ಹಂತ ತಮ್ಮ ಮುಂದಿನ ಹಂತಕ್ಕೆ ಬೇಕಾಗುವ ಅಗತ್ಯಗಳನ್ನು ಸಾದರಪಡಿಸುತ್ತದೆ. ಪ್ರಾಯಶಃ ಎಲ್ಲಾ SDLC ಮಾದರಿಯಲ್ಲಿಯೂ ಕೆಳಗೆ ಸೂಚಿಸಿರುವ ಹಂತಗಳನ್ನು ಅನುಸರಿಸುತ್ತದೆ . ಆದರೆ ಈ ಹಂತಗಳ ಅನುಕ್ರಮ ಪ್ರತಿ SDLC ಯಲ್ಲಿ ಬದಲಾಗುತ್ತದೆ.

ಮೊದಲಿಗೆ ನಾವು ಸಾಫ್ಟ್ ವೇರ್ ಬೆಳವಣಿಗೆಯಲ್ಲಿ ಸಾಧಾರಣವಾಗಿ ಬರುವ ಚಟುವಟಿಕೆಗಳ ಬಗ್ಗೆ ಒಂದು ಪಕ್ಷಿನೋಟ ಹಾಯಿಸೋಣ.

೧. ಗ್ರಾಹಕರ ಅಗತ್ಯಗಳ ಪರಿಶೀಲನೆ (Requirement Analysis):

ಈ ಹಂತದಲ್ಲಿ ಪ್ರಾಜೆಕ್ಟ್ ಮ್ಯಾನೇಜರ್, ಸ್ಟೇಕ್ ಹೋಲ್ಡರ್ಸ್ ರ ಕೊಡುಗೆ ಬಹಳ ಮುಖ್ಯವಾಗಿರುತ್ತದೆ . ಗ್ರಾಹಕರು(ಕಸ್ಟಮರ್ಸ್) ತಮ್ಮ ಬೇಡಿಕೆಗಳನ್ನು ಕಂಪನಿಯ ಮುಂದಿಡುತ್ತಾರೆ. ತಮಗೆ ಬೇಕಿದ್ದ ಸಾಫ್ಟ್ ವೇರ್ ಪ್ರಾಡೆಕ್ಟ್ ನ ಉಪಯುಕ್ತತೆಯನ್ನು ಉಲ್ಲೇಖಿಸುತ್ತಾರೆ . ಬಹಳಷ್ಟು ಬಾರಿ ಇದು ಸಾರಾಂಶ ರೂಪದಲ್ಲಿರುತ್ತದೆ. ಪ್ರಾಜೆಕ್ಟ್ ಮ್ಯಾನೇಜರ್ ಮತ್ತು ಸ್ಟೇಕ್ ಹೋಲ್ಡರ್ಸ್, clientsನೊಂದಿಗೆ ಜಾಣ್ಮೆಯಿಂದ ಚರ್ಚಿಸಿ ಅವರ ಅಗತ್ಯಗಳನ್ನು ಅರಿತು ಅವರ ಅಗತ್ಯಗಳನ್ನು ಸಂಗ್ರಹಿಸಲಾಗುತ್ತದೆ. ಈ ಪ್ರಕ್ರಿಯೆಯಲ್ಲಿ ಪ್ರಾಡಕ್ಟ್ ನ ಬಳಕೆ, ಯಾರು – ಹೇಗೆ ಇದನ್ನು ಉಪಯೋಗಿಸುತ್ತಾರೆ? ಮಾಹಿತಿ ಶೇಖರಣೆ … ಹೀಗೆ ಹಲವಾರು ಸೂಕ್ಷ್ಮ ಮಾಹಿತಿಗಳನ್ನು ಸಂಗ್ರಹಿಸತಕ್ಕದ್ದು. ಇದನ್ನು Requirement Document ಎಂದು ಕರೆಯುತ್ತಾರೆ.

೨. ಡಿಸೈನ್ (Design):

Requirement Analysis ಹಂತದಲ್ಲಿ ಒಕ್ಕೂಡಿದ ಬೇಡಿಕೆಗಳಿಂದ ಡಿಸೈನ್ ರಚನೆ ಆರಂಭವಾಗುತ್ತದೆ. ಆರ್ಕಿಟೆಕ್ಟ್ ಈ ಹಂತದಲ್ಲಿ ಪ್ರಮುಖವಾದ ಪಾತ್ರ ವಹಿಸುತ್ತಾರೆ. ಪ್ರಾಜೆಕ್ಟ್ ನ ಯಶಸ್ಸಿನ ಬಹುತೇಕ ಪಾಲನ್ನು ಡಿಸೈನ್ ನಿರ್ಧರಿಸುತ್ತದೆ. ಡಿಸೈನ್ ತಪ್ಪಾದಲ್ಲಿ ಇಡೀ ಪ್ರಾಡಕ್ಟ್ ಹಾಗು ಅದಕ್ಕೆ ಮೀಸಲಿಟ್ಟ ಶ್ರಮ ವ್ಯರ್ಥವಾಗಿ ಹೊಗುವ ಕಾರಣ ಡಿಸೈನ್ ನನ್ನು ಆದಷ್ಟು ಜಾಗರೂಕತೆಯಿಂದ ರಚಿಸಬೇಕು. ಸಿಸ್ಟಮ್ ನ ಕೃತಿ, ಅದು ಕೆಲಸ ಮಾಡುವ ವಿಧಾನ ವಿವರಣೆಗಳನ್ನು ವರ್ಣಿಸುವ ಹಂತ . ಇದನ್ನು UML ಚಿತ್ರದ ರೂಪದಲ್ಲಿ ಬಿಂಬಿಸುತ್ತಾರೆ . ಇದೇ ಡಿಸೈನ್ ಡಾಕ್ಯುಮೆಂಟ್(Design Document).

೩. ಇಂಪ್ಲಿಮೆಂಟೇಶನ್ (Implementation):

ಡಿಸೈನ್ ಡಾಕ್ಯುಮೆಂಟ್ ಅನ್ನು ಆಧರಿಸಿ ಕೋಡ್/ಪ್ರೋಗ್ರಾಮ್ ಸೃಷ್ಟಿಸುವ ಕಾರ್ಯ ಆರಂಭವಾಗುತ್ತದೆ. ಇದು SDLCಯಲ್ಲಿ ಅತ್ಯಂತ ದೀರ್ಘವಾದ ಅವಧಿಯಾಗಿರುತ್ತದೆ. ಈ ಹಂತದ ಪ್ರಮುಖವಾದ ಪಾಲುದಾರ ಡೆವೆಲೆಪೆರ್/ಪ್ರೊಗ್ರಾಮರ್. ಉತ್ತಮವಾದ ಕೋಡ್ ನ ರಚನೆ ಕಾರ್ಯನಿರ್ವಹಣೆ ಜವಾಬ್ದಾರಿ ಡೆವೆಲೆಪೆರ್ ದಾಗಿರುತ್ತದೆ. ಮೆಮರಿ, ಕಾರ್ಯಕಲಾಪ ಹೀಗೆ ಮುಂತಾದ ಸೂಕ್ಷ್ಮ ವಿಷಯಗಳನ್ನು ಆದಷ್ಟು ಉತ್ತಮರೀತಿಯಲ್ಲಿ ಬಳಸುವ ಕೋಡ್ ನ ಸೃಷ್ಟಿ ಅತ್ಯಗತ್ಯ.

ಮೊದಲಿಗೆ ಹಲವು ಉಪ ಘಟಕ(modules)ಗಳನ್ನು ತಯಾರಿಸಿ ನಂತರ ಇವೆಲ್ಲವನ್ನು ಸಂಕೀರ್ಣಿಸಿ ಒಂದು ಪರಿಪೂರ್ಣ ಪ್ರಾಡಕ್ಟ್ ಅನ್ನು ಹೊರತರಲಾಗುತ್ತದೆ.

೪. ಪರೀಕ್ಷಣೆ (Testing):

ಈ ಹಿಂದೆ ತಯಾರಾದ ಸಾಫ್ಟ್ ವೇರ್/ಅಪ್ಪ್ಲಿಕೇಷನ್ ಅನ್ನು ಪರೀಕ್ಷೆ(Testing) ಮಾಡಬೇಕಲ್ಲವೇ? Requirement Analysis ಹಂತದಲ್ಲಿ ರೂಪಿಸಿದ Requirement document ಅನ್ನು ಆಧರಿಸಿ ಅದರಲ್ಲಿ ದಾಖಲಾಗಿರುವ ಪ್ರತಿಯೊಂದು ಅಗತ್ಯಗಳು ಕಾರ್ಯರೂಪದಲ್ಲಿದೆಯೇ ಎಂದು ಪರಿವೀಕ್ಷಿಸುತ್ತಾರೆ. ಇದಕ್ಕಾಗಿಯೆ ಟೆಸ್ಟ್ ಡಾಕ್ಯುಮೆಂಟ್(Test document) ರಚನೆಯಾಗುತ್ತದೆ. ಪರೀಕ್ಷಣೆ ಹಂತದಲ್ಲಿ ಪ್ರಮುಖವಾದ ಪಾತ್ರ ಪರೀಕ್ಷಕರದಾಗಿರುತ್ತದೆ.

ಪರೀಕ್ಷಣೆ ಕಾರ್ಯವನ್ನು ೩ ಉಪಭಾಗಗಳಾಗಿ ವಿಂಗಡಿಸಬಹುದು:

೧. Unit testing : ಇಂಪ್ಲಿಮೆಂಟೇಶನ್ ಹಂತದಲ್ಲಿ ಬಿಡಿ ಬಿಡಿಯಾಗಿ ಸೃಷ್ಟಿಸಿದ ಉಪ ಘಟಕಗಳನ್ನು ಪ್ರತ್ಯೇಕವಾಗಿ ಪರೀಕ್ಷಿಸಲಾಗುತ್ತದೆ.

೨. System testing : ಎಲ್ಲಾ ಉಪ ಘಟಕಗಳನ್ನು ಒಗ್ಗೂಡಿಸಿದ ನಂತರ ಇವುಗಳ ಪರಸ್ಪರ ಕಾರ್ಯನಿರ್ವಹಣೆಯನ್ನು ಗಮನಿಸುತ್ತಾರೆ.

೩. Acceptance testing : ಹೀಗೆ ಸೃಷ್ಟಿಯಾದ ಪ್ರಾಡಕ್ಟ್ ಅನ್ನು ಗ್ರಾಹಕರ ಕ್ಷೇತ್ರದಲ್ಲಿ ಇನ್ಸ್ಟಾಲ್ ಮಾಡಿ ಪರಿಪೂರ್ಣ ವ್ಯಾಪ್ತಿಯಲ್ಲಿ ಅದರ ಉಪಯುಕ್ತತೆಯನ್ನು ಧೃಡೀಕರಿಸಲಾಗುತ್ತದೆ.

ಇಂತಿಷ್ಟೇ ಸಾಮಾನ್ಯವಾಗಿ ತಂತ್ರಾಂಶ ಬೆಳವಣಿಗೆ ಪ್ರಕ್ರಿಯೆಯಲ್ಲಿ ಅಡಕವಾಗಿರುವ ಅಂಶಗಳು.
ಬನ್ನಿ… ಈಗ ಒಂದು ಹೆಜ್ಜೆ ಮುಂದಿಟ್ಟು , ಅತ್ಯಧಿಕವಾಗಿ ಕಂಪನಿಗಳಲ್ಲಿ ಚಾಲ್ತಿಯಲ್ಲಿರುವ SDLC ಮಾದರಿಗಳ ಬಗ್ಗೆ ಒಂದು ಕಿರುನೋಟ ಹಾಯಿಸೋಣ.

೧. Waterfall Model (ಜಲಪಾತದ ಮಾದರಿ) :

ಅತ್ಯಂತ ಜನಪ್ರಿಯ ಹಾಗು ಹೇರಳವಾಗಿ ಚಲಾವಣೆಯಲ್ಲಿರುವ ಮಾಡೆಲ್. ಗ್ರಹಿಸಲು/ಅನುಸರಿಸಲು ಕೂಡ ಬಹಳ ಸರಳವಾಗಿದೆ. ಕೆಳಗೆ ತೋರಿಸಿದ ಚಿತ್ರದಂತೆ ಈ ಮಾಡೆಲ್ ವಿವಿಧ ಹಂತಗಳನ್ನು ಒಳಗೊಂಡಿದೆ. ಆದರೆ ಇಲ್ಲಿನ ವಿಷೇಶವೆಂದರೆ ಪ್ರತಿ ಹಂತವನ್ನು ಪರಿಸಮಾಪ್ತಿ ಗೊಳಿಸಿದ ಮೇಲೆಯೇ ಮುಂದಿನ ಹಂತವನ್ನು ಕೈಗೊಳ್ಳಬೇಕು.ಈ ಮಾಡೆಲ್ ನ ಮತ್ತೊಂದು ಗುಣವೆಂದರೆ ಪರಿಶೀಲನೆ(review). ಎಲ್ಲಾ ಹಂತದ ಕೊನೆಗೆ ಪರಿಶೀಲನೆಯ ಕ್ರಿಯೆ ಜರಗುತ್ತದೆ. ಆದ್ದರಿಂದ ಪ್ರಾಜೆಕ್ಟ್ ಸ್ಥಿತಿಗತಿ, ಸರಿಯಾದ ಕ್ರಮದಲ್ಲಿ ಮುನ್ನಡೆಯುತ್ತಿದೆಯೇ ಎಂಬ ಮಾಹಿತಿ ಸಿಕ್ಕಿಬಿಡುತ್ತದೆ. ಹಾಗಾಗಿ ಪ್ರಾಜೆಕ್ಟ್ ಮುಂದುವರಿಸಲು ಅರ್ಹವಿದೆಯೇ ಅಥವಾ ಅದನ್ನು ಇಲ್ಲೇ ಕೈಬಿಡಬೇಕೆ? ಎಂಬುದನ್ನು ತಕ್ಷಣ ನಿರ್ಧರಿಸಬಹುದು.

ಚಿತ್ರದಲ್ಲಿ ಕಾಣುವಂತೆ ಮಾಡೆಲ್ ಜಲಪಾತವನ್ನು ಹೋಲುವುದರಿಂದ Waterfall Model ಎಂದು ಸೂಕ್ತವಾಗಿ ನಮೀಕರಿಸಿದ್ದಾರೆ.

ಆನುಕೂಲಗಳು:

೧. ಪ್ರತಿ ಹಂತ ಒಂದೊಂದಾಗಿ ಅಸ್ತವ್ಯಸ್ತಥೆ ಇಲ್ಲದೆ ಪೂರ್ಣಗೊಳಿಸಬಹುದು.

೨. ಸರಳವಾಗಿ ನಿರ್ವಹಿಸಬಹುದಾದ ಮಾಡೆಲ್.

೩. ಸಣ್ಣ ಪ್ರಾಜೆಕ್ಟ್ ಗಳಿಗೆ ಇಲ್ಲವೇ ಗ್ರಾಹಕ ಬೇಡಿಕೆ ಪರಿಪೂರ್ಣವಾಗಿ ಗ್ರಹಿಸಿದ್ದಲ್ಲಿ ಈ ಮಾಡೆಲ್ ಅತಿಸೂಕ್ತ.

ಅನಾನುಕೂಲಗಳು:

೧. ಸಾಫ್ಟ್ ವೇರ್ ನ ವಿಸ್ತಾರವನ್ನು ಬೆಳವಣಿಗೆಯ ಹಂತದಲ್ಲಿ ಸಮೀಕರಿಸಲಾಗುವುದಿಲ್ಲ, ಹಾಗೆ ಮಾಡಿದ್ದಲ್ಲಿ ಪ್ರಾಜೆಕ್ಟ್ ವಿಫಲತೆ ಹೊಂದುತ್ತದೆ.

೨. ಧೀರ್ಘಾವಧಿಯ ಹಾಗು ಕಠಿಣವಾದ ಪ್ರಾಜೆಕ್ಟ್ ಗಳಿಗೆ ಈ ಮಾಡೆಲ್ ಹೊಂದುವುದಿಲ್ಲ.

೩. ಆಗಾಗ್ಗೆ ಬದಲಾಗುವ ಅಗತ್ಯ(requirement)ಗಳಿಗೆ ಅಳವಡಿಸಲಾಗುವುದಿಲ್ಲ.

೨. V-Shape Model (ವಿ ಆಕಾರದ ಮಾಡೆಲ್) :

ವಿ ಆಕಾರದ ಮಾಡೆಲ್, ಜಲಪಾತ ಮಾಡೆಲ್ ನಂತೆ ತನ್ನೊಳಗಿರುವ ಹಂತಗಳನ್ನು ಸರಣಿಯಲ್ಲಿ ಕಾರ್ಯನಿರ್ವಹಿಸುತ್ತದೆ. ಇಲ್ಲಿಯೂ ಸಹ ಒಂದು ಹಂತದ ಸಮಾಪ್ತಿಯ ನಂತರವೇ ಮುಂದಿನ ಹಂತ ಶುರುವಾಗುತ್ತದೆ. ಹಾಗಾದರೆ ಇದು ಜಲಪಾತ ಮಾಡೆಲ್ ಗಿಂತ ಹೇಗೆ ಭಿನ್ನ? ಇಗೋ ಉತ್ತರ ಇಲ್ಲಿದೆ!

Test plan(ಪರೀಕ್ಷಣೆ ಕಾರ್ಯವಿಧಾನ)ದ ಸೃಷ್ಟಿ ಜಲಪಾತ ಮಾಡೆಲ್ ಗೆ ಹೋಲಿಸಿದ್ದಲ್ಲಿ ಈ ಮಾಡೆಲ್ ನ ಲೈಫ್ ಸೈಕಲ್ ನಲ್ಲಿ ಮುಂಚಿತವಾಗಿಯೇ ರೂಪಿಸಲಾಗುತ್ತದೆ. ಬಹುತೇಕ ಅಗತ್ಯ(requirement) ಶೇಖರಣೆಯ ಹಂತದ ಸಮಯದಲ್ಲೇ test plan ಕಾರ್ಯ ಸಹ ಸಾಗುತ್ತದೆ. ಡೆವೆಲಪ್ಮೆಂಟ್ ಶುರುವಾಗುವ ಮುನ್ನವೇ test plan ರಚಿಸಲಾಗುತ್ತದೆ. ಇಲ್ಲಿ ಪರೀಕ್ಷಣೆಗೆ ಹಚ್ಚು ಒತ್ತಡ ನೀಡುವುದನ್ನ ಗಮನಿಸಬಹುದು.

High level design ಹಂತದಲ್ಲಿ ಸಿಸ್ಟಮ್ ಸ್ಥಾಪತ್ಯ(architechture) ಕೇಂದ್ರಬಿಂದು. ಇದೇ ಸಮಾಂತರದಲ್ಲಿ, ಚಿತ್ರದಲ್ಲಿ ತೋರಿಸಿದಂತೆ ಸಮಷ್ಟಿ ಪರೀಕ್ಷಾ ವಿಧಾನ (integration test plan) ರಚಿಸಲಾಗುತ್ತದೆ. ಪ್ರಾಡೆಕ್ಟ್ ನಲ್ಲಿರುವ ವಿವಿಧ ಉಪ ಘಟಕಗಳು ಸಂಕೀರ್ಣವಾಗಿ ಹೇಗೆ ಕಾರ್ಯನಿರ್ವಹಿಸುವುದೆಂದು ಅರಿಯಲು ಪ್ಲಾನ್ ಸಿದ್ದಪಡಿಸುತ್ತಾರೆ.

Low level design ಹಂತದಲ್ಲಿ ಪ್ರತ್ಯೇಕ ಸಾಫ್ಟ್ ವೇರ್ ನ ಉಪ ಘಟಕಗಳ ಡಿಸೈನ್ ಬರೆಯಲಾಗುವುದು. ಇದೇ ಅವಧಿಯಲ್ಲಿ ಘಟಕ ಪರೀಕ್ಷೆ(unit test) ಪ್ಲಾನ್ ಅಂದರೆ ಅಡಕವಾಗಿರುವ ಎಲ್ಲಾ ಘಟಕಗಳನ್ನು ಪ್ರತ್ಯೇಕವಾಗಿ ಪರಿಶೀಲಿಸಲು ಯೋಜನೆ ಸಿದ್ದವಾಗಿತ್ತದೆ.

ಇಂಪ್ಲಿಮೆಂಟೇಶನ್ ನಲ್ಲಿ ಈಗಾಗಲೆ ಗೊತ್ತಿರುವಂತೆ ಕೋಡ್ ಮಾಡಲಾಗುತ್ತದೆ. ಇದು ಮುಗಿದ ನಂತರ ಚಿತ್ರದಲ್ಲಿ ತೋರ್ಪಡಿಸಿದಂತೆ V ಆಕಾರದ ಬಲಭಾಗದಲ್ಲಿ ಸೂಚಿಸಿದ ಹಂತಗಳ ಕಾರ್ಯನಿರ್ವಹಣೆ ಕೆಳಗಿನಿಂದ ಮೇಲ್ಭಾಗದೆಡೆಗೆ ಸಾಗುತ್ತದೆ. ಇದೇ V ಮಾಡೆಲ್ ನ ವಿಶೇಷ!

ಹಿಂದೆ ಹೇಳಿದಂತೆ ಪರೀಕ್ಷಣೆ ಕಾರ್ಯವಿಧಾನ ಮುಂಚಿತವಾಗಿಯೇ ತಯಾರಾದ್ದರಿಂದ ಪರೀಕ್ಷೆಗಳನ್ನು ಮುಂದುವರಿಸಬಹುದು.

ಅನುಕೂಲಗಳು:

೧. ಸುಲಭವಾಗಿ ಅನುಸರಿಸಬಹುದಾದ ಮಾದರಿ.

೨. ಟೆಸ್ಟ್ ಪ್ಲಾನ್ ಮುಂಚಿತವಾಗಿಯೇ ಸಿದ್ದವಿರುವ ಕಾರಣ ಜಲಪಾತ ಮಾಡೆಲ್ ಹೋಲಿಸಿದರೆ ಯಶಸ್ಸಿನ ಸಾಧ್ಯತೆ ಇದರಲ್ಲಿ ಹೆಚ್ಚು.

೩. ಚಿಕ್ಕ ಪ್ರಾಜೆಕ್ಟ್ ಗೆ ಅತಿಸೂಕ್ತ.

ಅನಾನುಕೂಲಗಳು:

೧. ಜಲಪಾತ ಮಾಡೆಲ್ ನಂತೆ ನಿಷ್ಟುರ.

೨. ಪರೀಕ್ಷಿತ ಹಂತದಲ್ಲಿ ಏನಾದರೂ ಬದಲಾಯಿಸ ಬೇಕಾದಲ್ಲಿ ಕ್ಲೇಶನೀಯ.

೩. ಧೀರ್ಘಾವಧಿಯ ಪ್ರಾಜೆಕ್ಟ್ ಗೆ ಹೊಂದುವುದಿಲ್ಲ.

೩. Spiral Model (ಮರುಸುತ್ತಿನ ಮಾಡೆಲ್) :

ಜಲಪಾತ ಮಾಡೆಲ್ ಗೆ ಹೋಲಿಸಿದರೆ ಇದರಲ್ಲಿ ಪಾಲ್ಗೊಳ್ಳುವ ಪ್ರಕ್ರಿಯೆ ತೀರ ಅಭಿಮುಖವಾಗಿದೆ. ಇಲ್ಲಿಯ ವಿಷೇಶವೆಂದರೆ ಪ್ರಾಜೆಕ್ಟ್ ಬೆಳವಣಿಗೆಯಲ್ಲಿ ಒಳಗಾಗಬಹುದಾದಂತಹ ಅಪಾಯದ(risk) ಪರಿಶೀಲನೆಗೆ ಹೆಚ್ಚು ಪ್ರಾಮುಖ್ಯತೆ ನೀಡಲಾಗುತ್ತದೆ. ಸ್ಪೈರಲ್ ಮಾಡೆಲ್ ನಲ್ಲಿ ೪ ಪ್ರಮುಖ ಹಂತಗಳಿದೆ.

೧. ಪ್ಲಾನಿಂಗ್ (planning)

೨. ಅಪಾಯ ಪರಿಶೀಲನೆ (risk analysis)

೩. ಇಂಜಿನಿಯರಿಂಗ್(engineering)

೪. ಎವಲ್ಯೂಷನ್ (evolution)

ಸಾಫ್ಟ್ ವೇರ್ ಉತ್ಪಾದನೆಯಲ್ಲಿ ಪುನಃ ಪುನಃ ಈ ನಾಲ್ಕೂ ಹಂತದ ಸುತ್ತುಗಳನ್ನು(ಸ್ಪೈರಲ್) ನಿರ್ವಹಿಸುತ್ತದೆ. ಆದ್ದರಿಂದ ಇದನ್ನು ಸ್ಪೈರಲ್ ಮಾಡೆಲ್ ಎಂದು ಕರೆಯುತ್ತಾರೆ.

ಪ್ಲಾನಿಂಗ್ ಹಂತದಲ್ಲಿ ಗ್ರಾಹಕರ ಬೇಡಿಕೆಗಳನ್ನು ಶೇಖರಿಸಿಡಲಾಗುತ್ತದೆ. ಅಪಾಯ ಪರಿಶೀಲನೆ ನಲ್ಲಿ ಪ್ರಾಜೆಕ್ಟ್ ನಲ್ಲಿ ಅಳವಡಿಸಿದ ಕಾರ್ಯವಿಧಾನದಲ್ಲಿವುಂಟಾಗುವ ಅಪಾಯಗಳನ್ನು ಗ್ರಹಿಸಿ, ಅದಕ್ಕೆ ಪರಿಹಾರವನ್ನೂ ಆಲೋಚಿಸಲಾಗುತ್ತದೆ. ಹಂತದ ಕೊನೆಯಲ್ಲಿ ಪ್ರಥಮ ಮಾದರಿಯನ್ನು(prototype) ತಯಾರಿಸುತ್ತಾರೆ. ಇಂಜಿನಿಯರಿಂಗ್ ಹಂತದಲ್ಲಿ ಸಾಫ್ಟ್ ವೇರ್ ಅನ್ನು ಸಾದರಪಡಿಸಲಾಗುವುದು. ಅಂತೆಯೇ ಸಾಫ್ಟ್ ವೇರ್ ನ ಪರೀಕ್ಷೆ ಸಹ ಹಂತದ ಕೊನೆಯಲ್ಲಿ ಶುರುವಾಗುತ್ತದೆ.

ಎವಲ್ಯೂಷನ್ ಫೇಸ್ ನಲ್ಲಿ ಗ್ರಾಹಕರು, ಉತ್ಪಾದಿಸಿದ ಪ್ರಾಡೆಕ್ಟ್ ನನ್ನು ಎಲ್ಲಾ ರೀತಿಯಿಂದಲೂ ಪರಿಶೀಲಿಸುತ್ತಾರೆ. ಇವೆಷ್ತು ಸಾಫ್ಟ್ ವೇರ್ ನ ಒಂದು ಫೇಸ್. ಸ್ಪೈರಲ್ ಮಾಡೆಲ್ ನಲ್ಲಿ ಸಾಫ್ಟ್ ವೇರ್ ನನ್ನು ಒಮ್ಮೆಗೆ ಸ್ವಾಧೀನಮಾಡುವುದಿಲ್ಲ. ಬಹು ಭಾಗಗಳಾಗಿ(ಫೇಸ್) ಗ್ರಾಹಕರಿಗೆ ನೀಡುತ್ತಾರೆ. ಒಂದು ಫೇಸ್ ಪೂರ್ಣವಾದ ಮೇಲೆ ಪುನಃ ಸಾಫ್ಟ್ ವೇರ್ ನಲ್ಲಿ ತೋರಿಸಿದಂತೆ ನಲ್ಕೂ ಹಂತಗಳೂ ಕಾರ್ಯಗತವಾಗುತ್ತದೆ.

ಅನುಕೂಲಗಳು:

೧. ಹೆಚ್ಚಿನ ಪ್ರಮಾಣದಲ್ಲಿ ಮುಂದೆ ಉಂಟಾಗುವ ಅಪಾಯಗಳ(ರಿಸ್ಕ್) ಪರಿವೀಕ್ಷಣೆ.

೨. ವ್ಯಾಪಕವಾದ ಹಾಗು ಕಠಿಣವಾದ ಪ್ರಾಜೆಕ್ಟ್ ಗಳಿಗೆ ಹೇಳಿಮಾಡಿಸಿದ ಮಾಡೆಲ್.

೩. waterfall ನಲ್ಲಿ SDLCನ ಎಲ್ಲಾ ಹಂತಗಳು ಪರಿಪೂರ್ಣವಾಗುವವರೆಗು ಸಾಫ್ಟ್ ವೇರ್ ಪ್ರಕಟಿಸುವುದಿಲ್ಲ. ಆದರೆ ಸಾಫ್ಟ್ ವೇರ್ ಸ್ವಾಧೀನವನ್ನು ಫೇಸ್ ರೂಪದಲ್ಲಿ ಕೊಡುವುದರಿಂದ ಕಾಯುವಷ್ಟಿಲ್ಲ.

ಅನಾನುಕೂಲಗಳು:

೧. ಅನುಕರಣೆಗೆ ದುಬಾರಿಯಾದ ಮಾಡೆಲ್.

೨. ರಿಸ್ಕ್ ಅನಾಲಿಸಿಸ್ ಗೆ ವಿಶೇಷ ನಿಪುಣರ ಅಗತ್ಯವಿದೆ.

೩. ಪ್ರಾಜೆಕ್ಟ್ ನ ಯಶಸ್ಸು ರಿಸ್ಕ್ ಅನಾಲಿಸಿಸ್ ಹಂತದ ಆಧಾರದ ಮೇಲಿರುತ್ತದೆ.

೪. ಸಣ್ಣ ಪುಟ್ಟ ಪ್ರಾಜೆಕ್ಟ್ ಗಳಿಗೆ ಅನುಚಿತ.

ಇಂತಿಷ್ಟು SDLC ಕುರಿತು ಸಂಕ್ಷಿಪ್ತ ಲೇಖನ. ತಂತ್ರಾಂಶ ಅಭಿವೃದ್ಧಿ ಪ್ರಪಂಚಕ್ಕೆ ಇವು ಒಂದು ಆಡಿಪಾಯ, ಮೊದಲ ಹೆಜ್ಜೆ ಮಾತ್ರ! ಇದರ ವ್ಯಾಪ್ತಿ ಅಪಾರ.

ಎಂ.ಕೆ. ರೇಖಾವಿಜೇಂದ್ರ ಕನ್ನಡ ಪ್ರೇಮಿ ಸ್ನೇಹಿತರಿಗೆ ವಂದನೆಗಳು. ನನ್ನ ಸಂಕ್ಷಿಪ್ತ ಪರಿಚಯ: “ನಮ್ಮ ಬೆಂಗಳೂರಿನ” ನಿವಾಸಿ, ವಿದ್ಯಾಭ್ಯಾಸ-ಬಿ.ಇ. ಕಂಪ್ಯೂಟರ್ ಸೈನ್ಸ್, ಉದ್ಯೋಗ-ಸೀನಿಯರ್ ಸಾಫ್ಟ್ ವೇರ್ ಇಂಜಿನಿಯರ್. ತಾಂತ್ರಿಕ ಕನ್ನಡ ಜಗತ್ತಿಗೆ ಈಗಷ್ಟೇ ಅಂಬೆಗಾಲಿಡುತ್ತಿದ್ದೇನೆ. ಸಂಗೀತ ಹಾಗು ನೃತ್ಯದಲ್ಲಿ ಆಸಕ್ತಿ. ಪ್ರವಾಸವೆಂದರೆ ಅಚ್ಚುಮೆಚ್ಚು. ಇಡೀ ಪ್ರಪಂಚದ ನೈಸರ್ಗಿಕ ಸೌಂದರ್ಯವನ್ನು ನನ್ನ ಕಣ್ಣುಗಳಲ್ಲಿ ತುಂಬಿಕೊಳ್ಳುವ ಹೆಬ್ಬಯಕೆ.
ಮುಂದೆ ಓದಿ

ಅಲೆ ೫ – ಸುರಕ್ಷೆಯ ಅಲೆ – ವೈಯಕ್ತಿಕ ಗಣಕತಂತ್ರಗಳ ಸುರಕ್ಷೆಯ ಮಾರ್ಗದರ್ಶಿ

ಪ್ರಕಟಿಸಿದ್ದು ದಿನಾಂಕ Aug 5, 2011 ವಿಭಾಗ 2011, ale | 0 ಪ್ರತಿಕ್ರಿಯೆಗಳು

ಗಣಕಯಂತ್ರ ಹಾಗೂ ಮಾಹಿತಿ ತಂತ್ರಜ್ನಾನದ ಅಲೆಗಳು ಎಲ್ಲಾ ವರ್ಗದ ಜನರ ತಲುಪಿದಂತೆ, ಅದರ ಸುರಕ್ಷೆಯ ಬಗೆಗಿನ ಅರಿವು ಎಲ್ಲರನ್ನು ತಲುಪಿಲ್ಲ. ಗಣಕಯಂತ್ರ ನಮ್ಮ ದಿನನಿತ್ಯದ ಬೇಕು ಬೇಡಗಳನ್ನು ಸುಲಭವಾಗಿ ಪೂರೈಸುವುದರ ಜೊತೆಗೆ, ಅದರ ಸುರಕ್ಷೆಯ ಕೊರತೆಯಿಂದಾಗಿ ನಮ್ಮ ವೈಯಕ್ತಿಕ ಮಾಹಿತಿಗಳನ್ನು ಬೇರೆಯವರಿಗೆ ರವಾನಿಸುತ್ತಿದೆ. ತಂತ್ರಜ್ನಾನವು ಬೆಳೆದಂತೆ ಮುಖ್ಯಮಾಹಿತಿಗಳನ್ನು ಅಕ್ರಮವಾಗಿ ಸಂಪಾದಿಸುವ ಜನರು ಹಾಗು ಅದಕ್ಕೆ ಸಹಾಯಕಾರಿಯಾಗುವ ತಂತ್ರಾಂಶಗಳು ಮೂಡುತ್ತಿವೆ. ಇವೆಲ್ಲದಕ್ಕು ಕಡಿವಾಣ ಹಾಕಲು ಹಾಗು ನಿಮ್ಮ ವೈಯಕ್ತಿಕ ಗಣಕತಂತ್ರಗಳ ರಕ್ಷಿಸಲು ಸಹಾಯವಾಗುವ ಕೆಲವು ಮಾರ್ಗಗಳನ್ನು ಹಂಚಿಕ್ಕೊಳ್ಳುವುದು ಈ ಅಲೆಯ ಉದ್ದೇಶ.

ವೈಯಕ್ತಿಕ ಗಣಕತಂತ್ರಗಳನ್ನು (Personal Computer) ಉಪಯೋಗಿಸಲು ತಂತ್ರಜ್ನಾನ/ತಂತ್ರಾಂಶಗಳ ಗೊತ್ತಿಲ್ಲದ ಸಾಮಾನ್ಯ ವರ್ಗದ ಜನರಿಂದಲೂ ಸಾಧ್ಯವಾಗಿರುವ ಇತ್ತೀಚಿನ ದಿನಗಳಲ್ಲಿ ಸುರಕ್ಷೆಯ ಬಗೆಗಿನ ತಿಳುವಳಿಕೆ ಇಲ್ಲವಾಗಿದೆ. ಆದುದರಿಂದ ಮನೆಗಳಲ್ಲಿ ಬಳಸುವ ಗಣಕತಂತ್ರಗಳು ಸುಲಭವಾಗಿ attackerಗಳ ಗುರಿಯಾಗಿವೆ. ಜನ ಸಾಮಾನ್ಯರು ಎಲ್ಲವನ್ನು ನಂಬಿಕೆಯ ನೇರವಾದ ದೃಷ್ಟಿಕೋನದಲ್ಲಿ ನೋಡುತ್ತಾರೆ. ಆದರೆ attackerಗಳ ಮನೋಸ್ಥಿತಿ ಅದರ ತದ್ವಿರುದ್ಧವಾಗಿರುತ್ತದೆ. attackerಗಳು ಯಾವಾಗಲು ಯಾವುದಾದರು ತಂತ್ರಾಂಶಗಳ ಲೋಪ(vulnerability)ಗಳು, ಅಕ್ರಮ ಪ್ರವೇಶದ್ವಾರಗಳ ಇರುವಿಕೆಗೆ ಶೋಧಿಸುತ್ತಿರುತ್ತಾರೆ. ಈ ಕೆಲಸಗಳನ್ನು ಸುಲಭವಾಗಿಸಲು ಅನೇಕ attackerಗಳು ಈಗಾಗಲೇ ಸಿದ್ಧ ಪಡಿಸಿರುವ ತಂತ್ರಾಂಶಗಳ ಮೊರೆ ಹೋಗುತ್ತಾರೆ. ಇವೆಲ್ಲವನ್ನು ನಿಯಂತ್ರಿಸಲು ಸುರಕ್ಷೆಯ ಅರಿವಿನ ಅಗತ್ಯವಿದೆ. ಕಂಪ್ಯೂಟರ್ ಸುರಕ್ಷತೆಯ ಕೆಲವು ಸುಲಭ ರೀತಿಯ ಮಾರ್ಗಗಳೆಂದರೆ:
ಆಂಟಿವೈರಸ್ ಬಳಸುವುದು
ಕಂಪ್ಯೂಟರ್ ಕೊಂಡ ತಕ್ಷಣ ನಮ್ಮಲ್ಲಿರುವ ಹಳೆಯ ಫ್ಲಾಪಿ, ಯುಎಸ್‌ಬಿ ಅಥವಾ ಸಿಡಿ, ಇತ್ಯಾದಿಗಳನ್ನು ಬಳಸುವುದು ಸಾಮಾನ್ಯ. ನಿಮ್ಮ ಕಂಪ್ಯೂಟರಿನಲ್ಲಿರುವ ತಂತ್ರಾಂಶಗಳು ಮತ್ತು ಕಡತಗಳು ಸುರಕ್ಷಿತವಾಗಿವೆಯೇ? ಈಗ ನೀವು ಬಳಸಲು ಹೊರಟಿರುವ ಈ ಹೊರಗಿನ ಡಿಸ್ಕ್ ಗಳು ವೈರಸ್, ಮಾಲ್ವೇರ್, ಟ್ರೋಜೋನ್ ಹೀಗೆ ಹತ್ತು ಹಲವು ಭಯಾನಕ ಹೆಸರಿನ ಹಾನಿಕಾರಕ ದಾತುಗಳನ್ನು ತಮ್ಮಲ್ಲಿ ಹೊಂದಿಲ್ಲವೆನ್ನುವುದನ್ನು ಖಚಿತ ಪಡಿಸಿಕೊಳ್ಳಲು ನಿಮ್ಮ ಕಂಪ್ಯೂಟರಿನಲ್ಲಿ ವ್ಯವಸ್ಥೆ ಇದೆಯೇ? ಹಾಗೆಯೇ ನಿಮ್ಮ ಕಂಪ್ಯೂಟರ್ಗಳು ಅಂತರ್ಜಾಲ ಸಂಪರ್ಕ ಹೊಂದಿದಾಗ ನೀವು ಸಂರಕ್ಷಿಸಿರುವ ಮಾಹಿತಿಗಳು ಸುರಕ್ಷಿತವಾಗಿವೆಯೇ?
ಆಂಟಿವೈರಸ್ಗಳು ಈ ಸಂದರ್ಭದಲ್ಲಿ ಬಳಕೆಗೆ ಬರುತ್ತವೆ. ಆಂಟಿವೈರಸ್ ತಂತ್ರಾಂಶಗಳು ಕಂಪ್ಯೂಟೆರ್ ವೈರಸ್ಗಳು, ಮಾಲ್ವೇರ್, ವರ್ಮ್, ಇತ್ಯಾದಿ ಹಾನಿಕಾರಕ ದತ್ತಾಂಶಗಳನ್ನು ನಿಮ್ಮ ಕಂಪ್ಯೂಟರ್ಗಳಿಗೆ ವರ್ಗಾಯಿಸುವದನ್ನು ತಡೆಯುವಲ್ಲಿ ಸಹಾಯ ಮಾಡುತ್ತವೆ. ಈ ತಂತ್ರಾಂಶಗಳು ಯಾವುದೇ ಕಡತಗಳನ್ನು ನಿಮ್ಮ ಕಂಪ್ಯೂಟರ್ನಿಂದ ಬೇರೊಂದು ಕಂಪ್ಯೂಟರ್ಗೆ ಅಥವಾ ಬೇರೊಂದು ಕಂಪ್ಯೂಟರ್ನಿಂದ ನಿಮ್ಮ ಕಂಪ್ಯೂಟರ್ಗಳಿಗೆ ರವಾನಿಸುವಾಗ, ಹಾನಿಕಾರಕ ಅಂಶಗಳಿವೆಯೇ ಎಂದು ಶೋಧಿಸಿ ತದ ನಂತರ ಕಡತಗಳ ರವಾನೆಗೆ ಅನುಮತಿ ನೀಡುತ್ತದೆ. ಯಾವುದೇ ಅಕ್ರಮ ಪ್ರವೇಶ ದ್ವಾರಗಳನ್ನು ಮುಚ್ಚುತ್ತದೆ. ಅಂತೆಯೇ ಅಂತರ್ಜಾಲವನ್ನು ಸಂಪರ್ಕಿಸಿದಾಗ ನಿಮ್ಮ ಕಂಪ್ಯೂಟರ್ನಿಂದ ಮುಖ್ಯ ಮಾಹಿತಿಗಳ ಸೋರಿಕೆಯಾಗದಂತೆ ನೋಡಿಕೊಳ್ಳುತ್ತದೆ.
ಮಾರ್ಗದರ್ಶಿ ಸೂಚನೆಗಳು:
೧.ಪ್ರತಿಷ್ಠಿತ ಕಂಪೆನಿಯೊಂದರ ಆಂಟಿವೈರಸ್ ತಂತ್ರಾಂಶಗಳನ್ನು install ಮಾಡಿಕೊಳ್ಳಿ.

ಉದಾ: Kasperksy, Trend Micro, Symatec, Mcafee, AVG, ಮುಂತಾದವು
೨.ಎಲ್ಲಾ ಸಮಯದಲ್ಲೂ ಅದು ನಿಮ್ಮ ಕಂಪ್ಯೂಟರ್ನ್ನು ಗಮನಿಸುವಂತೆ configure ಮಾಡಿಕೊಳ್ಳಿ.
೩.ದಿನಂಪ್ರತಿ ಹೊಸ ಹೊಸ ವೈರಸ್ಗಳ ಇರುವಿಕೆಗಳನ್ನು ಗುರುತಿಸುವ ಧಾತುಗಳನ್ನು (Virus update)ಸ್ವಯಂಚಾಲಿತವಾಗಿ update ಆಗುವಂತೆ ನೋಡಿಕೊಳ್ಳಿ. ಪರವಾನಗಿಯಿರುವ ಆಂಟಿವೈರಸ್ ತಂತ್ರಾಂಶಗಳಲ್ಲಿ ಈ ರೀತಿಯ ಸೌಲಭ್ಯವನ್ನು ಉಚಿತವಾಗಿ ಪಡೆಯಬಹುದು.
೪.ನೀವು ಬಳಸುವ ಪ್ರತಿಯೊಂದು ಡಿಸ್ಕ್, ಉ.ಎಸ್.ಬಿ ಡ್ರೈವ್ ಗಳನ್ನು, ಇನ್ನು ಮುಂತಾದುವುಗಳನ್ನು ಬಳಸುವ ಮೊದಲು ಆಂಟಿವೈರಸ್ ತಂತ್ರಾಂಶಗಳ ಸಹಾಯದಿಂದ ವೈರಸ್ ಇಲ್ಲದಿರುವಿಕೆಯನ್ನು ಖಾತ್ರಿ ಮಾಡಿಕೊಳ್ಳಿ.
೫.ವಾರಕ್ಕೊಮ್ಮೆ ಅಥವಾ ತಿಂಗಳಿಗೊಮ್ಮೆ ನಿಮ್ಮ ಕಂಪ್ಯೂಟರ್ನ್ನು ಸಂಪೂರ್ಣವಾಗಿ scan ಆಗುವಂತೆ ಸಮಯ ನಿಗದಿಸಿಕೊಳ್ಳಿ. ಹಾಗು ಯಾವುದೇ ಹಾನಿಕಾರಕ ಕಡತಗಳು ದೊರೆತಾಗ ಅದರ ಸೋಂಕು ನಿವಾರಿಸಿಕೋಳ್ಳಿ. ಇಲ್ಲವಾದಲ್ಲಿ ಎಲ್ಲಾ ದೋಷಿತ ಕಡತಗಳನ್ನು ತೆಗೆದು ಹಾಕಿ.

ತಂತ್ರಾಂಶಗಳನ್ನು ಅಪ್ಡೇಟ್ ಮಾಡುವುದು
ಆಪರೇಟಿಂಗ್ ಸಿಸ್ಟೆಮ್ ಗಳು ಅಥವಾ ಅದರಲ್ಲಿ ಅನುಸ್ಥಾಪಿತವಾಗಿರುವ ವಿವಿಧ ತಂತ್ರಾಂಶಗಳಲ್ಲಿರುವ ಅನೇಕ ರೀತಿಯ ಲೋಪದೋಶಗಳಿಂದಾಗಿ attackerಗಳು ಬಳಕೆದಾರರ ಗಮನಕ್ಕೆ ಬಾರದಂತೆ ಅವರ ಕಂಪ್ಯೂಟರ್ ಗಳಿಗೆ ಅಕ್ರಮ ಪ್ರವೇಶ ಪಡೆಯುವ ಸಾಧ್ಯತೆಗಳಿವೆ. ಅಂತರ್ಜಾಲ ಸಂಪರ್ಕ ಹೊಂದಿದ ಕಂಪ್ಯೂಟರ್ ಗಳು ಈ ರೀತಿಯ ಆಕ್ರಮಣಕ್ಕೆ ಹೆಚ್ಚು ಪ್ರಕಟಿತವಾಗಿರುತ್ತವೆ. ಈ ಕಾರಣದಿಂದಾಗಿ ಆಪರೇಟಿಂಗ್ ಸಿಸ್ಟೆಮ್ ಗಳು ಹಾಗು ತಂತ್ರಾಂಶಗಳನ್ನು ಅಭಿವೃದ್ದಿಪಡಿಸುವವರು ನಿಗದಿತ ಸಮಯದಲ್ಲಿ ಅಥವಾ ವೈರಸ್, ವರ್ಮ್, ತಂತ್ರಾಂಶ ದೋಶಗಳು ಪ್ರಕಟಿತ ಸಮಯಗಳಲ್ಲಿ ಅಪ್ಡೇಟ್/ಪ್ಯಾಚ್(Patch)ಗಳನ್ನು ಹೊರಡಿಸುತ್ತಾರೆ. ಪ್ರತಿಷ್ಟಿತ ಕಂಪನಿಯವರಲ್ಲದೆ ಮುಕ್ತ ತಂತ್ರಾಂಶಗಳು ನಿಯಮಿತ ಅವಧಿಯಲ್ಲಿ ಪ್ಯಾಚ್ ಗಳನ್ನು ಹೊರಡಿಸುತ್ತಾರೆ.
ಅಪ್ಡೇಟ್/ಪ್ಯಾಚ್ ಗಳು ತಂತ್ರಾಂಶಗಲ್ಲಿರುವ ದೋಶಿತ ಪ್ರೊಗ್ರಾಮ್ ಗಳನ್ನು ಸರಿಪಡಿಸುವ ಚಿಕ್ಕ ಚಿಕ್ಕ ಕಡತಗಳು. ಈ ಪ್ಯಾಚ್ ಗಳನ್ನು ಅಳವಡಿಸಿಕೊಳ್ಳುವುದರ ಮೂಲಕ ನಿಮ್ಮ ತಂತ್ರಾಂಶಗಳನ್ನು ಹಾನಿಗೊಳಗಾಗದಂತೆ ರಕ್ಷಿಸಬಹುದು. ಇವುಗಳಲ್ಲಿ ಬಹುಪಾಲು ಅಪ್ಡೇಟ್ ಗಳು ಬಳಕೆದಾರರ ಸಹಾಯವಿಲ್ಲದೆ install ಮಾಡಬಹುದು. ಕೆಲವೊಮ್ಮೆ ಇಡೀ ತಂತ್ರಾಂಶವನ್ನು ಮರು ಪ್ರಕಟಿಸುತ್ತಾರೆ. ಇಂತಹ ಸಂದರ್ಭಗಳಲ್ಲಿ ತಂತ್ರಾಂಶವನ್ನು ಮರುಸ್ಥಾಪಿಸಿವುದು ಒಳಿತು.
ಮಾರ್ಗದರ್ಶಿ ಸೂಚನೆಗಳು:
೧. ಆಪರೇಟಿಂಗ್ ಸಿಸ್ಟೆಮ್ ಗಳ ಅಪ್ಡೇಟ್ ಗಳನ್ನು ತಿಂಗಳಿಗೊಮ್ಮೆ ಪರೀಕ್ಷಿಸಿ install ಮಾಡಿಕೊಳ್ಳಿ.

ಉದಾ: Microsoft Windows ಹೊಂದಿದವರು ಪ್ರತಿ ತಿಂಗಳ ಎರಡನೆಯ ಬುಧವಾರದಂದು ಅಪ್ಡೇಟ್ ಮಾಡಿಕೊಳ್ಳಬಹುದು. ಏಕೆಂದರೆ Microsoft Windows ಕಂಪನಿಯು ಪ್ರತಿ ತಿಂಗಳ ಎರಡನೆಯ ಮಂಗಳವಾರದ (Patch Tuesday) ರಾತ್ರಿ ಅಪ್ಡೇಟ್ ಬಿಡುಗಡೆಮಾಡುತ್ತದೆ. ಈ ಅಪ್ಡೇಟ್ ಅನ್ನು ಸ್ವಯಂಚಾಲಿತ ಪ್ರೊಗ್ರಾಮ್ ಮುಖಾಂತರ ಅಪ್ಡೇಟ್ ಮಾಡಬಹುದು.

೨. ಕಂಪ್ಯೂಟರ್ ನಲ್ಲಿರುವ ತಂತ್ರಾಂಶಗಳನ್ನು ಗಮನಿಸಿ ಹಾಗು ತಿಂಗಳಿಗೊಮ್ಮೆ ಅಪ್ಡೇಟ್ ಗಳ ಲಭ್ಯತೆಯನ್ನು ಪರೀಕ್ಷಿಸಿ.
ಉದಾ: Adobe ಪಾಚ್ ಗಳು Microsoft Windows ಪಾಚ್ ಗಳ ಆಸು ಪಾಸಿನಲ್ಲಿ ತಮ್ಮ ಅಪ್ಡೇಟ್ ಗಳನ್ನು ಪ್ರಕಟಿಸುತ್ತವೆ.
Mozilla Firefox ಬ್ರೌಸರ್ ಗಳು ಅಪ್ಡೇಟ್ ಗಳನ್ನು ಪಾಪ್ ಅಪ್ ಮುಖಾಂತರ ಬಳಕೆದಾರರಿಗೆ ಎಚ್ಚರಿಸುತ್ತವೆ.

ಇ-ಮೈಲ್ ಬಳಕೆಯ ವೇಳೆ ಎಚ್ಚರ ವಹಿಸಿ
ಇ-ಮೈಲ್ ಬಳಕೆ ಹೆಚ್ಚುತ್ತಿರುವ ಇತ್ತೀಚಿನ ದಿನಗಳಲ್ಲಿ ಅದರಿಂದಾಗುವ ದುಷ್ಪರಿಣಾಮಗಳನ್ನು ದೂರಮಾಡಲು ಈ ಕೆಳಗೆ ನೀಡಿರುವ ಅಂಶಗಳ ಬಗ್ಗೆ ಗಮನಿಸಿ.
ಮಾರ್ಗದರ್ಶಿ ಸೂಚನೆಗಳು:
೧. ಇ-ಮೈಲ್ಸ್ ನಲ್ಲಿ ಬರುವ ಸಂದೇಶ ಹಾಗು ಚಿತ್ರಗಳ ಮುನ್ನೋಟವನ್ನು disable ಮಾಡಿ.

೨. ಇ-ಮೈಲ್ಸ್ ನಲ್ಲಿ ಬರುವ attachment ಗಳನ್ನು ಡೌನ್ಲೋಡ್ ಮಾಡುವ ಮೊದಲು ಆಂಟಿವೈರಸ್ ತಂತ್ರಾಂಶಗಳು ಸ್ವಯಂಚಾಲಿತವಾಗಿ ಸ್ಕಾನ್ ಮಾಡುವಂತೆ configure ಮಾಡಿಕೊಳ್ಳಿ.
೩. ನಿಮಗೆ ತಿಳಿಯದ ವ್ಯಕ್ತಿಗಳಿಂದ ಬರುವ ಸಂದೇಶಗಳನ್ನು ನೋಡುವ ಮೊದಲು ಅದರ ‘ವಿಷಯ’ ವನ್ನೊಮ್ಮೆ ಗಮನಿಸಿ. ನಿಮಗಲ್ಲದ ಸಂದೇಶವೆನೆಸುವ ಸಂದೇಶಗಳಲ್ಲಿ ಕೊಟ್ಟಿರುವ ಯಾವುದೇ ಕುತೂಹಲ ಕೆರಳಿಸುವ ಹೊಸ ಲಿಂಕ್ ಗಳನ್ನು ನೋಡಬೇಡಿ ಹಾಗು ರೆಪ್ಲೆ ಮಾಡಬೇಡಿ.
೪. ಇ-ಮೈಲ್ ಪಾಸ್ವರ್ಡ್ ಗಳನ್ನು ತಿಂಗಳಿಗೊಮ್ಮೆ ಬದಲಾಯಿಸಿ ಹಾಗು ಯಾರೊಂದಿಗು ಹಂಚಿಕೊಳ್ಳಬೇಡಿ. ಪಾಸ್ವರ್ಡ್ ಗಳನ್ನು ಬ್ರೌಸರ್ ಗಳಲ್ಲಿ ಸ್ಟೋರ್ ಮಾಡಬೇಡಿ. ಕ್ಲಿಷ್ಟಕರ ಪಾಸ್ವರ್ಡ್ ಬಳಸುವುದು ಉತ್ತಮ.
೫. ಯಾವುದೇ ಮುಖ್ಯ ಮಾಹಿತಿಗಳನ್ನು ಇತರರಿಗೆ ಕಳುಹಿಸುವಾಗ ಎಚ್ಚರ ವಹಿಸಿ. ಬ್ಯಾಂಕ್ account no. ಇತ್ಯಾದಿ ವೈಯುಕ್ತಿಕ ಮಾಹಿತಿಗಳನ್ನು ಪರಿಚಯವಲ್ಲದವರಿಗೆ ಅಥವಾ ಬ್ಯಾಂಕ್ ಕಚೇರಿಗಳಿಗೆ ಕಳುಹಿಸಬೇಡಿ.
೬. ಫಿಶಿಂಗ್ ಇ-ಮೈಲ್ಸ್ ಗಳ ಬಗ್ಗೆ ತಿಳಿದುಕೊಳ್ಳಿ.

ಬ್ಯಾಕ್‌ಅಪ್ ತೆಗೆದಿಡುವುದು.
ಕಂಪ್ಯೂಟರ್ ಗಳನ್ನು ವೈಯುಕ್ತಿಕ ಮಾಹಿತಿ/ದಾಖಲೆಗಳನ್ನು ಸಂರಕ್ಷಿಡುವ ಸಾಧನವಾಗಿಯೂ ಬಳಕೆಯಲ್ಲಿದೆ. ಈ ಸಂದರ್ಭಗಳಲ್ಲಿ ಸುರಕ್ಷೆಯ ಮಾರ್ಗಗವೆಂದರೆ ಬ್ಯಾಕ್‌ಅಪ್ ತೆಗೆದಿಡುವುದು,
ಮಾರ್ಗದರ್ಶಿ ಸೂಚನೆಗಳು:
೧. ಮುಖ್ಯ ಮಾಹಿತಿಗಳಿರುವ ಎಲ್ಲಾ ಕಡತಗಳು ಹಾಗು ಫೋಲ್ಡರ್ ಗಳನ್ನು ಪಾಸ್ವರ್ಡ್ ಕೊಟ್ಟು ನಿಗದಿತ ಸಮಯಕ್ಕೆ ಬ್ಯಾಕ್‌ಅಪ್ ತೆಗೆದುಕೊಳ್ಳಿ.

೨. ಬ್ಯಾಕ್‌ಅಪ್ ಡಿಸ್ಕ್ ಗಳನ್ನು ಎನ್ಕ್ರಿಪ್ಟ್ ಮಾಡಿಟ್ಟುಕೊಳ್ಳಿ. ಹೊಸ ಮಾಹಿತಿಗಳನ್ನು ಬ್ಯಾಕ್‌ಅಪ್ ಡಿಸ್ಕ್ ಗಳಿಗೆ ರವಾನಿಸುವ ಮೊದಲು ಸ್ಕಾನ್ ಮಾಡಿ.
೩. ಅಂತರ್ಜಾಲ ತಾಣಗಳಲ್ಲೂ ನಿಮ್ಮ ಮಾಹಿತಿಗಳನ್ನು ಸಂಗ್ರಹ ಮಾಡಬಹುದು. ಇಂತಹ ಸೇವೆಯಲ್ಲಿರುವ ಸಂಸ್ಥೆಗಳು ನಿಮ್ಮ ಮಾಹಿತಿಗಳನ್ನು ಸುರಕ್ಷಿಸುವ ಮಾರ್ಗಗಳನ್ನು ಪರೀಕ್ಷಿಸಿ ನಂತರ ಅಯ್ಕೆ ಮಾಡಿ.

***

ಇಷ್ಟೆಲಾ ಮಾಹಿತಿಗಳಿಗೂ ಅರಿವಿನ ಅಲೆಗಳಿಗೂ ಏನು ಸಂಬಂದವೆಂದು ಯೋಚಿಸುತ್ತಿರುವಿರಾ? ಈ ಎಲ್ಲಾ ವಿಚಾರಗಳೂ ಸಾಮಾನ್ಯ ಕಂಪ್ಯೂಟರ್ ಬಳಕೆದಾರನಿಗೆ ಬಹುಮುಖ್ಯವಾಗಿ ಬೇಕಾದವುಗಳು. ಜೊತೆಗೆ ಈ ಕೆಳಗಿನ ವಿಷಯಗಳನ್ನು ಗಮನಿಸಿ.
ಯುನಿಕ್ಸ್ , ಗ್ನು/ಲಿನಕ್ಸ್ ಆಪರೇಟಿಂಗ್ ಸಿಸ್ಟಂಗಳು ಮತ್ತು ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶಗಳು ಸುರಕ್ಷತೆಯ ಹೊಸ ಸೂತ್ರವನ್ನು ಕಂಪ್ಯೂಟರ್ ಬಳಕೆದಾರನ ಮುಂದಿಟ್ಟಿವೆ. ಖಾಸಗಿ ಸಂಸ್ಥೆಗಳ ತಂತ್ರಾಂಶಗಳಿಂದ ಸಾಮಾನ್ಯನ ಖಾಸಗಿ ಗುಟ್ಟುಗಳು ಮತ್ತು ಮಾಹಿತಿಗಳು ಪರರ ಪಾಲಾಗುವುದನ್ನು ಅರಿತ ಕೆಲವು ನುರಿತ ಕಂಪ್ಯೂಟರ್ ತಂತ್ರಜ್ಞರು, ಹಾರ್ಡ್ವೇರ್ ಕೊಳ್ಳುವುದರ ಜೊತೆಗೆ ಅದನ್ನು ಬಳಸಲು ಬೇಕಿರುವ ಸಾಫ್ಟ್ವೇರ್ ಕೂಡ ಮುಕ್ತವಾಗಿ ಹಾಗೂ ಎಲ್ಲ ರೀತಿಯ ಸ್ವಾತಂತ್ರ್ಯವನ್ನು ಬಳಕೆದಾರನಿಗೆ ಕೊಡಬೇಕು ಎಂದು ಪ್ರಾರಂಭಿಸಿದ ಯೋಜನೆ, ಇಂದು ಕಂಪ್ಯೂಟರ್ ಅನ್ನು ಸುರಕ್ಷಿತವಾಗಿ ಬಳಕೆದಾರ ತನ್ನಿಚ್ಚೆ ಬಂದಂತೆ ಬಳಸಲು ಅನುವಾಗಿಸಿದೆ.
ಈ ಮೇಲೆ ನಮೂದಿಸಿದ ಆಪರೇಟಿಂಗ್ ಸಿಸ್ಟಮ್‌ಗಳು ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶಗಳ ಆವೃತ್ತಿಗಳಾಗಿದ್ದಲ್ಲಿ ಅವುಗಳಲ್ಲಿನ ಸುರಕ್ಷತಾ ಸೋಂಕುಗಳು ಕಂಡೊಡನೆಯೇ ಪ್ರಪಂಚದ ಇನ್ಯಾವುದೋ ಮೂಲೆಯಲ್ಲಿರುವ ತಂತ್ರಜ್ಞ ಅದಕ್ಕೆ ಮುಲಾಮನ್ನು ಕಂಡುಕೊಂಡು ಇತರರೊಡನೆ ಕ್ಷಣಾರ್ಧದಲ್ಲಿ ಹಂಚಿಕೊಳ್ಳಬಲ್ಲ. ಈ ರೀತಿಯ ತತ್ತಕ್ಷಣದ ಅಪ್ದೇಟ್‌ಗಳನ್ನು ಪಡೆಯುವ ಆಂಟಿ‌ವೈರಸ್ ತಂತ್ರಾಂಶಗಳೂ ಮುಕ್ತ ತಂತ್ರಾಂಶದ ಭಂಡಾರದಲ್ಲಿ ನಿಮಗೆ ದೊರೆಯುತ್ತವೆ. clamav, clamwin ಇವುಗಳನ್ನೊಮ್ಮೆ ಬಳಸಿನೋಡಿ.
ಪ್ರಪಂಚದಾದ್ಯಂತ ನೆಟ್ವರ್ಕ್‌ನ ಸುರಕ್ಷತೆಗೆ ದೊಡ್ಡ‌ದೊಡ್ಡ ಕಂಪೆನಿಗಳೂ ಕೂಡ ಮೊರೆ ಹೋಗುವುದು ಗ್ನು/ಲಿನಕ್ಸ್ ಆವೃತ್ತಿಗಳಿಗೆ. ಡೆಬಿಯನ್ ‌ಅದರಲ್ಲಿ ಎಲ್ಲರ ಅಚ್ಚು ಮೆಚ್ಚು. ಆಪರೇಟಿಂಗ್ ಸಿಸ್ಟಮ್ ನ್ಯೂನ್ಯತೆಗಳು ಅದರ ಅಭಿವೃದ್ದಿಯ ಹಂತದಲ್ಲಿಯೇ ಮಾಯಬೇಕು, ನೂರಾರೂ ಸಮಾನ ಮನಸ್ಕ ಮುಕ್ತ ತಂತ್ರಾಂಶ ಬಳಕೆದಾರರೂ ಹಾಗೂ ತಂತ್ರಜ್ಞರು ಯಾವುದೇ ಒಂದು ಖಾಸಗಿ ಕಂಪೆನಿಯ ತಂತ್ರಾಂಶಗಳಿಗೂ ಕಮ್ಮಿಯಿಲ್ಲ ಹಾಗೂ ನ್ಯೂನ್ಯತೆಗಳಿಂದ ಅದು ಮುಕ್ತ ಎಂದು ವರ್ಷಾನುಗಟ್ಟಲೆ ಕಾಲದಿಂದ ನಿರೂಪಿಸಿಕೊಂಡು ಬಂದಿರುವುದೇ ಇದಕ್ಕೆ ಕಾರಣ.
ಕೊನೆಯದೊಂದು ಕಿವಿ ಮಾತು:- ಸುರಕ್ಷತೆಯ ಬಗ್ಗೆ ಚಿಂತಿಸುತ್ತಿದ್ದೀರಾದರೆ ನಿಮ್ಮ ತಂತ್ರಾಂಶ ಮುಕ್ತ ಮತ್ತು ಸ್ವತಂತ್ರ ಎಂಬುದನ್ನು ಧೃಡಪಡಿಸಿಕೊಳ್ಳಿ.
ಪವಿತ್ರ. ಹೆಚ್ ಸಾಪ್ಟ್ವೇರ್ ಪ್ರಪಂಚದ ಮಾಹಿತಿ ಸುರಕ್ಷೆಯ ಬಗ್ಗೆ ರಿಸರ್ಚ್ ಸ್ಪೆಷಲಿಸ್ಟ್ ಆಗಿರುವ ಪವಿತ್ರ, ಪರಿಸರ ಪ್ರೇಮಿ. ಇವರು ಮಂಡ್ಯ ಜಿಲ್ಲೆಯ, ಮಳವಳ್ಳಿ ಎಂಬ ಹಳ್ಳಿಯಿಂದ ಬಂದವರು, ಬಿ.ಇ. ಕಂಪ್ಯೂಟರ್ ಸೈನ್ಸ್ ಪದವೀಧರೆ ಹಾಗೂ ಬಿಟ್ಸ್ ಪಿಲಾನಿ ಎಂ.ಎಸ್. ಸ್ನಾತಕೋತ್ತರ ಪದವಿಧರೆ. ಜೊತೆಗೆ ವೈದ್ಯಕೀಯ ನ್ಯಾಯಶಾಸ್ತ್ರ (Forensic Science)ದಲ್ಲಿ ಬಳಸುವ ಬರವಣಿಗೆಯ ವಿಶ್ಲೇಷಣೆಯಲ್ಲಿಯೂ (Handwriting Analyst) ಇವರು ಪದವಿಯನ್ನು ಹೊಂದಿದ್ದಾರೆ. ಪ್ರಕೃತಿಯ ಸಹಜ ಸೌಂದರ್ಯವನ್ನು ಕ್ಯಾಮೆರಾದ ಕಣ್ಣಿನಿಂದ ಸೆರೆಹಿಡಿಯುತ್ತಿರುವ ಉದಯೋನ್ಮುಕ ಛಾಯಾಗ್ರಾಹಕಿ. ಕನ್ನಡ ಬ್ಲಾಗ್ ಲೋಕಕ್ಕೆ ಇಣುಕು ಹಾಕುತ್ತಾ, ಅಲ್ಲಲ್ಲಿ ಕಂಡು ಬರುವ ಪಕ್ಷಿ, ಹೂವು, ಸಸ್ಯಗಳ ಹೆಸರುಗಳನ್ನು ಇತರರಿಗೆ ತಿಳಿಸುತ್ತಾ, ಅನೇಕ ಕಡೆಗಳಲ್ಲಿ ಇಂಗ್ಲೀಷ್ ಹಾಗೂ ಕನ್ನಡ ಹೆಸರನ್ನೂ ಸೂಚಿಸುತ್ತ ತಮ್ಮ ಗೆಳೆಯರ ಬಳಗವನ್ನು ಚಕಿತಗೊಳಿಸುತ್ತಾರೆ.
ಮುಂದೆ ಓದಿ