ಪ್ರಕಟಿಸಿದ್ದು ದಿನಾಂಕ Jan 13, 2013 ವಿಭಾಗ 2013, ale3 | 0 ಪ್ರತಿಕ್ರಿಯೆಗಳು

ಎನ್.ಎಫ್.ಸಿ(NFC)

NFC ಎಂದರೆ Near Field Communication. ಇದು RFId ತಂತ್ರಜ್ಞಾನದ ಆಧಾರದ ಮೇಲೆ ನಿರ್ಮಿತವಾಗಿದ್ದೂ, ಅದನ್ನು ಮುಂದಿನ ಘಟ್ಟಕ್ಕೆ ಕೊಂಡೊಯ್ಯುತ್ತದೆ. ಇದು ಬಹುಮುಖ್ಯವಾಗಿ ಸ್ಮಾರ್ಟ್ ಫೋನ್ ಗಳ ಅಂಗವಾಗಿದ್ದೂ, 2014ರ ವೇಳೆಗೆ ಶೇಕಡ 50 ರಷ್ಟು ಸ್ಮಾರ್ಟ್ ಫೋನ್ ಗಳು NFC ತಂತ್ರಜ್ಞಾನ ಹೊಂದಿರುತ್ತವೆ ಎಂಬುದು ಕೆಲವು ತಜ್ಞರ ಅಭಿಪ್ರಾಯ.

NFC ತಂತ್ರಜ್ಞಾನವು ಕುಟುಕುವ ಕಾರ್ಯದಿಂದ ಆರಂಭಗೊಳ್ಳುತ್ತದೆ . NFC ತಳುಕು ಹೊಂದಿರುವ ಕಾರಿನ ಕಿಟುಕಿಗೆ ಫೋನ್ ನಿಂದ ಕುಟುಕಿದರೆ ಬಾಗಿಲು ತೆರೆದುಕೊಳ್ಳುತ್ತದೆ . ನಂತರ ಫೋನನ್ನು ಕೇಂದ್ರವೊಂದರಲ್ಲಿ ಸ್ಥಾಪಿಸಿದರೆ, ಫೋನ್ ನಿಂದ ಹಾಡುಗಳು,ವೀಡಿಯೋಗಳು ಕಾರಿನ ಪ್ಲೇಯರ್ ಗೆ ವರ್ಗವಾಗುತ್ತವೆ . ಅಲ್ಲದೆ ಸೀಟಿನ, ಕಿಟುಕಿಗಳ ಏರಿಳಿತಗಳ ಆದ್ಯತೆಗಳು, ಅಕೌಂಟ್ ಮಾರ್ಪಾಟುಗಳು, ಪ್ರೊಫೈಲ್ ಗಳಾಗಿ ಉಳಿಸಿರಲಾಗುತ್ತದೆ . ಅಂತೆಯೇ ಎಲ್ಲವೂ ಮಾರ್ಪಟುಗೊಳ್ಳುತ್ತವೆ. ಬೇರೊಬ್ಬರು ತಮ್ಮ ಫೋನನ್ನು ಅಲ್ಲಿ ಸ್ಥಾಪಿಸಿದರೆ ಅವರ ಆದ್ಯತೆಗಳಂತೆ ಎಲ್ಲವೂ ಬದಲಾಗುತ್ತವೆ . ಇಂತಹ ಒಂದು ಕಾರನ್ನು ಹ್ಯುಂದಾಯ್ (Hyundai) ಸಂಸ್ಥೆಯು ಪ್ರದರ್ಶಿಸಿದೆ .(ಈ ರೀತಿಯ ಓದು/ಬರೆ ಬಳಕೆಗೆ Data Emulation ಎಂದು ಹೆಸರು )

RFIdಗಿಂತ ಒಂದು ಹೆಜ್ಜೆ ಮುಂದೆ ಅಥವಾ ಮುಂದಿನ ಹೆಜ್ಜೆ:
ಈ ಕಾರ್ಯವನ್ನು RFId ಯಿಂದಲೇ ಸಾಧಿಸಬಹುದು . RF ತಳುಕಿನ ಬದಲು NFC ತಳುಕನ್ನು ಹಾಗು RF ಓದುಗದ ಬದಲು NFC ಓದುಗವನ್ನು ಅಳವಡಿಸಲಾಗಿದೆ . ಆದರೆ ಫೋನ್ ಗಳಲ್ಲಿ NFC ಸೌಲಭ್ಯ ದೊರೆಯುವುದರಿಂದ ಹೆಚ್ಚಿನ ಅನುಕೂಲಗಳಿವೆ. ಆದರೆ ಇಷ್ಟೇ ಇವೆರಡರ ನಡುವೆ ಇರುವ ವ್ಯತ್ಯಾಸವಲ್ಲ . RFId ಪ್ರಕಾರದಲ್ಲಿ ತಳುಕುಗಳಿಂದ ಮಾಹಿತಿಯನ್ನು ಓದು/ಬರೆ ಮಾಡಬಹುದು ಅಷ್ಟೇ.ಇದು ಒಂದು ವಿಧದಲ್ಲಿ ಏಕಮುಖ ಕಮ್ಯುನಿಕೇಷನ್ ಆಗಿಬಿಡುತ್ತದೆ. ಇದಕ್ಕೆ ಎದುರಾಗಿ NFC ಯಲ್ಲಿ ತಳುಕುಗಳನ್ನು ಪ್ರೊಗ್ರಾಮ್ ಮಾಡಬಹುದು . ಆ ತಳುಕುಗಳನ್ನು ಓದಿದ ಫೋನ್ ಗಳಲ್ಲಿ ಕೆಲ settings ಬದಲಾವನೆಯನ್ನೋ , ಇಲ್ಲವೇ ಯಾವುದಾದರೂ appನ್ನು invoke ಮಾಡಬಹುದು.

RFIdಯಿಂದ ಸಾಧ್ಯವಾಗದ NFCಯ ಮತ್ತೊಂದು ಉಪಯೋಗವೆಂದರೆ peer to peer transfer . ಎರಡು ಫೋನ್ ಗಳು ಪರಸ್ಪರ ಕುಟುಕಿನಿಂದ ಹಾಡುಗಳು,ವೀಡಿಯೋಗಳು ಇತ್ಯಾದಿ ಡಾಟಾ ಹಂಚಿಕೊಳ್ಳಬಹುದು. ಬ್ಲೂಟೂತ್ ನಂತೆ pair ಆಗುವ ಈ ಫೋನ್ ಗಳಲ್ಲಿ ಒಟ್ಟಾಗಿ multi-player ಆಟಗಳನ್ನು ಕೂಡ ಆಡಬಹುದು .

RFId-NFC ಜೊತೆಯಾಟ:
NFC ಮುಖಾಂತರ ಹಣದ ಪಾವತೀಕರಣ ಮಾಡಬಹುದು . ಐರ್ಲ್ಯಾಂಡಿನ Ticket Friend ಎಂಬ ಸಂಸ್ಥೆಯು ಸಿನಿಮಾ ಟಿಕೆಟ್ ಗಳಿಗೆ ಈ ತಂತ್ರಜ್ಞಾನವನ್ನು ಅಳವಡಿಸಿದೆ. ಕಾಯ್ದಿರಿಸಿದ ಸೀಟುಗಳ ಮಾಹಿತಿಯನ್ನು ಫೋನ್ ನಲ್ಲಿ ಉಳಿಸಿರಲಾಗುತ್ತದೆ . ಚಿತ್ರಮಂದಿರದಲ್ಲಿ NFC ಓದುಗನ ಎದುರು ಫೋನ್ ತಂದರೆ , ಅದರಲ್ಲಿರುವ ಟಿಕೆಟ್ಟಿನ ಮಾಹಿತಿ ಪರಿಶೀಲಿಸಿ, ಒಳಗೆ ಹೋಗಲು ಸಮ್ಮತಿ ಕೊಡುತ್ತದೆ . NFC ಹೊಂದಿರುವ ಫೋನ್ ಗಳು ವಿರಳವಾದ ಕಾರಣ ಅದನ್ನು ಹೊಂದಿರದ ಬಳಕೆದಾರರಿಗೆ RFId ಕಾರ್ಡ್ ನೀಡಲಾಗುತ್ತದೆ . ಇದನ್ನು ಕೂಡ ಓದುವ ಸಾಮರ್ಥ್ಯವುಳ್ಳ NFC ಓದುಗವು ಪರಿಶೀಲನೆ ಮಾಡಿ ಸಮ್ಮತಿ ಕೊಡುತ್ತದೆ. ಅಲ್ಲಿಗೆ RFId ಹಾಗು NFC ತಂತ್ರಜ್ಞಾನಗಳನ್ನು ಕೆಲವು ಕಡೆ ಅದಲು ಬದಲಾಗಿ ಬಳಸಬಹುದು.

ತೊಂದರೆಗಳು/ಅಪಾಯಗಳು:
RFIdಯಿಂದ ಎಷ್ಟು ಅನುಕೂಲಗಳು ಇವೆಯೋ ಅಷ್ಟೇ ಅಪಾಯಗಳೂ ಇವೆ. ಇದರಿಂದ ಆರೋಗ್ಯದ ಮೇಲೆ ಅಥವಾ ಪರಿಸರದ ಮೇಲೆ ಯಾವುದೇ ದುಷ್ಪರಿಣಾಮ ಉಂಟಾಗುವುದಿಲ್ಲ , ಆದರೆ ಬಳಕೆದಾರರಿಗೆ ಸಂಬಂಧ ಪಟ್ಟ ಕೆಲ ವೈಯಕ್ತಿಕ ಸಂಗತಿಗಳನ್ನು ಯಾರು ಬೇಕಾದರೂ ಸುಲಭವಾಗಿ ಪಡೆದುಕೊಳ್ಳುವಂತೆ ಆಗಿಬಿಡುತ್ತದೆ . ಸದಸ್ಯತ್ವ ಸೂಚಿಸುವ ಕಾರ್ಡೊಂದನ್ನು ಜೇಬಿನಲ್ಲಿಟ್ಟುಕೊಂಡು ಹೋಗುತ್ತಿದ್ದಾಗ , ಯಾರಾದರೂ ಓದುಗವನ್ನು ಹೊಂದಿದ್ದರೆ ನಮಗೆ ಅರಿವಿಗೇ ಬಾರದಂತೆ ನಮ್ಮ ಕಾರ್ಡನ್ನು ಓದಿಬಿಡಬಹುದು. ಇನ್ನು ಪಾವತಿ ಮಾಡಲು ಬಳಸುವ ಕಾರ್ಡಾದರೆ , ನಮ್ಮ ಕ್ರೆಡಿಟ್/ಡೆಬಿಟ್ ಕಾರ್ಡ್ ಮಾಹಿತಿಯನ್ನು ನೆನಪಿಟ್ಟುಕೊಳ್ಳಲು ಸಾಧ್ಯವಿದೆ. ಇನ್ನು ಮಳಿಗೆಗಳಿಂದ ವಸ್ತುಗಳನ್ನು ಮನೆಗೆ ತಂದಾಗ, RFId ತಳುಕುಗಳು ಹಾಗೆಯೇ ಉಳಿದುಕೊಳ್ಳುತ್ತವೆ. ಇದರಿಂದ ನಮ್ಮ ಮೇಲೆ ಗೂಢಚರ್ಯವನ್ನು ಮಾಡಬಹುದು. 2003ರಲ್ಲಿ ಕ್ಯಾಲಿಫೋರ್ನಿಯಾದ ಸೆನೇಟರ್ ಡೆಬ್ರಾ ಬವೆನ್ ರವರು “ಒಂದು ದಿನ ನಿಮ್ಮ ಒಳಉಡುಪುಗಳು ನಿಮ್ಮ ಚಲನ ವಲನಗಳ ಬಗ್ಗೆ ಯಾರಿಗೋ ಮಾಹಿತಿ ರವಾನಿಸುತ್ತಿವೆ ಎಂದು ತಿಳಿದರೆ , ನಿಮಗೆ ಹೇಗೆನಿಸುತ್ತದೆ?’ ಎಂದು ಕೇಳಿದ ಪ್ರಶ್ನೆ ಉಲ್ಲೇಖಿಸಲೇ ಬೇಕಾದದ್ದು.

ವಿರೋಧಗಳು:
250ಡಾಲರುಗಳ ಉಪಕರಣದೊಂದಿಗೆ ಯಾವ RFId ತಳುಕನ್ನು ಬೇಕಾದರೂ ಓದಬಹುದು ಎಂದು ಕ್ರಿಸ್ ಪೆಗೆಟ್ ಎಂಬುವವರು ತೋರಿಸಿಕೊಟ್ಟಿದ್ದಾರೆ. ಹಾಗೆಯೇ ಎಷ್ಟೋ ಸಂಸ್ಥೆಗಳು ಹೇಗೆ ಬಳಕೆದಾರರ ಮಾಹಿತಿಯನ್ನು ಹೆಚ್ಚು ಸುರಕ್ಷಿತವಾಗಿಸಬಹುದು ಎಂದು ಸಂಶೋಧಿಸಿ RFId ವಿನ್ಯಾಸಕ್ಕೆ ಕೆಲ ಸಲಹೆ ಸೂಚನೆಗಳನ್ನು ನೀಡಿದ್ದಾರೆ. ಎಷ್ಟು ಸುರಕ್ಷಿತಪಡಿಸಿದರೂ , ಸಂಪೂರ್ಣವಾಗಿ ಬಳಕೆದಾರರ ವ್ಯಕ್ತಿತ್ವವನ್ನು ಕಾಪಾಡಲಾಗದು . ಅದಕ್ಕಾಗಿಯೆ ಎಷ್ಟೊಂದು ಸಂಘ ಸಂಸ್ಥೆಗಳು RFId ತಂತ್ರಜ್ಞಾನವನ್ನು ವಿರೋಧಿಸುತ್ತಿವೆ . ಗ್ರಾಹಕ ಗೌಪ್ಯತಾ (Consumer Privacy) ನಿಪುಣರಾದ ಕ್ಯಾಥರೀನ್ ಆಲ್ಬ್ರೆಟ್ ಹಾಗು ಲಿಜ್ ಮೆಕ್ ಲನ್ ಟೈರ್ ಇದನ್ನು ವಿರೋಧಿಸುತ್ತಿರುವ ಪ್ರಮುಖರು. ಇವರು ತಮ್ಮ ಪುಸ್ತಕ SpyChips: How Major Corporations and Government Plan to Track Your Every Move ದಲ್ಲಿ ಹೇಗೆ ಸರ್ಕಾರಗಳು ಹಾಗು ದೊಡ್ಡ ಸಂಸ್ಥೆಗಳು ಪ್ರತಿಯೊಬ್ಬರ ಚಲನ ವಲನಗಳನ್ನು ಸಮ್ಮತಿಯೇ ಇಲ್ಲದೆ ಪಡೆದುಕೊಳ್ಳಬಹುದು ಹಾಗು ಹೇಗೆ ಇದರಿಂದ ನಮ್ಮ ಸ್ವಾತಂತ್ರ್ಯ ಕಳೆದುಕೊಳ್ಳುತ್ತೇವೆ ಎಂದು ವಿವರಿಸಿದ್ದಾರೆ . ಈ ರೀತಿಯ ಉಲ್ಲಂಘನೆಗಳು, ಆಗಬಹುದಾದ ಅನಾಹುತಗಳ ಬಗ್ಗೆ ತಿಳಿಯಲು www.spychips.com ಗೆ ಭೇಟಿ ನೀಡಬಹುದು.

ಎಲ್ಲ ತಂತ್ರಜ್ಞಾನಗಳಂತೆ ಇದೂ ಬಳಕೆ ದುರ್ಬಳಕೆಗಳ ತಕ್ಕಡಿಯಲ್ಲಿದೆ. ನಮ್ಮ ಕೆಲಸ ಕಾರ್ಯಗಳನ್ನು ಸುಗಮಗೊಳಿಸಲು ತಂತ್ರಜ್ಞಾನ ಮುಖೇನ ಜನಿಸಿ , ನಮ್ಮನ್ನು ಅಜ್ನಾನದಲ್ಲಿಡುವ ಸರ್ಕಾರಗಳ ,ದೊಡ್ಡ ಕಾರ್ಪೊರೇಷನ್ ಗಳ ಕುತಂತ್ರದಲ್ಲಿ ಅವಸಾನ ಹೊಂದುವಂತಾಗಿದೆ. ಸಮಾಜಗಳ ಸಾಫಲ್ಯತೆ ನಾಗರೀಕತೆಯಲ್ಲೋ ? ಇಲ್ಲವೇ ಆಧುನಿಕ ಸೌಕರ್ಯದಲ್ಲೋ ? ಎಂಬ ಪ್ರಶ್ನೆ ಉದ್ಭವಿಸದಂತೆ ಜ್ಞಾನದೊಂದಿಗೆ ಜವಾಬ್ದಾರಿಯನ್ನೂ, ವಿಜ್ಞಾನದೊಂದಿಗೆ ವಿವೇಚನೆಯನ್ನೂ ನಿಭಾಯಿಸಿಕೊಂಡು ಹೋದರೆ ಅದುವೇ ತಂತ್ರಜ್ಞಾನದ ಸರಿಯಾದ ಸದ್ಬಳಕೆ.

ಲೇಖಕ: ಶ್ರವಣ್ ಕುಲಕರ್ಣಿ

೨೦೧೧ರಲ್ಲಿ B.E ಪದವಿ ಹೊಂದಿ , embedded ಹಾಗು android developmentನಲ್ಲಿ ಅನುಭವ. ಸಾಹಿತ್ಯ ಹಾಗು ನಾಟಕಗಳಲ್ಲಿ ಆಸಕ್ತಿ. ಮುಕ್ತ ತಂತ್ರಜ್ಞಾನದಲ್ಲಿ ಹೆಚ್ಚುತ್ತಿರುವ ಒಲವು .ಸಂಧೀಲ್ ಸಮಾರಾಧನೆ ಎಂಬ ತಂಡದ ಮೂಲಕ ಕಿರುಚಿತ್ರಗಳ ನಿರ್ಮಾಣ ವಾರಾಂತ್ಯದ ಹವ್ಯಾಸಿ ಚಟುವಟಿಕೆ.